سىبايلاس جەمقورلىققا قارسى ءىس-قيمىل اگەنتتىگى مەملەكەت باسشىسىنىڭ تاپسىرماسىن ورىنداۋ بارىسىندا شىمكەنت قالالىق تۇرعىن ءۇي باسقاراماسىنا تەكسەرۋ جۇرگىزدى. تەكسەرۋ بارىسىندا باسقارما باسشىسىنىڭ مىندەتىن اتقارۋشى سەيسميكالىق قاۋىپسىزدىكتى قامتاماسىز ەتۋگە بولىنگەن بيۋدجەت قاراجاتىن جىمقىرعانى بەلگىلى بولدى, دەپ جازادى Egemen.kz.
باسقارما باسشىسىنىڭ م.ا. قارجى جىمقىرۋ ارەكەتىن الدىن الا ءبىر توپ اداممەن ءسوز بايلاسۋ ارقىلى جۇزەگە اسىرعان. قازىرگى تاڭدا سوتقا دەيىنگى تەرگەۋ جۇرگىزىلىپ جاتىر.
«ول قالانىڭ 216 تۇرعىن ءۇيىنىڭ سەيسميكالىق تۇراقتىلىعىن تەحنولوگيالىق تەكسەرۋ جۇمىسىن ورىنداۋعا بولىنگەن اسا ءىرى مولشەردەگى قارجىنى ءبىر توپ اداممەن الدىن الا ءسوز بايلاسۋ ارقىلى جىمقىردى دەپ ايىپتالىپ وتىر», دەلىنگەن شىمكەنت قالاسى بويىنشا سىبايلاس جەمقورلىققا قارسى ءىس-قيمىل دەپارتامەنتىنىڭ اقپاراتىندا.
شەنەۋنىكتەر كەلتىرگەن زالالدىڭ بولجامدى سوماسى - 120 ميليون تەڭگە.
سىبايلاس جەمقورلىققا قارسى قىزمەت اگەنتتىگى شەنەۋنىك قازىعۇرت اۋىلىنداعى مونشا كەشەنىن سالۋ ارقىلى جىمقىرىلعان قاراجاتتى زاڭداستىردى دەگەن نۇسقا تەكسەرىلەتىنىن مالىمدەدى. ايتا كەتسەك, اتالمىش مونشا كەشەنى كۇدىكتىنىڭ اناسىنا راسىمدەلگەن.
كۇدىكتى شىمكەنت قالاسى پوليتسياسىنىڭ ۋاقىتشا يزولياتورىنا قاماۋعا الىندى.