وڭتۇستىك كورەيانىڭ پۋسان قالاسىنداعى ۇستەل تەننيسىنەن ءوتىپ جاتقان كوماندالىق الەم چەمپيوناتىن قازاقستاننىڭ ۇلتتىق قۇراماسى جەڭىسپەن باستادى.
جىگىتتەر تۇساۋكەسەر كەزدەسۋدە ساۋد ارابياسىمەن سايىسقا ءتۇستى. كيريلل گەراسيمەنكو حاليد الشارەفتى جانە الان قۇرمانعاليەۆ ابدۋلازيز ءشۋلايبيدى 3:0 ەسەبىمەن باس كوتەرتپەي ۇتسا, سول ەلدىڭ ەڭ ۇزدىك ويىنشىسى ءالي ءالحادراۆيدى جەڭۋ ءۇشىن ايدوس كەنجەعۇلوۆقا ءبىراز تەر توگۋىنە تۋرا كەلدى – 3:2. قورىتىندى ەسەپ – 3:0. بۇرىمدالارىمىز اۋسترالياعا قارسى وينادى. بۇل تارتىستا تارازى باسى بىرازعا دەيىن تەڭسەلىپ تۇردى. ءبىرىنشى باسەكەدە زاۋرەش اقاشەۆا فان تسزيان لەيدەن جەڭىلسە, سارۆينوز مىرقادىروۆا مەن اناستاسيا لاۆروۆا ءوز قارسىلاستارىن قاپى قالدىرىپ, كوماندانى العا شىعاردى. ودان كەيىن جاسىل قۇرلىقتىڭ نامىسىن قورعاپ جۇرگەن التى بىردەي وليمپياداعا قاتىسقان قىتاي قىزى سارۆينوزدى ءسۇرىندىردى. دەسەك تە شەشۋشى ويىندا زاۋرەش تاجىريبەلى ميشەل برومليeدەن باسىم ءتۇسىپ, جەرلەستەرىمىزگە جەڭىس سىيلادى. ەسەپ – 3:2.