ءال-فارابي اتىنداعى قازۇۋ-دا Digital Farabi حالىقارالىق فورۋمى اياسىندا بوس جۇمىس ورىندارىنىڭ جارمەڭكەسى ءوتتى, دەپ حابارلايدى Egemen.kz.
جارمەڭكەگە Halyk bank, «Beam.kz», بانك تسەنتر كرەديت, Kaspi Bank جانە باسقا دا جالپى سانى 30-دان استام ءىرى كومپانيالار مەن ۇيىمدار قاتىستى. جۇمىس بەرۋشىلەر ستۋدەنتتەرگە ءارتۇرلى سالاداعى بوس جۇمىس ورىندارىن ۇسىندى.
«ۋنيۆەرسيتەتىمىزدە ءداستۇرلى شاراعا اينالعان بوس جۇمىس ورىندارى جارمەڭكەسى ستۋدەنتتەرگە كەڭ مۇمكىندىكتەر بەرەدى. ويتكەنى ءاربىر كومپانيا جايىندا تولىق اقپارات الىپ, بوس جۇمىس ورنى تۋرالى مالىمەتتەرمەن تانىسۋ مۇمكىندىگى قاراستىرىلعان. بۇل ءوز كەزەگىندە ستۋدەنت جاستاردى ىنتالاندىرىپ, ولاردى ەڭبەك نارىعىنا باعدارلاۋعا كومەكتەسەدى. جارمەڭكە جاستارعا تاعىلىمدامادان وتۋگە ءارى جۇمىسقا ورنالاسۋىنا قولايلى جاعداي تۋعىزادى», دەيدى مەحانيكا-ماتەماتيكا فاكۋلتەتىنىڭ مامانى سمايىل ەركەبۇلان.
اتالعان فاكۋلتەتتىڭ ماگيسترانتى ىرىسداۋلەت قارسىباي ۇلى جارمەڭكەگە بيىل ءبىرىنشى رەت قاتىسىپ وتىر ەكەن. قازىرگى ۋاقىتتا جۇمىس ىستەپ جۇرگەنىمەن, باسقا سالادا باعىن سىناپ كورگىسى كەلەتىن جاس ماماننىڭ ايتۋىنشا, جارمەڭكە ستۋدەنتتەر ءۇشىن كاسىبي جولىن باستاۋداعى ماڭىزدى قادام بولاتىنى انىق ءارى بۇل الاڭدا ەلىمىزدەگى كومپانيالار تۋرالى كوپ ماعۇلمات الۋعا بولادى.
وقۋ ورىندارىمەن تۇراقتى جۇمىس ىستەپ كەلە جاتقان «Beam.kz» كومپانياسى ساتۋ ءبولىمىنىڭ جەتەكشىسى داريا نۇرعاجىقىزى ستۋدەنتتەر مەن تۇلەكتەردى جۇمىسپەن قامتاماسىز ەتۋگە باعىتتالعان پلاتفورما جۇمىسىمەن تانىستىرىپ, ستۋدەنت جاستاردىڭ تاجىريبەسى بار-جوعىنا قاراماستان, ءبىرىنشى كەزەكتە ارنايى كۋرستار ۇيىمداستىرىلاتىنىن ايتتى. مۇنىمەن قوسا وقۋمەن قاتار جۇمىس ىستەۋگە دە مۇمكىندىكتەر قاراستىرىلعان. ونىڭ ايتۋىنشا, بۇگىندە ەڭبەك نارىعىندا مۇعالىم, دارىگەر, زاڭگەر ماماندىعىمەن قاتار ەكونوميكا, قارجى, IT سالاسىندا سۇرانىس جوعارى.