انتاليادا بۇكىلالەمدىك ەتنوسپورت كونفەدەراتسياسى ۇيىمداستىرعان VI ەتنوسپورت فورۋمى بارىسىندا ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ەتنوسپورتتى حالىقارالىق ستاندارتتارعا ساي دامىتۋ تاسىلدەرىن جۇيەلەۋگە قاتىستى بىرقاتار ۇسىنىس ايتتى. يسلامبەك سالجانوۆ مەملەكەت باسشىسى قاسىم-جومارت كەمەل ۇلى توقاەۆ قازاقستاندا ۇلتتىق سپورتتى جۇيەلى دامىتۋعا ەرەكشە نازار اۋداراتىنىن اتاپ ءوتتى. ۇلتتىق سپورتپەن اينالىساتىن قازاقستان ازاماتتارىنىڭ سانى جىل سايىن ارتىپ كەلەدى.
«قازىرگى تاڭدا قاۋىمداستىققا كىرەتىن رەسپۋبليكالىق فەدەراتسيالاردىڭ جارتىسى حالىقارالىق مارتەبە الدى, كەيبىرى بۇرىننان بار حالىقارالىق ۇيىمداردىڭ قۇرامىنا ەندى. ولاردىڭ قاتارىندا اۋدارىسپاق, كوكپار, قۇسبەگىلىك, جامبى اتۋ, توعىزقۇمالاق فەدەراتسيالارى بار. بۇل قازاقستاندا ۇلتتىق سپورت تۇرلەرى دامۋدىڭ جاڭا دەڭگەيىنە قادام باسىپ, كۇن وتكەن سايىن تانىمال بولىپ كەلە جاتقانىن ايعاقتايدى», دەدى يسلامبەك سالجانوۆ.
حالىقارالىق ەتنوسپورت فورۋمى بارىسىندا ۇلتتىق سپورت قاۋىمداستىعى ەتنوسپورتتى دامىتۋعا قاتىستى بارلىق رەگلامەنت پەن راسىمدەردىڭ حالىقارالىق ستاندارتتارعا ساي بولۋى ءۇشىن بىرقاتار شارا ۇسىندى. ولاردىڭ قاتارىندا دۇنيەجۇزىلىك كوشپەندىلەر ويىندارىنىڭ نەگىزگى سپورتتىق باعدارلاماسىن بىرىزدەندىرۋ, حالىقارالىق جارىستاردىڭ بىرىڭعاي كۇنتىزبەلىك جوسپارىن جاساۋ, بۇكىلالەمدىك ەتنوسپورت كونفەدەراتسياسىمەن بىرلەسىپ الداعى 5-ءشى دۇنيەجۇزىلىك كوشپەندىلەر ويىندارىندا تورەشىلىك ەتۋ ساپاسىن ارتتىرۋ ءۇشىن ارنايى كۋرستار ۇيىمداستىرۋ جانە تاعى باسقا بار.
ەتنوسپورت سالاسىنداعى ىنتىماقتاستىقتى نىعايتۋ ماقساتىندا بۇكىلالەمدىك ەتنوسپورت كونفەدەراتسياسىنىڭ پرەزيدەنتى نەدجمەتتين بيلال ەردوعان قازاقستان ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆقا رەسمي مۇشەلىك تۋرالى سەرتيفيكاتتى تابىس ەتىپ, ەتنوسپورتتى ودان ءارى جاھاندىق دەڭگەيدە دامىتۋعا جانە بىرىكتىرۋگە ءسوزسىز سەرپىن بەرەتىن الداعى 5-ءشى دۇنيەجۇزىلىك كوشپەندىلەر ويىندارىن وتكىزۋدە ساتتىلىك تىلەدى.
سونداي-اق فورۋم بارىسىندا بۇكىلالەمدىك ەتنوسپورت كونفەدەراتسياسى مەن ءداستۇرلى سپورت تۇرلەرىنىڭ ۇلتتىق قاۋىمداستىقتارى اراسىندا ءوزارا تۇسىنىستىك تۋرالى مەموراندۋمعا قول قويىلدى. ونىڭ ماقساتى – حالىقارالىق جارىستاردى وتكىزۋ كەزىندە جاھاندىق ەتالون رەتىندە قىزمەت ەتەتىن ءداستۇرلى سپورت تۇرلەرى مەن ويىندارى ءۇشىن كونفەدەراتسيانىڭ بىرىڭعاي ەرەجەلەرىن ازىرلەۋ.
60-تان استام ەلدەن كەلگەن حالىقارالىق قاتىسۋشىلار ءۇشىن الداعى 5-ءشى دۇنيەجۇزىلىك كوشپەندىلەر ويىندارىنىڭ باعدارلاماسى تانىستىرىلدى.
فورۋم سوڭىندا ءداستۇرلى سپورت سالاسىنداعى 5-ءشى حالىقارالىق سىيلىق تابىس ەتىلدى. اتالعان سىيلىقتى ەلىمىزدەن اكادەميالىق ساناتتا – ءال-فارابي اتىنداعى قازۇۋ دەنە تاربيەسى جانە سپورت كافەدراسىنىڭ پروفەسسورى ەلەمەس ءالىمحانوۆ السا, سپورت ساناتىندا – قازاق كۇرەسىنەن سپورتشى زارينا ساريپوۆا ماراپاتتالدى.