العىس ايتۋ كۇنى – سان ءتۇرلى سىناقتان وتكەن حالقىمىزدىڭ ىنتىماق-بىرلىگىن تانىتاتىن تاعىلىمدى مەرەكە. ريزاشىلىق پەن مەيىرىم, بەيبىتشىلىك پەن كەلىسىم ۇيلەسىم تاپقان مەرەيلى مەزەت. بۇل مەيرام ەلىمىزدە 2016 جىلدان باستاپ ەنگىزىلدى. سول جىلعى قازاقستان حالقى اسسامبلەياسىنىڭ ماجىلىسىندە 1 ناۋرىز العىس ايتۋ كۇنى بولىپ بەلگىلەندى.
بەيبىتشىلىك پەن تاتۋلىق – ادامزاتتىڭ اسىل قۇندىلىقتارىنىڭ ءبىرى. ادام بالاسى بۇكىل سانالى عۇمىرىندا ۇنەمى تىنىشتىقتا, ماڭگىلىك بەيبىت ءومىر ءسۇرۋدى ارمان ەتەدى. الىس-جاقىن ۇلت- ۇلىستارمەن, اعايىن-تۋىسپەن, كورشى-قوڭسىمەن تاتۋ-ءتاتتى, بەيبىت ءومىر سۇرۋگە ۇمتىلۋ – قازاق حالقىنىڭ قانىنا سىڭگەن قاسيەتتەرىنىڭ ءبىرى. «سىرت كوز – سىنشى» دەگەن, ارعى-بەرگى زاماندا قازاق جەرىندە بولعان ساياحاتشىلار, عالىمدار, ەلشىلەر قازاق ۇلتىنىڭ مەيماندوس, قوناقجاي, كەڭپەيىل, ەشكىمگە جاماندىق ويلامايتىن, قاسكويلىكتەن ادا حالىق ەكەنىن, ءوز بەتىنشە ەشكىمگە ۇرىنباعان, سوعىس اشپاعان ەل ەكەنىن سۇيسىنە جازعان.
تارلان تاريحتىڭ تاعىلىمدى تۇستارى از ەمەس. ۇشى-قيىرسىز قازاق دالاسى سان عاسىرلار سورابىندا وزىنە سان الۋان وركەنيەت پەن مادەنيەتتى ءسىڭىردى. بۇگىنگى قازاقستان – وزىق, جاسامپاز رۋحاني جانە مادەني داستۇرلەردىڭ مۇراگەرى.
اعايىن اراسىندا اۋىزبىرلىك پەن سىيلاستىق سالتانات قۇرسا عانا قىزمەت ءورىستى, ەڭبەك جەمىستى بولاتىنى بەسەنەدەن بەلگىلى. ەل بىرلىگى – بارشا دەموكراتيالىق, زايىرلى, قۇقىقتىق جانە الەۋمەتتىك مەملەكەت قۇرۋدىڭ اينىماس شارتى. مەملەكەتتىڭ ەكونوميكالىق ءوسىپ-وركەندەۋى, الەۋمەتتىك ىلگەرىلەۋى, دەموكراتيالىق دامۋى قوعام بىرلىگى كەلىسكەن جاعدايدا عانا جۇزەگە اسادى. سول تۇرعىدا ەل كولەمىندە بەيبىتشىلىك پەن اۋىزبىرلىكتى كوزدىڭ قاراشىعىنداي ساقتاپ, ونى ءارى قاراي نىعايتا بەرۋ – باستى ماقساتىمىز.
بۇگىنگى تاڭداعى ەلىمىزدە قالىپتاسقان ەتنوستار تۇتاستىعى مەن حالىقتار دوستىعى ارقاسىندا كوسەگەمىز كوگەرىپ, ەگەمەن ەلىمىز ورنىقتى دامۋ جولىنا ءتۇستى. ەل ىشىندەگى ۇلتارالىق تاتۋلىقتى نىعايتۋدا كونستيتۋتسيالىق ورگان بولىپ سانالاتىن قازاقستان حالقى اسسامبلەياسىنىڭ ورنى ايرىقشا ەكەنىن اتاپ وتكەن ءجون. اسسامبلەيا – بەيبىتشىلىك پەن كەلىسىمدى ءتيىمدى ناسيحاتتاۋشى قوعامدىق ينستيتۋتقا, ەتنوسارالىق جانە كونفەسسياارالىق تولەرانتتىلىقتىڭ وتاندىق ۇلگىسىنىڭ نەگىزىنە اينالدى.
