ۇكىمەت ەلىمىزدىڭ ۆەتەريناريالىق قىزمەتىن كۇشەيتۋگە ءوز رەزەرۆىنەن 3,8 ملرد تەڭگە ءبولدى. پرەمەر-مينيستر ءاليحان سمايىلوۆ ءتيىستى قاۋلىعا قول قويدى, دەپ جازادى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
«قاراجات ۆەتەريناريالىق زەرتحانالاردى دالدىگى جوعارى قۇرىلعىمەن – حالىقارالىق ۇسىنىمدار جانە Codex Alimentarius ەرەجەلەرى مەن تالاپتارىنا ساي كەلەتىن سۇيىق حروماتوگرافپەن جابدىقتاۋعا باعىتتالادى.
بۇل ۆەتەريناريا سالاسىندا ءدال جانە ناقتى زەرتتەۋلەر جۇرگىزۋگە مۇمكىندىك بەرىپ, ەلدىڭ ازىق-ت ۇلىك قاۋىپسىزدىگىن قامتاماسىز ەتەدى. تيىمدىلىگى جوعارى سۇيىق حروماتوگراف تاعام ونىمدەرىندەگى زياندى زاتتاردىڭ بولماشى ىزدەرىن انىقتاۋعا مۇمكىندىك بەرەدى. ونى قولدانۋ حالىقتىڭ دەنساۋلىعىن تاعام ارقىلى تارالاتىن قاۋىپتى اۋرۋلاردان قورعاۋعا ەلەۋلى ۇلەس قوسادى. سونىمەن قاتار جاڭا قۇرىلعى بۇگىندە الەمدەگى ونداعان ەلگە تاۋارلارىن ەكسپورتتاپ جۇرگەن وتاندىق وندىرۋشىلەرگە سىرتقى نارىقتىڭ قاتاڭ تالاپتارىنا سايكەس بولۋىنا مۇمكىندىك بەرەتىنى» جازىلعان اقپاراتتا.
الداعى ۋاقىتتا شەتەلدەن جەتكىزىلەتىن ونىمدەرگە باقىلاۋ كۇشەيتىلەدى, ۆەتەريناريالىق تالاپتاردى بۇزۋ فاكتىلەرى انىقتالعان جاعدايدا جانۋارلاردان تارايتىن اۋرۋلاردان قورعاۋ شارالارى دا جەدەل جۇزەگە اسىرىلادى.
قاۋلى ازىق-ت ۇلىك قاۋىپسىزدىگىن قامتاماسىز ەتۋ جانە حالىقتىڭ دەنساۋلىعىن ساقتاۋ جولىنداعى ماڭىزدى قادام سانالىپ وتىر.