اقتوبە قالاسىنىڭ №2 سوتى وبلىستىق توتەنشە جاعدايلار دەپارتامەنتى جەدەل كەزەكشىسىنىڭ كومەكشىسىنە قاتىستى ۇكىم شىعاردى, دەپ حابارلايدى Egemen.kz.
سوتتالۋشى قىلمىستىق كودەكستىڭ 271-بابى 1-بولىگى بويىنشا فۋنكتسيونالدىق قىزمەتىنە سالعىرتتىق تانىتقانى ءۇشىن ايىپتالعان ەدى. وتكەن جىلدىڭ 29 ناۋرىزى كۇنى اقتوبە قالاسى تۇرعىن ءۇي قالاشىعىندا تۇندە پاتەرگە قىلمىسكەر كىرىپ, ۇيىقتاپ جاتقان 35 جاستاعى ايەل مەن ونىڭ 16 جاستاعى ۇلىن ءولتىرىپ, 13 جاستاعى قىزعا پىشاق جاراقاتىن سالادى دا, بالكوننان شىعىپ كەتەدى. جارالانعان قىز بار كۇشىن جيىپ, «112» قىزمەتىنە شۇعىل كومەك كورسەتۋدى سۇراپ قوڭىراۋ شالعان. سول كۇنگى كەزەكشى ي.-ءدىڭ حابارلاماسىنا دەن قويماي, بىرەۋلەر ويناپ تۇر دەپ قابىلدايدى. اۋىر جارالى ي. بىرنەشە رەت تەلەفون سوققانىمەن, ەش ناتيجە بولماعان. تەك 50 مينۋت وتكەندە, ي-ءدىڭ كومەك سۇراعان ءۇشىنشى قوڭىراۋىنان كەيىن جابىرلەنۋشىنىڭ حابارلاماسى جەدەل جاردەم قىزمەتىنە جىبەرىلەدى.
ايىپتالۋشى ب. سوت كەزىندە كىناسىن تولىق مويىندامادى جانە العاشقى قوڭىراۋدى بالالاردىڭ ويىنى دەپ ساناعانىن ايتتى. ونىڭ ايتۋىنشا, كومەك سۇراعان بالا العاشقى رەت قوڭىراۋ سوققاندا ءۇزىلىپ كەتكەن. كەزەكشى ءوزى ي-عا قايتا قوڭىراۋ شالعاندا, تەلەفونى جاۋاپ بەرمەيدى. ءۇشىنشى قوڭىراۋدان كەيىن ي.-دان بولعان جاعدايدى انىقتاپ, ونىڭ حابارلاماسىن جەدەل مەديتسينالىق كومەككە جىبەردى.
سۋديا جابىرلەنۋشىنىڭ پايداسىنا 1 ميلليون تەنگە مورالدىق زيان ءوندىرۋدى جانە قىزمەتىنە سالعىرتتىق تانىتقان تجد كەزەكشىسىنە التى ايعا باس بوستاندىعىنان ايىرۋ جازاسىن تاعايىندادى.