وسى جىلى داڭقتى باتىرلارىمىز ساعادات نۇرماعامبەتوۆ پەن راحىمجان قوشقارباەۆتىڭ 100 جىلدىعىن جەرگىلىكتى اتقارۋشى ورگاندارمەن جانە ءبىلىم باسقارماسىمەن بىرلەسىپ كەڭىنەن اتاپ ءوتۋ قاجەت. بۇل تۋرالى اباي وبلىسى قورعانىس ىستەر جونىندەگى دەپارتامەنتىنىڭ باستىعى, پولكوۆنيك نىعمەت احمەت ۇلى ارداگەرلەر ۇيىمدارىنىڭ توراعالارىمەن وتكەن كەڭەستە ايتتى, دەپ حابارلايدى Egemen.kz اباي وڭىرلىك اسكەري گارنيزونىنا سىلتەمە جاساپ.
وتكەن جىل قورىتىندىلانىپ, الداعى 2024 جىلى اتقارىلاتىن ءىس-شارالار تالقىلانعان جيىندا نىعمەت احمەت ۇلى ارداگەرلەر ۇيىمدارىنىڭ ەسەبىن تىڭداپ, جوسپارعا سايكەس اتقارىلاتىن تاپسىرمالار جايىنا توقتالدى. اباي وبلىسى قورعانىس ىستەر جونىندەگى دەپارتامەنتىنىڭ باستىعى كوكتەمگى جانە كۇزگى مەرزىمدەگى اسكەري قىزمەتكە شاقىرۋ ناۋقانىنا بەلسەنە قاتىسۋ, «ايبىن» حالىقارالىق اسكەري-پاتريوتتىق جاستار جيىنىنا ساپالى دايىندىقتى ۇيىمداستىرۋ مەن «انالار جۇرەگى» ساربازدار انالارى رەسپۋبليكالىق ۇيىمىمەن بىرلەسىپ تىعىز قارىم-قاتىناستا جۇمىس ىستەۋ كەرەك ەكەنىن اتاپ ءوتتى.
بىلتىر وبلىستا ارداگەرلەردىڭ قاتىسۋىمەن 250-دەن استام اسكەري-پاتريوتتىق ءىس-شارالار ۇيىمداستىرىلعان بولاتىن. جىل سايىنعى ءداستۇرلى تۇردە وتەتىن «ايبىن» رەسپۋبليكالىق اسكەري-پاتريوتىق جاستار جيىنىنا اسكەري-پاتريوتتىق كلۋبتاردىڭ, «جاس ۇلان» مەكتەپ تاربيەلەنۋشىلەرىنىڭ جانە اسكەري قىزمەتشىلەرىنىڭ بالالارى قاتىسىپ جاتىر. وتكەن جىلعى جيىن حالىقارالىق فورماتتا وتكىزىلىپ, وبلىستىڭ نامىسىن قورعاعان «اباي قىراندارى» اسكەري-پاتريوتتىق كلۋبى جوعارى ناتيجە كورسەتتى. سونىمەن قاتار جىل سايىن 1 قىركۇيەكتە ءوڭىرىمىزدىڭ بارلىق مەكتەپتەرىندە ءبىلىم كۇنىنە ارنالعان «ەرلىك ساباقتارى» وتكىزىلىپ جاتىر.
جالپى, اباي وبلىسىندا 300-دەن استام اسكەري-پاتريوتتىق كلۋبتار 7 مىڭنان استام بالانى قامتىسا, 70-تەن استام «جاس سارباز» سىنىبىندا 1350 بالا تاربيە الىپ ءجۇر. ال ءۇش «Smart Sarbaz» ۇيىرمەسىندە 63 بالا ءبىلىم الادى ەكەن. اباي وبلىسى قورعانىس ىستەر جونىندەگى دەپارتامەنتى جەرگىلىكتى اتقارۋشى ورگاندارمەن, جالپى ءبىلىم بەرەتىن مەكەمەلەرىمەن, قوعامدىق ۇيىمدارمەن جانە ارداگەرلەرمەن جوعارى دارەجەدە بىرلەسە جۇمىس ناتيجەسىن كورسەتىپ ءجۇر.