جامبىل اۋدانىنىڭ مىڭباەۆ اۋىلىندا تۇراتىن جارقىن باعلاەۆتىڭ شاڭىراعىندا شات-شادىمان قۋانىش. وعان اياۋلى جارى شولپان ماماشەۆانىڭ ۇشەمدى دۇنيەگە اكەلۋى سەبەپ. بۇعان دەيىن بەس بالا ءوسىرىپ وتىرعان وتباسى ەندى ءۇش سابيمەن تولىعىپ, قۋانىشىن ەسەلەدى. ءسويتىپ, اقىندار مەن باتىرلار ەلى اتانعان اۋداننىڭ التىن قۇرساق انالارى حالقىمىزدىڭ قارادومالاقتارىنىڭ قاتارىن كوبەيتتى.
وتاۋ قۇرعاندارىنا 12 جىل بولعان وتباسىنىڭ مىڭباەۆ اۋىلىنا قونىستانعانىنا ءۇش جىلدىڭ ءجۇزى بولعان.
«ون جىلعا جۋىق الماتىدا پاتەر جالداپ, كۇنىمىزدى كوردىك. سويتە ءجۇرىپ بەس بالالى بولدىق. تۇرمىستىق جاعدايىمىزعا الاڭداعان دوسىم ازامات سەرىك ۇلى وسى اۋىلدان بەس بولمەلى شاعىن ءۇي الىپ بەردى. قۇتتى قونىس بولىپ, مىنە, ۇشەمىمىز ومىرگە كەلىپ جاتىر», دەيدى ۇشەمدەردىڭ اكەسى جارقىن اقىلبەك ۇلى.
كوپبالالى وتباسىنىڭ تىرەگى جارقىن باعلاەۆ ۇزىناعاش اۋىلىنداعى ورتالىق بازاردا كارتوپ ساتىپ, بالالارىنىڭ ناپاقاسىن تاۋىپ ءجۇر. ەكى اۋىلدىڭ اراسىندا كۇندەلىكتى تاكسيمەن قاتىناپ, جۇمىس ىستەۋدىڭ وڭاي ەمەستىگىن, تاپقان تيىن-تەبەننىڭ كەيدە جولاقىسىنان دا ارتىلماي قالاتىنىن ايتىپ قالعان قاراپايىم اۋىل ازاماتىنىڭ موينىنداعى جاۋاپكەرشىلىك جۇگى تىپتەن ەسەلەنە تۇسكەنى ايتپاسا دا تۇسىنىكتى. دەسە دە ء«بىر قوزى تۋسا, ءبىر ءتۇپ جۋسان ارتىق شىعادى» دەيتىن قازاقى قالپىنان اينىماعان جارقىننىڭ قۋانىشىندا شەك جوق.
«الماتى كوپسالالى كلينيكالىق اۋرۋحاناسىنىڭ پەرزەنتحاناسىندا ەكى قىز جانە ءبىر ۇلدىڭ دۇنيەگە كەلۋى ەلىمىز ءۇشىن قۋانىشتى ءسات بولدى. ۇشەمدى ومىرگە اكەلگەن باتىر انا ەندى 8 بالانى تاربيەلەپ, ءوسىرىپ-ءوندىرىپ, قاتارعا قوسۋىنا تىلەكتەسپىز. ارينە, ۇشەمدى امان-ەسەن دۇنيەگە اكەلۋ وڭايعا سوقپادى. مامانداردىڭ كاسىبي دەڭگەيىنىڭ, بىلىكتىلىگىنىڭ ارقاسىندا, سونىمەن قاتار قولدانىستاعى جاڭا تەحنولوگيالاردىڭ كومەگىمەن سابيلەردى شيراتىپ, ۇيگە شىعۋىنا بار مۇمكىندىكتى جۇمىلدىردىق. بۇدان ءارى اۋدانداعى ارىپتەستەر سابيلەردى باقىلاۋعا الىپ, دەنساۋلىعىن قاداعالايدى», دەگەن الماتى كوپسالالى كلينيكالىق اۋرۋحاناسىنىڭ باس ديرەكتورى جۇماعالي يسمايلوۆ ۇجىم اتىنان وتباسىنا قارجىلاي كومەك كورسەتتى.
بۇدان كەيىنگى كەزەكتە جامبىل اۋدانى اكىمىنىڭ ورىنباسارى ادىلبەك قامبار ۇلى اۋداندا وتكەن جىلى 4 200 بالا ومىرگە كەلسە, ولاردىڭ ىشىندە 12 بالا ەگىز بولعانىن ايرىقشا اتادى. بيىل دا بۇل ءۇردىس ءجىبىن ۇزبەي جالعاسىپ, قاڭتار ايىندا ەكى ايەل ەگىز بالا تۋسا, ونىڭ ارتىنشا ۇشەمنىڭ ومىرگە كەلۋىن جاقسىلىققا بالادى.
