ەلىمىزدە ەندى جول ەرەجەسىن بۇزعان جۇرگىزۋشىلەر اۆتوماتتى تۇردە انىقتالادى. بۇل تۋرالى ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا ايتتى, دەپ حابارلادى Egemen.kz.
ونىڭ ايتۋىنشا, قازىر قازاقستان جولدارىندا جول قوزعالىسى ەرەجەسىن بۇزۋدى تىركەيتىن 22 مىڭ بەينەباقىلاۋ كامەراسى ورناتىلعان. بۇگىندە پوليتسيا جول ەرەجەسىن بۇزعان جۇرگىزۋشىلەردى اۆتوماتتى تۇردە انىقتاۋعا كىرىسكەن.
- ءبىز «قورعاۋ» باعدارلاماسىن قولدانامىز. ول جالعان نومىرلەرى بار, ساقتاندىرۋسىز, ىزدەۋدە جۇرگەن نەمەسە جول قوزعالىسى ەرەجەسىن بۇزاتىن جانە ايىپپۇل تولەمەيتىن كولىكتەردى اۆتوماتتى تۇردە انىقتاۋعا مۇمكىندىك بەرەدى. بۇرىن بارلىق كولىكتى توقتاتىپ, قۇجاتتاردى تەكسەرۋ قاجەت بولاتىن. ال قازىر جۇيە كوشەدەگى بەينەباقىلاۋ كامەلارىنىڭ دەرەكتەرىن تالداي وتىرىپ, جاقىن ماڭداعى پوليتسەيدىڭ پلانشەتىنە «قاۋىپتى» جۇرگىزۋشىنىڭ جاقىن جەردە جۇرگەنى تۋرالى حابارلاما جىبەرەدى. ناتيجەسىندە پوليتسيا ارەكەت ەتەدى, - دەدى اقتوتى بورانوۆا ءىىم-دە وتكەن ءباسپاسوز ءماسليحاتىندا.
ءىىم وكىلى جول ەرەجەسىن ورەسكەل بۇزعان جۇرگىزۋشىلەر انىقتالىپ جاتقانىن جەتكىزدى.
- باعدارلامانىڭ كومەگىمەن جالعان نومىرلەردى پايدالانۋدىڭ 1,5 مىڭعا جۋىق فاكتىسى, جۇرگىزۋشى كۋالىگىنەن ايىرىلعان 6 مىڭ جۇرگىزۋشى انىقتالىپ, 8,5 مىڭ مەملەكەتتىك ءنومىر تاركىلەندى. ايىپپۇل تۇراعىنا 29 مىڭ اۆتوكولىك قاماۋعا الىندى, - دەدى اعا ينسپەكتور.
اقتوتى بورانوۆا جول قوزعالىسى ەرەجەسىن بۇزۋدى تىركەيتىن كامەرالار باسقا وڭىرلەردە دە ورناتىلاتىنىن جەتكىزدى.
- وڭىرلەردە مۇنداي كامەرالاردىڭ, ونىڭ ىشىندە «قورعاۋ» جۇيەسىنە قوسىلعان كامەرالاردىڭ جەلىسىن كەڭەيتۋ ۇسىنىلادى. بۇل كولىك جۇرگىزۋ مادەنيەتىن ارتتىرۋعا, جول ەرەجەسىن بۇزعانداردى جاۋاپقا تارتۋعا مۇمكىندىك بەرەدى, - دەدى اعا ينسپەكتور.