تۇپقاراعان اۋدانىنداعى سايىن شاپاعاتوۆ اۋىلى تۇرعىندارىنىڭ سانى ارتىپ كەلەدى. سوندىقتان اتالعان اۋىلدىق وكرۋگتە حالىق تۇرمىسىنا قاجەتتى نىسانداردى ىسكە قوسۋ كۇن تارتىبىندە تۇر. جۋىردا ەل مەن جەردى جاۋدان قورعاعان حالىق باتىرى سۇيىنعارا ۇرگەنىشباي ۇلى اتىنداعى جاڭا سپورت عيماراتى پايدالانۋعا بەرىلىپ, جەرگىلىكتى تۇرعىنداردى قۋانىشقا كەنەلتتى.
«سۇيىنعارا باتىر» سپورت كەشەنىندە قازاقشا كۇرەس, جەكپە-جەك, دزيۋدو, كوركەم گيمناستيكا, ەركىن كۇرەس, توعىزقۇمالاق, شاحمات, زۋمبا جانە ستريپ پلاستيكا سىندى ت.ب. ۇيىرمەلەر جۇمىس ىستەيدى. اتالعان ءىس-شاراعا قاتىسقان ماڭعىستاۋ وبلىسى اكىمىنىڭ ورىنباسارى ز.ەسبەرگەنوۆا كوپشىلىكتى جاڭا نىساننىڭ اشىلۋىمەن قۇتتىقتاپ, وڭىردە سپورت سالاسىن دامىتۋ باعىتىندا اتقارىلىپ جاتقان جۇمىستارعا توقتالدى.
– جاڭادان اشىلعان «سۇيىنعارا» جەكەمەنشىك نىسانىندا بالالار مەن جاسوسپىرىمدەردىڭ سپورتپەن شۇعىلدانۋى ءۇشىن بارلىق جاعداي جاسالعان. بۇل عيمارات اۋىلدىڭ بارلىق بالالارى ءۇشىن قولجەتىمدى بولادى. سونداي-اق سپورت كەشەنى ىسكە قوسىلسا, اۋىل سپورتىنىڭ دامۋىنا ۇلكەن سەپتىگىن تيگىزبەك. ەل پرەزيدەنتى قاسىم-جومارت توقاەۆ ءار جولداۋىندا سپورتتى دامىتۋ باعىتىندا ناقتى اتقارىلۋعا ءتيىس جۇمىستاردى ايتىپ كەلەدى. وسىنداي نىسانداردىڭ اشىلۋى وڭىرىمىزدە جۇيەلى جۇمىستار جۇرگىزىلىپ جاتقانىن كورسەتەدى, دەدى ەسبەرگەنوۆا.
ءوز كەزەگىندە اۋىلدىقتار ريزاشىلىعىن ءبىلدىرىپ, جىلى لەبىزدەرىن جەتكىزدى.
– بۇگىن اۋىلىمىزدا جاڭا سپورت مەكتەبى اشىلىپ جاتقانىنا وتە قۋانىشتىمىز. بىزدە مىقتى سپورتشىلار بار. الداعى ۋاقىتتا وسى جەردە جاتتىققان بالالار ءارى قاراي ۇلكەن سپورتتا جەتىستىككە جەتەرىنە سەنەمىز, دەيدى اۋىل تۇرعىندارى.
تۇپقاراعان اۋدانىندا بۇقارالىق سپورتتى دامىتۋ باعىتىندا وزگە دە جوسپارلار بار. اتاپ ايتساق, الداعى ۋاقىتتا سايىن شاپاعاتوۆ اۋىلدىق وكرۋگىنەن 160 ورىندىق سپورت كەشەنىنىڭ قۇرىلىسىن سالۋ جانە قىزىلوزەن اۋىلىنان فۋتزال سالۋ كوزدەلىپ وتىر.
ماڭعىستاۋ وبلىسى