«حالقىمىزدىڭ سانىن كوبەيتىپ جاتقان التىن قۇرساق انالار مەن سابيلەرىمىز امان بولسىن! اۋدان اكىمى اتىنان ۇشەمدەردىڭ جاتىن توسەكتەرى تولىق جابدىقتالىپ, دايارلانىپ قويدى. الداعى ۋاقىتتا اربالارى مەن قوسىمشا كەرەك-جاراقتارمەن قامتاماسىز ەتىلەدى», دەگەن ول اۋدان جۇرتشىلىعىنىڭ جۇرەكجاردى قۇتتىقتاۋىن جەتكىزدى.
كوپبالالى انا ۇشەم بوساناتىنىن ەستىگەن ساتتەن جامبىل اۋداندىق ورتالىق اۋرۋحاناسى دارىگەرلەرىنىڭ ەرەكشە باقىلاۋىنا الىنعان. وتىز اپتالىق مەرزىمىنە جەتكەندە جوعارى مامانداندىرىلعان مەديتسينالىق كومەك الۋ ءۇشىن الماتى كوپسالالى كلينيكالىق اۋرۋحاناسىنا اۋىستىرىلدى. دارىگەرلەردىڭ باقىلاۋىندا بولعان ايەلگە جۇكتىلىكتىڭ 32 اپتاسىندا كەسار تىلىگى جاسالىپ, سابيلەر دۇنيە ەسىگىن اشتى.
«بالالار 2 170, 1 490, 1 900 گرامم سالماقپەن دۇنيەگە كەلدى. العاشقى كۇندەرى سابيلەردىڭ جاعدايى اۋىر بولىپ, ءينۆازيۆتى ەمەس SIPAP اپپاراتىندا جاتتى. تەك جەتىنشى كۇنى انا ءوز بالالارىمەن قايتا قاۋىشتى. دارىگەر اكۋشەر-گينەكولوگتەر, نەوناتولوگ-رەانيماتولوگتەر جانە مەدبيكەلەردىڭ كومەگىمەن جاڭا تۋعان نارەستەلەردىڭ ارقايسىسى ءۇش اپتانىڭ ىشىندە 500-700 گرامعا دەيىن سالماق جينادى», دەيدى جوعارى ساناتتى اكۋشەر-گينەكولوگ گۇلجاحان جۇمادۋلاەۆا.
باقىتتى اتا-انالار ومىرگە ىڭگالاپ كەلگەن قىزدارىنا گۇلناز جانە ءدىلناز دەگەن ەسىم بەرسە, ال ۇلدارىن تەمىرلان دەپ اتاۋدى ءجون كورىپتى. كوپبالالى انا شولپان ماماشەۆا بۇعان دەيىن دە 2020 جىلى ەگىز بالانى ومىرگە اكەلگەن. الايدا اي-كۇنىنە جەتپەي, شالا تۋعان شارانانىڭ ءبىرى شەتىنەپ كەتكەن.
«بۇل جولى مەن جۇكتىلىككە مۇقيات دايىندالدىم جانە بارلىق قاجەتتى ەم-شارالاردان الدىن الا ءوتتىم. سابيلەر مەرزىمىنەن بۇرىن دۇنيەگە كەلدى, سوندىقتان جاعدايى اۋىر بولدى. دارىگەرلەردىڭ بىلىكتىلىگىنىڭ ارقاسىندا امان-ەسەن شيراپ قالدىق. بوسانعاننان كەيىنگى ءۇشىنشى اپتادا پەرزەنتحانادان شاڭىراعىما شىعىپ بارامىن. ماعان قولۇشىن بەرگەن اق جەلەڭدى ابزال جاندارعا, دوس-جاران, تۋىستارىما ريزاشىلىعىمدى بىلدىرەمىن», دەيدى ۇشەمدى دۇنيەگە اكەلگەن كوپبالالى باتىر انا.
التىن قۇرساق انانىڭ تۇلا بويى تۇڭعىش قىزى ارنۇر – 10 جاستا, 5-سىنىپتا وقيدى. ودان كەيىنگى نۇريسلام – 2, ازامات 1-سىنىپتا ءبىلىم الىپ ءجۇر. ەگىزدىڭ سىڭارى بولعان بەرىكبول مەن 3 جاسار بەيبارىس تا ىزدەرىنەن ىلەسكەن ۇشەمدەردى كورۋگە اسىق. ءتۇرلى-ءتۇستى شارلارىن كوتەرىپ, انالارىنىڭ الدىنان قۋانا شىققان ولار «بوپەمىزدى ءوزىمىز تەربەپ, قارايمىز» دەپ ءماز. «بالالى ءۇي – بازار» دەگەندەي, وسىنداي كول-كوسىر قۋانىش ءار شاڭىراققا جۇعىستى بولسىن دەگەن تىلەك ءبىزدىڭ دە جۇرەك تۇكپىرىمىزدە لۇپىلدەدى.
ەسكە سالساق, بىلتىر الماتى وبلىسىندا 26 825 بالا دۇنيەگە كەلگەن, ونىڭ ىشىندە 233-ءى ەگىزدەر جانە ءبىر ۇشەم بار.
الماتى وبلىسى