قازاقستاننىڭ اكادەميالىق ادالدىق ليگاسى حالىقارالىق اكادەميالىق ادالدىق ورتالىعىنىڭ (ICAI - International Center for Academic Integrity) مۇشەسى بولدى, دەپ جازادى Egemen.kz.
بۇعان دەيىن Maqsut Narikbayev University (MNU) ICAI مۇشەلىگىن العان قازاقستانداعى العاشقى ۋنيۆەرسيتەت اتانعان. بۇگىن 2024 جىلدىڭ 26 قاڭتارىندا اكادەميالىق ادالدىق ليگاسى دا حالىقارالىق اكادەميالىق ادالدىق ورتالىعىنا (ICAI) قوسىلدى.
«بۇل كەلىسىم قازاقستان رەسپۋبليكاسىنىڭ اكادەميالىق قاۋىمداستىعى ءۇشىن اسا ماڭىزدى. اتالعان كەلىسىم ءبىلىم بەرۋ ستاندارتتارىن جاقسارتۋعا, ۋنيۆەرسيتەتتەردىڭ ماڭىزدى ناتيجەلەرگە قول جەتكىزۋىنە قولداۋ كورسەتىپ, جاڭا كوكجيەكتەردى اشادى», دەدى قر اكادەميالىق ادالدىق ليگاسىنىڭ جوبالىق كەڭسەسىنىڭ باسشىسى نۇرگۇل ماحانباەۆا.
اكادەميالىق ادالدىق ليگاسىنىڭ جوبالىق كەڭسەسى ليگا مۇشەلەرىن جانە قر جوعارى وقۋ ورىندارىن اكادەميالىق ادالدىقتى قولداۋ ءۇشىن ICAI قاتارىنا قوسىلۋعا شاقىرادى.
ICAI-گە مۇشە بولا وتىرىپ, جوو-ى وزىق زەرتتەۋ ادىستەمەلەرىنە قول جەتكىزىپ, الەمدەگى ۋنيۆەرسيتەتتەرمەن تاجىريبە الماسىپ, اكادەميالىق ادالدىقتى دامىتۋ ءۇشىن قوسىمشا ءبىلىم بەرۋ رەسۋرستارىمەن قامتاماسىز ەتىلەدى. سونىمەن قاتار ICAI-عا مۇشە ۋنيۆەرسيتەتتەر حالىقارالىق سەرىكتەستىكتەرگە, ستۋدەنتتەر الماسۋعا جانە بىرلەسكەن عىلىمي جوبالار جاساۋعا مۇمكىندىك الادى. سونداي-اق ICAI ايماقتارداعى ۋنيۆەرسيتەتتەر اراسىندا ءبىلىم الماسۋعا ىقپال ەتەتىن Networking Consortia ۇسىنادى.
قازاقستانداعى جوعارى وقۋ ورىندارى ICAI-گە قوسىلسا, وندا ولار بىرلەسىپ ICAI Central ASIA CONSORTIUM قۇرا الادى. ناتيجەسىندە ەلىمىزدىڭ جوو-ىندا ءبىلىم ستاندارتتارى ارتىپ, تاجىريبە الماسۋ ءۇشىن بىرەگەي كەڭىستىك قالىپتاستىرۋ مۇمكىندىگى ارتادى.