2024 جىلعى 1 اقپانداعى جاعداي بويىنشا 1 306 ەتنيكالىق قازاق تاريحي وتانىمەن تابىسىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ملن 129,6 مىڭ ەتنيكالىق قازاق ورالدى, دەپ جازادى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
جىل باسىنان باستاپ قازاقستانعا كەلگەن قانداستاردىڭ جارتىسى (48,9%) قىتايدان, 29,6% –وزبەكستاننان, 8,3% – موڭعوليادان, 4,4% – رەسەيدەن, 7,3% - تۇرىكمەنستاننان جانە 1,5% باسقا ەلدەردەن قونىس اۋدارعان.
2024 جىلدىڭ ەكى ايىندا ەڭبەككە قابىلەتتى ەتنيكالىق قونىس اۋدارۋشىلار سانى 56,2%-دى, ەڭبەككە قابىلەتتى جاستان كىشى 33,6%-دى جانە زەينەتكەرلەر 10,2%-دى قۇراعان.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15%-ى جوعارى ءبىلىمدى, 20,2%-ى ورتا كاسىبي ءبىلىمدى, 54,6%-ى جالپى ورتا ءبىلىمدى, جانە 10,2%-ىنىڭ ءبىلىم جوق.
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى.
«قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى. ولار: اقمولا, اباي, قوستاناي, پاۆلودار, شىعىس جانە سولتۇستىك قازاقستان وبلىستارى. قونىستاندىرۋ وڭىرلەرىندە 2023 جىلعا ارنالعان قانداستاردى قابىلداۋ كۆوتاسى 2 433 ادامدى قۇرايدى. 2023 جىلعى 1 اقپانداعى جاعداي بويىنشا قونىستاندىرۋ وڭىرلەرىنە 332 قانداس قونىس اۋداردى», دەلىنگەن ۆەدومستۆو اقپاراتىندا.
ايتا كەتەيىك, جوعارى اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (258,4 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55,3-دەن 110,7 مىڭ تەڭگەگە دەيىن) مولشەرىندە.
جىل باسىنان بەرى 35 قانداسقا ءتۇرلى قولداۋ شارالارى كورسەتىلىپ, تۇراقتى جۇمىس ورنى ۇسىنىلدى.