قادىرىن بىلگەنگە التىن قۇيما سەنىمدى ينۆەستيتسيا قۇرالى بولا الادى. ونىڭ نارىقتاعى وتىمدىلىگىنىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە سول مەزەتتە اقشاسىن تولەي وتىرىپ, التىن قۇيمالاردى كەرى ساتىپ الا الاتىندىعىندا. وسىعان قىزىقتى ما ەكەن, بىلتىر ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتەرىندە جالپى سالماعى 1,6 توننا بولاتىن 38 729 التىن قۇيما ساۋدالانىپتى.
نەگىزىندە ۇلتتىق بانك بۇل باعدارلامانى 2017 جىلى ىسكە قوسقان بولاتىن. سودان بەرى جالپى سالماعى 5,4 تونناعا جۋىق 151 574 التىن قۇيما ساتىلعان.
الۋشىلارعا التىن قۇيما بەس ءتۇرلى سالماقتا ۇسىنىلادى: 5, 10, 20, 50 جانە 100 گ. 2021 جىلى ساتىپ الۋشىلار اراسىندا ەڭ كوپ سۇرانىسقا يە بولعان ءتۇرى – 100 گرامدىق قۇيما. ساتىلعان قۇيمالار اراسىنداعى ونىڭ ۇلەسى – 28%, ياعني 10 910 دانا. ودان كەيىن 5 گرامدىق قۇيما سۇرانىسقا يە, 9 795 دانا (25%) ساتىلدى. 10 گرامدىق قۇيمادان 9 409 دانا (24%), 50 گرامدىق قۇيمادان 4 818 دانا (13%), 20 گرامدىق قۇيمادان 3 797 دانا (10%) ساتىلدى. التىن قۇيمالار الماتى, استانا, شىمكەنت قالالارىندا كوپ ساۋدالانىپتى.
باعدارلاما باستالعالى ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتەرى جالپى سالماعى 737 كيلو بولاتىن 28 156 التىن قۇيمانى كەرى ساتىپ العان. بۇل – جالپى ساتىلعان قۇيمالاردىڭ 19%-ى. ولار كەرى ساتىپ العان التىن قۇيمالاردىڭ بارلىعى دەرلىك ۇلتتىق بانكتىڭ فيليالدارى ارقىلى حالىققا قايتارىمسىز تالاپپەن ساتىلادى. ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى, ميكروماتىن جانە جيەگى بار) جانە ارنايى قوراپقا سالىنىپ شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ, سونداي-اق ساپا سەرتيفيكاتى بولىپ سانالادى. سوندىقتان التىن قۇيمانى ۇقىپتى ساقتاپ, قورابىن بۇلدىرمەۋگە كەڭەس بەرىلەدى.
قازىر التىن قۇيمالاردى Halyk Bank, ەۋرازيالىق بانك, Jusan Bank, تسەنتركرەديت بانكى, سونداي-اق جەكەلەگەن بانكتىك ەمەس ايىرباستاۋ پۋنكتەرىنەن ساتىپ الىپ, كەرى ساتۋعا بولادى.