مەملەكەت باسشىسىنىڭ جارلىعىمەن ولجاس اباي ۇلى بەكتەنوۆ قازاقستان رەسپۋبليكاسىنىڭ پرەمەر-ءمينيسترى بولىپ تاعايىندالدى, ول بۇرىنعى اتقارعان لاۋازىمىنان بوساتىلدى. بۇل تۋرالى اقوردا ءباسپاسوز قىزمەتى حابارلادى, دەپ جازادى Egemen.kz.
ەسكە سالايىق, بۇگىن پرەزيدەنت قاسىم-جومارت توقاەۆتىڭ قاتىسۋىمەن پارلامەنت ءماجىلىسىنىڭ پلەنارلىق وتىرىسى ءوتتى.
مەملەكەت باسشىسى قاسىم-جومارت توقاەۆ بۇل كانديداتۋرانى اۋەلى «Amanat» پارتياسى ۇسىنعانىن جانە اتالعان ۇسىنىسپەن كەلىسكەنىن ايتتى.
«ولجاس بەكتەنوۆ – تاجىريبەلى مەملەكەتتىك قىزمەتشى. ونى قازاقستان ەكونوميكاسى جانە باسقا دا سالالارى بويىنشا ءبىلىم مول, ۇيىمداستىرۋ قابىلەتى جوعارى, ءتارتىپتى, ادال, ەڭبەكقور ازامات. سوندىقتان ەل ەكونوميكاسىنىڭ الدىندا تۇرعان ماقساتتى جۇزەگە اسىرۋعا قابىلەتى جەتەدى دەپ ويلايمىن. سىزدەر كەلىسىم بەرگەن جاعدايدا, ۇكىمەتتىڭ جاڭا قۇرامى تابىستاعانىمىزدى ساقتاي وتىرىپ, قازاقستاندى ساپالى دامۋ جولىنا شىعارۋ ءۇشىن بار كۇش-جىگەرىن سالادى دەپ سەنەمىن. ەرتەڭ ۇكىمەتتىڭ كەڭەيتىلگەن جيىنى وتەدى. سول كەزدە جاڭا قۇرامنىڭ الدىندا تۇرعان جاڭا مىندەتتەرگە توقتالامىن. ەندى ۇسىنىلعان كانديداتۋرا بويىنشا پىكىرلەرىڭىزدى ايتىپ, داۋىس بەرسەڭىزدەر», دەدى پرەزيدەنت قاسىم-جومارت توقاەۆ.
پلەنارلىق وتىرىستا قولدانىستاعى زاڭناماعا سايكەس, ۇسىنىلعان كانديداتۋرانى ماجىلىستەگى پارتيالاردىڭ فراكتسيالارى تالقىلاپ, ءبىر اۋىزدان شەشىم قابىلدادى.
ولجاس بەكتەنوۆ 1980 جىلى الماتى قالاسىندا دۇنيەگە كەلگەن. ەڭبەك جولىن 2002 جىلى الماتى قالاسى ادىلەت باسقارماسى ءبولىمىنىڭ باس مامانى رەتىندە باستاعان.
2018-2019 جىلدارى – قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى.
2019-2022 جىلدارى – قر سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى.
2022 جىلدىڭ اقپانىنان 2023 جىلدىڭ ساۋىرىنە دەيىن – قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى.
2023 جىلدىڭ 3 ساۋىرىندە مەملەكەت باسشىسىنىڭ جارلىعىمەن قازاقستان رەسپۋبليكاسى پرەزيدەنتى اكىمشىلىگىنىڭ باسشىسى بولدى.