ناۋرىز ايىندا وتەتىن ۇبت-عا قاتىسۋ ءۇشىن ءوتىنىش قابىلداۋ 27 اقپاندا باستالىپ, 10 ناۋرىزعا دەيىن جالعاسادى. ۇبت-عا تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا نەمەسە UTO قوسىمشاسى ارقىلى جۇرگىزىلەدى. تەستىلەۋدىڭ ءوزى 1-31 ناۋرىز ارالىعىندا وتەدى. بۇل تۋرالى ۇلتتىق تەستىلەۋ ورتالىعى حابارلادى, دەپ جازادى Egemen.kz.
ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, وتكەن جىلعى مەكتەپ جانە كوللەدج تۇلەكتەرى, قازاقستان ازاماتى بولىپ سانالمايتىن ۇلتى قازاق تۇلعالار, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
ايتا كەتەرلىگى, قاتىسۋشىلار تەستىلەۋ وتكىزىلەتىن ورىندى, كۇندى جانە ۋاقىتتى وزدەرى تاڭدايدى.
ۇبت-داعى پاندەردىڭ سانى وزگەرىسسىز قالدى, ياعني ۇشەۋى مىندەتتى جانە ەكەۋى تاڭداۋ بويىنشا. الايدا, «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. ال بەيىندىك پاندەردىڭ سۇراقتار سانى ارتىپ, 40 تەست تاپسىرماسىنان تۇرادى. اتاپ وتسەك, بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى.
وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراق. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بالل – 140, ول دا وزگەرىسسىز قالدى.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
ەسكە سالايىق, 10 اقپاندا قاڭتار ۇبت-سى اياقتالدى, تەستىلەۋگە 134 مىڭعا جۋىق ادام قاتىستى. ونىڭ ىشىندە تالاپكەرلەردىڭ 76,4%-ى قازاق تىلىندە, 23,5%-ى ورىس تىلىندە, 83 ادام اعىلشىن تىلىندە تەستىلەۋدەن ءوتتى.
ۇبت باستالعالى شەكتى بالدى 77,5%-عا جۋىق تالاپكەر جينادى. ورتاشا بالعا كەلەتىن بولساق, ول 69 بالدى قۇرادى. ەڭ جوعارى بالل – 137. جالپى, 72 تالاپكەر 130-دان جوعارى بالل جينادى.