كولىك قۇراستىرۋ وندىرىسىندە يمپورتقا تاۋەلدىلىكتى ازايتۋ ماقساتىندا وتاندىق وندىرۋشىلەردى قولداۋ, باسەكەلەستىكتى ارتتىرۋعا بايلانىستى ىلكىمدى قادامدار ىسكە اسىپ كەلەدى. الايدا كولىك قۇراستىرۋ سالاسىندا بىلىكتى كادرلار جەتىسپەيدى.
«اتامەكەن» ۇكپ دەرەگىنە سۇيەنسەك, الداعى ءتورت جىلدا كولىك قۇراستىرۋ سالاسىنا 7 مىڭنان استام بىلىكتى مامان قاجەت. وسى ورايدا كولىك قۇراستىرۋدى دامىتۋدىڭ 2024–2028 جىلدارعا ارنالعان كەشەندى جوسپارىندا دۋالدى وقىتۋدى دامىتۋ بويىنشا ەۋروپالىق تاجىريبەنى زەردەلەۋ, تەحنيكالىق جانە كاسىپتىك ورتا بىلىمنەن كەيىنگى ءبىلىم بەرۋدى ۇيىمداستىرۋدا وزىق تاجىريبەنى ەنگىزۋ جونىندەگى ءىس-شارا قاراستىرىلىپ وتىر. ەلىمىزدەگى تەحنيكالىق وقۋ ورىندارىنىڭ كوشباسشىسى قانىش ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى بيىلدان باستاپ دۋالدى وقىتۋ ماقساتىندا بەيىندى كادرلار ىسىنە باسىمدىق بەرە وتىرىپ, جۋىردا كولىك ينجەنەرياسى جانە لوگيستيكا مەكتەبىنىڭ وقۋ ورتالىعىن «Hyundai Trans Kazakhstan» اۆتوموبيل زاۋىتىنان اشتى.
وقۋ ورتالىعىن قۇرۋ تۋرالى كەلىسىم وتكەن جىلى تامىز ايىندا كاسىپورىندار اراسىندا قول قويىلعان مەموراندۋمدا قاراستىرىلعان. ۋنيۆەرسيتەت رەكتورى مەيرام بەگەنتاەۆتىڭ ايتۋىنشا, عىلىم جانە جوعارى ءبىلىم مينيسترلىگىنىڭ دامۋ تۇجىرىمداماسى اياسىندا ىسكە اسقان ءبىلىم باعدارلامالارىن وندىرىسپەن ۇشتاستىرۋ ستۋدەنتتەرگە كاسىبي تاجىريبە جيناۋعا مۇمكىندىك بەرەدى. وندىرىسكە بەيىندى مامان دايارلاۋ, بىرلەسكەن زەرتتەۋ جۇرگىزۋدى ماقسات ەتە وتىرىپ, اۆتوموبيل زاۋىتىنان اشىلعان كولىك ينجەنەرياسى جانە لوگيستيكا مەكتەبىنىڭ وقۋ ورتالىعى جۇمىسىنىڭ ناتيجەسى الداعى ۋاقىتتا ۋنيۆەرسيتەتتىڭ وقۋ ۇدەرىسىنە جانە وندىرىسكە ەنگىزىلمەك. بۇعان قوسا اتالعان مەكتەپتە وقىتىلاتىن «كولىك ينجەنەرياسى», «كولىك قىزمەتتەرى», «تسيفرلىق لوگيستيكا» جانە باسقا دا ءبىلىم بەرۋ باعدارلامالارى بار. الداعى ۋاقىتتا «ەنەرگيا جانە ەلەكترمەن قامتاماسىز ەتۋ», «كولىك اۆتوماتيكاسى جانە كولىكتى باسقارۋ (اۆتوماتتاندىرۋ)», «كولىك قۇرىلىسى» باعىتتارى بويىنشا باعدارلامالار اشۋ كوزدەلگەن.
ۋنيۆەرسيتەت پەن زاۋىت اراسىنداعى بايلانىستى قامتاماسىز ەتەتىن مامان-كوننەكتور «كولىك ينجەنەرياسى» ءبىلىم بەرۋ باعدارلاماسىنىڭ باسشىسى نۇربول قامزانوۆتىڭ ايتۋىنشا, كولىك جانە لوگيستيكا سالاسىنا جاڭا بۋىن ماماندارىن دايارلاۋ مەملەكەت باسشىسىنىڭ جولداۋىنداعى كولىك سالاسىن باسەكەلەستىككە قابىلەتتى ەتۋ باسىمدىقتارىمەن تىعىز بايلانىستى. وندىرىستىك تاجىريبەنىڭ كولىك قۇراستىراتىن زاۋىتتا ىسكە اسۋى دۋالدى ءبىلىم باعدارلاماسىنىڭ ناتيجەلى ىسكە اسۋىنا ىقپال ەتەدى. كولىك ينجەنەرياسى جانە لوگيستيكا مەكتەبىنىڭ وقۋ ورتالىعى ستۋدەنتتەردىڭ كولىك سالاسىنداعى تەوريالىق ءبىلىمىن تاجىريبەمەن ۇشتاستىرۋعا مۇمكىندىك بەرەدى.
كولىك ينجەنەرياسى جانە لوگيستيكا مەكتەبى بىلتىر ماۋسىم ايىندا ساتباەۆ ۋنيۆەرسيتەتىندە قۇرىلعان. «مەكتەپ» دەپ اتالۋ سەبەبى, شەتەلدەر جانە نازارباەۆ ۋنيۆەرسيتەتى تاجىريبەسىندەگىدەي «مەحانيكا مەكتەبى», «بيولوگيا مەكتەبى» سياقتى باعىتتا جالعاسىن تابادى.
«بۇگىنگى تاڭدا كولىك ينجەنەرياسى جانە لوگيستيكا مەكتەبىنىڭ ۇرانى – وندىرىسكە بەيىمدى ماماندار دايارلاۋ. وسىعان قول جەتكىزۋ ءۇشىن ءبىز فينليانديا ەلىندە تابىستى جۇزەگە اسقان وقۋ جۇيەسىنىڭ تاجىريبەسىن قولداندىق. وسى تاجىريبە نەگىزىندە قولعا الىنعان وقىتۋ باعدارلاماسى اياسىندا وقۋ ورنىنىڭ ستۋدەنتتەرى وندىرىستە بىلىكتىلىگىن ارتتىرۋمەن قاتار, تابىس تابۋىنا دا مۇمكىندىك بار. بۇل 4-كۋرس ستۋدەنتتەرى ءۇشىن قولايلى مۇمكىندىك. مول تاجىريبە جيناقتاپ, وقۋ ورنىن بىتىرگەننەن كەيىن وسى كاسىپورىندا جۇمىسىن جالعاستىرا الادى. ولارعا ديپلوم العانعا دەيىن ايىنا 250 مىڭ تەڭگە جالاقى تولەنەدى. تاياۋ ۋاقىتتا اتالعان كومپانيامەن جاسالعان كەلىسىمدەر نەگىزىندە كولىك قۇراستىرۋ وندىرىسىنە جوعارى دەڭگەيلى ءارى كاسىبي بەيىندى ماماندار دايارلاناتىن بولادى», دەيدى نۇربول قامزانوۆ.
مەموراندۋم اياسىندا ستۋدەنتتەر عانا ەمەس, ۋنيۆەرسيتەتتىڭ پروفەسسور-وقىتۋشىلار قۇرامىن وندىرىستىك تاعىلىمدامادان وتكىزۋ كوزدەلگەن.
الماتى