الماتىدا حالىقارالىق كىتاپ سىيلاۋ كۇنىنە وراي رەسپۋبليكالىق عىلىمي-پەداگوگيكالىق كىتاپحانانىڭ ۇيىمداستىرۋىمەن «شىعارماشىل ينتەلليگەنتسيا – قازاقستان بالالارىنا» تاقىرىبىندا رەسپۋبليكادا جارىق كورەتىن بالالارعا ارنالعان گازەت-جۋرنالداردىڭ رەداكتورلارىمەن كەزدەسۋ ءوتتى.
«وقۋعا قۇشتار مەكتەپ» جوباسى, «بالالار كىتاپحاناسى» باعدارلاماسى اياسىندا وتكەن كەزدەسۋ بالالار جۋرنالدارى مەن گازەتتەرى ارقىلى كىتاپ وقۋ مادەنيەتىن ناسيحاتتاۋ, وقۋ بەلسەندىلىگىن ارتتىرۋدى ماقسات ەتەدى. باسقوسۋعا «بالالار ادەبيەتى» باسپاسى, «قازاق گازەتتەرىنە» جشس-نا قاراستى «ۇلان», «درۋجنىە رەبياتا» گازەتى, «بالدىرعان», «اقجەلكەن», جۋرنالدارى, سونداي-اق جەكەمەنشىك «ايگولەك», «بالبۇلاق», «جىل ون ەكى اي», «التىن ساقا», «حان تالاپاي», «ىبىراي», ء«بىلىم شىڭى – عىلىم سىرى», «اقىلدى بالالار», ء«بىلىمدى ۇلت», «Bala Bi», «Farabi shakirti», «اقىلدىم», «بالاقان», «بالالار الەمى», «ەرتەگىلەر الەمىندە», «Alan&kids», «بالاپان باعى», ء«مولدىر بۇلاق», «جەتى الەم», «ەرتەگىلەر ەلىندە», ء«بىلىم اكادەمياسى», «اسىل ءسوز», ء«ال ءجابىردىڭ اتاسى» سياقتى وتىزعا جۋىق مەرزىمدى باسىلىمداردىڭ رەداكتورلارى, قالامگەرلەر مەن قالا مەكتەپتەرىنىڭ ديرەكتورلارى, مۇعالىمدەر, وقۋشىلار مەن اتا-انالار قاتىستى.
القالى جيىن بارىسىندا گازەت-جۋرنالداردىڭ شىعۋ تاريحى, بالالاردى قىزىقتىراتىن تاقىرىپتار توڭىرەگىندە قىزۋ پىكىرتالاس بولدى. اقپاراتتىق تەحنولوگيالاردىڭ كومەگى ارقىلى بالالارعا قولجەتىمدى كونتەنتتى گازەت-جۋرنالدار بەتىندە ۇيىمداستىرۋ بۇگىنگى كۇننىڭ تالابى. وسى باعىتتا ءباسپاسوز ونىمدەرىن مەيلىنشە قىزىقتى ەتىپ شىعارۋعا ەڭبەكتەنىپ جۇرگەن رەداكتسيا قىزمەتكەرلەرى جازىلىم ماسەلەسىنىڭ وزەكتى بولىپ تۇرعانىن العا تارتتى. ال جازىلىم كورسەتكىشىن جاقسارتۋ ءۇشىن مۇعالىمدەرمەن قاتار اتا-انالاردىڭ دا بەلسەندىلىگى قاجەت.
رەسپۋبليكالىق عىلىمي-پەداگوگيكالىق كىتاپحانا ديرەكتورى ءاليا سايدەمباەۆانىڭ ايتۋىنشا, كەزدەسۋ بالالاردىڭ كىتاپ وقۋعا دەگەن قىزىعۋشىلىعىن ارتتىرۋدى ماقسات ەتەدى.
– مەملەكەت باسشىسىنىڭ تاپسىرماسىنا سايكەس وقۋ-اعارتۋ مينيسترلىگى مەن مادەنيەت جانە اقپارات مينيسترلىگى تاراپىنان كوتەرىلىپ, وسى اۋقىمدى ماسەلەنى شەشۋدىڭ جولدارى ىسكە اسىپ جاتقانى بەلگىلى. ەندىگى كەزەكتە الماتىدان باستاۋ العان ماڭىزدى شارا رەسپۋبليكا وڭىرلەرىندە دە جالعاسىن تاباتىن بولادى. بالالاردىڭ كىتاپقا, گازەت, جۋرنالدارعا دەگەن قىزىعۋشىلىعىن دامىتۋ قوعامعا ورتاق ماسەلە. بۇگىندە بايقاپ قاراساق, بالالاردىڭ سوزگە, سويلەۋگە شورقاقتىعىن بايقاۋعا بولادى. ول ءۇشىن بالالاردى كىتاپ وقۋعا, قازاقتىڭ شۇرايلى باي ءتىلىنىڭ كوركەم قاسيەتىن تانۋعا باۋلۋىمىز قاجەت. ال ولاردى كىتاپ وقۋعا قىزىقتىراتىن بىردەن-ءبىر كوممۋنيكاتسيا قۇرالى – بالالارعا ارنالعان باسىلىمدار, – دەپ اتاپ ءوتتى ءا.سايدەمباەۆا.
بيىل رەسپۋبليكالىق عىلىمي-پەداگوگيكالىق كىتاپحانا 250-دەن استام باسىلىم تۇرىنە جازىلعان. الداعى ۋاقىتتا جازىلىم سانىن كوبەيتۋدى جوسپارلاپ وتىرعان كىتاپحانا ماماندارى جىلدان-جىلعا كەلۋشىلەر سانىنىڭ دا ارتىپ كەلە جاتقاندىعىن ايتادى. بۇگىندە كىتاپحاناعا كەلۋشىلەر سانى 6 مىڭنان اسادى. پەداگوگيكالىق بەيىندى كىتاپحانا قورىندا قازىرگى كەزدە گازەت-جۋرنال مەن كىتاپتى قوسقاندا 400 مىڭعا جۋىق ەكسپوزيتسيا بار. ال ەلەكتروندى كىتاپحانا قورى 3 مىڭنان اسادى.
كىتاپحانا قورى وسى جولى كىتاپ اۆتورلارى, باسپا وكىلدەرى سىيعا تارقان جاڭا باسىلىمدارمەن تولىقتى.
الماتى