بۇگىن ۇكىمەت وتىرىسىندا وقۋ-اعارتۋ ءمينيسترى عاني بەيسەمباەۆ «جايلى مەكتەپ» ۇلتتىق جوباسىن ىسكە اسىرۋ بارىسى تۋرالى ايتتى, دەپ حابارلايدى Egemen.kz.
«جايلى مەكتەپ» ۇلتتىق جوباسى ەلىمىزدەگى وقۋشى ورىندارىنىڭ تاپشىلىعىن شەشۋگە, اپاتتى جانە ءۇش اۋىسىمدى مەكتەپتەر ماسەلەسىن جويۋعا باعىتتالعان. ءمينيستردىڭ ايتۋىنشا, 2024-2025 جىلدارى ەلىمىزدە 740 مىڭ ورىندىق 369 مەكتەپ سالىنادى. ونىڭ ىشىندە بيىل 217 مەكتەپ قولدانىسقا بەرىلەدى.«مەكتەپ قۇرىلىسى بىرىڭعاي ستاندارت بويىنشا جۇزەگە اسادى. 163 مەكتەپ اۋىلدىق جەرلەردە سالىنادى. بۇل ءبىلىم وشاقتارى زاماناۋي قۇرال-جابدىقتارمەن جابدىقتالادى. سونىمەن قاتار جايلى مەكتەپتەر ەرەكشە ءبىلىم بەرۋ قاجەتتىلىكتەرى بار بالالار ءۇشىن كەدەرگىسىز ورتانى ساقتايدى», دەدى ع.بەيسەمباەۆ.