قازاقستان پرەزيدەنتى قاتاردىڭ Power International Holding كومپانياسىنىڭ يەلەرى مۋاتاز ءال-حايات پەن رامەز ءال-حاياتتى قابىلدادى, دەپ حابارلايدى Egemen.kz اقورداعا سىلتەمە جاساپ.
كەزدەسۋدە ەكونوميكانىڭ ءتۇرلى سەكتورىنداعى ءوزارا ءتيىمدى ىنتىماقتاستىقتىڭ پەرسپەكتيۆالارى تالقىلاندى.
قاسىم-جومارت توقاەۆ تابىستى سەرىكتەستىك قازاقستان مەن قاتار اراسىنداعى ينۆەستيتسيالىق ىنتىماقتاستىقتىڭ قوزعاۋشى كۇشىنە اينالعانىن اتاپ ءوتتى.
بۇگىن مەملەكەتتىك ساپار اياسىندا بىرقاتار ماڭىزدى ينۆەستيتسيالىق كەلىسىمدەرگە قول قويىلدى. وسى رەتتە قاتاردىڭ Power International Holding كومپانياسى نەگىزگى قاتىسۋشى سانالادى.
مۋاتاز ءال-حايات پەن رامەز ءال-حايات پرەزيدەنتكە قاشاعاندا گاز وڭدەۋ زاۋىتتارىن, قىزىلوردا وبلىسىندا بۋ-گاز قوندىرعىلارىنىڭ تەحنولوگياسىنا نەگىزدەلگەن ەلەكتر ستانتسياسىن سالۋ جوسپارى جونىندە مالىمەت بەردى. سونداي-اق جاڭا كومپرەسسور ستانتسياسىن سالۋعا, بەينەۋ – بوزوي – شىمكەنت جانە اقتوبە – قوستاناي گاز قۇبىرلارىن جۇرگىزۋگە نيەت ءبىلدىردى.
مەملەكەت باسشىسى ەلىمىزدىڭ ۇزاقمەرزىمدى ەنەرگەتيكالىق قاۋىپسىزدىگىن قامتاماسىز ەتەتىن بۇل جوبالاردىڭ ەرەكشە ماڭىزعا يە ەكەنىن ايتتى. سونداي-اق Power International Holding كومپانياسىنىڭ قازاقستاننىڭ تەلەكوممۋنيكاتسيا سەكتورىنا كىرۋ جونىندەگى جوسپارىن قۇپتادى.