تالدىقورعانداعى كوركەمونەر گالەرەياسىندا «Jetisu book fair» كىتاپ جارمەڭكەسى باستالدى. وندا «Ziyat», «اتامۇرا», «اسىل قازىنا» سياقتى كىتاپ دۇكەندەرى مەن جەرگىلىكتى اقىن-جازۋشىلار ەڭبەكتەرىن ساتىلىمعا شىعاردى. سونداي-اق جيىن اياسىندا جازۋشى قانات تىلەۋحاننىڭ «شاتىرداعى ايەل» كىتابىنىڭ تۇساۋكەسەر ءراسىمى ءوتتى.
اتالعان جارمەڭكەدە الەم جانە قازاق ادەبيەتى كلاسسيكتەرىنىڭ شىعارمالارى, بالالارعا ارنالعان ەرتەگىلەر مەن ەنتسيكلوپەديالار, پۋبليتسيستيكالىق, موتيۆاتسيالىق ەڭبەكتەر دە بار. مادەني ءىس-شارانىڭ اشىلۋ سالتاناتىنا قاتىسقان وبلىس اكىمىنىڭ ورىنباسارى مارلەن كولباەۆ كىتاپتىڭ ءمان-ماڭىزىنا توقتالدى.
«ۇرپاق تاربيەسىندە, قوعامنىڭ دامۋىندا كىتاپتىڭ ءرولى زور. سوندىقتان كىتاپ وقۋ مادەنيەتىن قالىپتاستىرۋ مەن ناسيحاتتاۋ, قازاق ادەبيەتىن دامىتۋعا قولداۋ جاساۋ – ءبىزدىڭ ورتاق مىندەتىمىز. ادام ومىردە ءوز ورنىن تاپقىسى كەلسە, قانداي دا ءبىر جەتىستىككە جەتەمىن دەسە, ەڭ الدىمەن كىتاپ وقۋى كەرەك. بۇگىنگى جارمەڭكەنى جازعى مەزگىلدى كۇتپەي, جىلدىڭ باسىنان باستاپ كەتتى. ەندى بۇل كىتاپتاردى باسقا اۋدان-قالالارعا دا جەتكىزەتىن بولامىز», دەدى م.كولباەۆ.
ءىس-شاراعا ارنايى كەلگەن مادەنيەت جانە اقپارات ءمينيسترىنىڭ كەڭەسشىسى سەرىك سارىباي ءوز سوزىندە جەتىسۋ كىتاپحاناسى سەرياسىمەن جارىق كورگەن كىتاپتاردىڭ بىرنەشە داناسىن ۇلتتىق اكادەميالىق كىتاپحانانىڭ قورىنا تاپسىرىپ, كىتاپتاردىڭ PDF فورماتتاعى نۇسقاسىن kazneb.kz سايتىنا بەرۋ كەرەكتىگى تۋرالى ۇسىنىسىن جەتكىزدى. ال جازۋشىلار وداعى توراعاسىنىڭ ورىنباسارى بەيبىت سارىباي تسيفرلىق تەحنولوگيانىڭ قانشالىقتى قارقىندى دامىعانىنا قاراماستان, كىتاپ ادامزاتتىڭ ەڭ باستى سەرىگى بولىپ قالا بەرەتىنىن ايتتى.
«وتكەن جىلى 13 كىتاپتىڭ تۇساۋىن كەستىك. بۇل كىتاپتار دا بۇگىن وسى جارمەڭكەدە وقىرمانعا ۇسىنىلىپ وتىر. بيىلعى جىلى دا بۇل يگى ءىس جالعاسادى. بۇل رەتتە جەتىسۋ تاريحىنا جانە ولكەتانۋعا قاتىستى كىتاپتار شىعارۋعا باسىمدىق بەرگەلى وتىرمىز», دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ.
كىتاپ جارمەڭكەسىندە ءوز تۋىندىلارىن ساتىلىمعا ۇسىنعان جەرگىلىكتى اقىن-جازۋشىلار, جۋرناليستەر مەن سۋرەتشىلەر اراسىندا اتاپ ايتقاندا ءنۇسىپباي ءابدىراحىم, امىرە ءارىن, جاقان باريمبەكوۆ, ساعىنىش نامازشاموۆا, گۇلباقىت قاسەن, جانگەلدى نەمەرەباي, سامات سليامعازين, قاجەت انداس, ازامات نۇرمۇحان بار.
كىتاپ جارمەڭكەسىن وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن س.سەيفۋللين اتىنداعى كىتاپحانا وتكىزىپ جاتىر. جارمەڭكە 29 قاڭتارعا دەيىن جالعاسادى. ءىس-شارا اياسىندا «Muzycal party» كلاسcيكالىق مۋزىكا كەشى, «سان سۇراققا ساياحات» ۆيكتورينالىق ويىندار جانە «بيبليو سپورت» الاڭىندا توعىزقۇمالاق جانە شاحمات ويىندارى ۇيىمداستىرىلادى.