ەلىمىزدىڭ حالىقارالىق ءتۇرلى قاۋىپسىزدىك شارالارىنا بەلسەنە قاتىسۋى, باستاماشى بولۋى, توراعالىق ەتۋى, سونداي مازمۇنداعى ءتۇرلى فورۋم, كونفەرەنتسيالاردىڭ استانادا تۇراقتى ءوتۋى – مەملەكەت باسشىسى قاسىم-جومارت توقاەۆتىڭ كونستيتۋتسيالىق نەگىزدە جۇرگىزىپ وتىرعان ساليقالى ساياساتىنىڭ ايقىن كورىنىسى. ۇلتارالىق كەلىسىمدى قالىپتاستىرۋ, كونفەسسياارالىق ديالوگتى جالعاستىرۋ ءۇشىن جاعدايلار جاساۋ – مەملەكەتتىڭ بۇلجىماس ستراتەگيالىق باعدارى. ال بۇل باعدار – حالىقتار مەن دىندەر اراسىنداعى ءبىر-بىرىنە دەگەن سەنىم مەن ىنتىماقتاستىڭ ارتا ءتۇسۋى ءۇشىن التىن كوپىر.
دۇنيە دۇربەلەڭگە ءتۇسىپ جاتقان قازىرگىدەي كەزەڭدە بىرلىگىمىزدىڭ بەرىكتىگى عانا باياندى بولاشاققا باستايتىنىنا كوزىمىز جەتتى. قازاقستاننىڭ حالقى وزگەلەر قىزىقتاي قارايتىن تىنىشتىق پەن تۇراقتىلىقتىڭ جەمىسىن كورىپ وتىر. وسى رەتتە ءاربىر وتانداسىمىزعا ارتىلار جاۋاپكەرشىلىك زور.
قارعا تامىرلى حالقىمىزدى, قازاق بايتاعىن قاسيەتتى قاراشاڭىراققا بالاساق, ەلىمىزدەگى بارشا ەتنوس – سول شاڭىراققا شانشىلعان ۋىقتار. وسىنىڭ ءوزى ەتنوسارالىق كەلىسىم مەن دوستىق قاتىناستىڭ قانشالىقتى ماڭىزدى ەكەنىن كورسەتەدى. سوندىقتان قوعامدا, ءاربىر وتباسىندا كەلىسىم مادەنيەتى مەن بەيبىتشىلىك قاعيداتتارىن بەرىك ورنىقتىرا بەرۋ كەرەك.
قازاقستانداعى ەتنوسارالىق قاتىناستاردىڭ الەمدىك قاۋىمداستىق تاراپىنان مويىندالۋى – ەڭ الدىمەن, قازاق ۇلتىنىڭ جاۋاپكەرشىلىگىندەگى جەتىستىك. ەلدىڭ ەكونوميكالىق ءوسۋ, الەۋمەتتىك يگىلىك پەن دەموكراتيا – ۇلتتىڭ تۇتاستىعى مەن بەرەكەسىمەن كەلەتىن جەتىستىك.
العىس ايتۋ كۇنى – اعا بۋىنعا, اتا-اناعا, ۇستازدارعا, سىيلاس, سىرلاس, تاعدىرلاس ىزگى جاندارعا قۇرمەت كورسەتەتىن, بارلىققا, تىرلىككە تاۋبە ايتاتىن تاماشا مەرەكە.
كوكتەمنىڭ العاشقى اتاۋلى كۇنى ىزگى ىستەرگە نەگىزدەلگەن قوعام قالىپتاستىرۋعا, جۇيەلى رەفورمالاردى ناقتى جۇزەگە اسىرۋعا تىڭ سەرپىن بەرەدى. جەر ىرگەسى امان, ەل ءىشى تىنىش بولسىن دەپ تىلەيىك. حالقىمىز بەرەكە-بىرلىگىنەن, ىرىس-ىنتىماعىنان ايىرىلماسىن.