ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى تومەنگى سۇرىپتى كومىردەن بيوتىڭايتقىش الدى. قازاق – نەمىس – قىتاي حالىقارالىق قولدانبالى ميكروبيولوگيا عىلىمي زەرتحاناسىنىڭ ماماندارى ىسكە اسىرعان جوبانىڭ ەرەكشەلىگى – تۇزدانعان توپىراقتى قالپىنا كەلتىرۋ مەن ساپاسىز كومىردى كادەگە جاراتۋ.
عالىمدار جاساعان بيوتىڭايتقىش سۇيىق جانە ۇنتاق كۇيىندە وندىرىسكە شىعادى. مۇنداي بيولوگيالىق تىڭايتقىش داقىلداردىڭ ءونىمىن ارتتىرىپ, قورشاعان ورتاعا ەشقانداي زالال كەلتىرمەيدى.
«قازىر توپىراقتىڭ تۇزدانۋى الەمدە ەكولوگيالىق وزەكتى ماسەلەگە اينالىپ وتىر. ونىڭ سالدارى ادام دەنساۋلىعىنا, وسىمدىكتىڭ ونىمدىلىگىنە كەرى اسەرىن تيگىزەدى. سونى جويۋ ءۇشىن ءتۇرلى حيميالىق ءادىس قولدانىلادى. بۇل ءادىس ءتيىمدى ناتيجە كورسەتكەنىمەن, قورشاعان ورتاعا زيان. جاڭا بيولوگيالىق ءونىم تەك ەكونوميكالىق تۇرعىدان ەمەس, سونىمەن قاتار اۋىل شارۋاشىلىعى سالاسى ءۇشىن قاۋىپسىز ءارى ءتيىمدى. تۇزدانعان جانە قاراپايىم توپىراقتا ميكروورگانيزمدەردىڭ قالىپتى ميكروفلوراسى بولادى. ءبىز سول ميكروفلورانى ءبولىپ الىپ, سونىڭ كومەگىمەن تومەنگى ساپالى كومىردى بيوسوليۋبيليزاتسيالاۋ ارقىلى گۋميندى زات ءبولىپ الىپ, الىنعان ءونىمدى تىڭايتقىش رەتىندە ەنگىزەمىز. كەيىن تىڭايتقىشتى تۇزدانعان توپىراقپەن ارالاستىرعاندا وڭ ناتيجەسىن كورۋگە بولادى. دەمەك توپىراقتاعى تۇزدىڭ كونتسەنتراتسياسى ازايىپ, قالىپتى نورماعا كەلەدى», دەيدى قازاق ۇلتتىق ۋنيۆەرسيتەتىنىڭ كىشى عىلىمي قىزمەتكەرى بەكزات كامەنوۆ.
بۇگىندە پاتەنت الۋ جانە كوممەرتسيالاندىرۋ جۇمىسىمەن اينالىسىپ جاتقان عالىمدار الداعى ۋاقىتتا قورشاعان ورتاعا زيانسىز, داقىلدىڭ ءونىمىن وسىرۋگە ىقپال ەتەتىن جاڭا ءونىمدى نارىققا شىعارۋدى جوسپارلاپ وتىر.
الماتى