قاراعاندى وبلىسىنا قاراستى بوتاقارا كەنتىندە 12 پاتەرلى ۇيدە جارىلىس بولىپ, 2 ادام قازا تاپقان ەدى. اۋدان اكىمى زارداپ شەككەندەرگە كومەك كورسەتىلەتىنىن مالىمدەدى, دەپ جازادى Egemen.kz.
جارىلىس سالدارىنان بولعان زالالدى ارنايى كوميسسيا انىقتايدى. اۋدان باسشىسى بارلىعىنا ءتيىستى كومەك كورسەتىلەتىنىن ايتتى.
«قازا تاپقانداردىڭ تۋىستارىنا كوڭىل ايتامىز. ولاردىڭ وتباسىلارىنا كومەك كورسەتىلەدى. ءبىز زالالدى باعالاۋمەن اينالىساتىن كوميسسيا قۇرامىز. ەشكىمدى پروبلەماسىمەن جالعىز قالدىرمايمىز. جەرگىلىكتى اتقارۋشى ورگان جەرگىلىكتى سيپاتتاعى توتەنشە جاعداي جاريالادى», دەدى اۋدان اكىمى ابىلاي سۇلتانعالي.
جارىلىس بولعان ءۇيدىڭ تۇرعىندارى ۋاقىتشا تۋىس-تۋعانىنىڭ ۇيىنە ورنالاستىرىلعان. قازىر وقيعا ورنىندا جەدەل شتاب جۇمىس ىستەپ جاتىر.
«ۇيىندىلەر تازارتىلدى. جەرگىلىكتى اتقارۋشى ورگاندار بارلىق قاجەتتى تەحنيكانى ۋاقتىلى ۇسىندى, سونىڭ ارقاسىندا بەس ادام قۇتقارىلدى. ادامدار ۇيىندىلەردىڭ استىندا, پليتالاردىڭ استىندا قالىپ قويعان. كراندار مەن ءۇش ەكسكاۆاتور تارتىلدى. قازىر تجد مەن پوليتسيا قىزمەتكەرلەرى تەكسەرۋ جۇرگىزىپ جاتىر. جارىلىستىڭ الدىن-الا سەبەبى — گاز باللونىنىڭ دۇرىس جۇمىس ىستەمەۋى. گاز باللونى سۋىقتان جىلى بولمەگە كىرگىزىلگەن. بولعان وقيعاعا كىم كىنالى ەكەنىن قۇقىق قورعاۋ ورگاندارى انىقتايدى», دەدى قاراعاندى وبلىسى تجد باستىعىنىڭ ورىنباسارى امانبەك بەيسەمباەۆ.
بۇعان دەيىن ءبىز ءۇيىندى استىنان 2 ادامنىڭ ءمايىتى تابىلىپ, 5 تۇرعىن قۇتقارىلعانىن حابارلاعان ەدىك.