سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسىندا بولدى. تالقىلانعان نەگىزگى تاقىرىپتاردىڭ ءبىرى – مەملەكەتتىڭ الەۋمەتتىك-ەكونوميكالىق دامۋى ءۇشىن دەموگرافيالىق ءوسۋدىڭ ماڭىزى.
«بالا تۋدىڭ كوبەيۋى مەن ءولىم-ءجىتىمنىڭ ازايۋى حالىق سانىنىڭ ارتا تۇسۋىنە – تۇراقتى دەموگرافيالىق وسۋگە الىپ كەلەدى, بۇل ەل ەكونوميكاسىنىڭ دامۋىنا جانە حالىقتىڭ ءال-اۋقاتىنىڭ جوعارىلاۋىنا ىقپال ەتەدى. ءبىزدىڭ ويىمىزشا, ۇكىمەت قانا ەمەس, وسى ماسەلەگە تىكەلەي قاتىسى بار ەلىمىزدەگى بارلىق مەملەكەتتىك ورگاندار, وسى سالانىڭ ءاربىر مامانى ەلىمىزدىڭ قازىرگى دەموگرافيالىق جاعدايداعى باسەكەگە قابىلەتتىلىگىن ارتتىرۋ جونىندە جۇيەلى جۇمىس جۇرگىزۋگە مىندەتتى», دەدى نۇرتورە ءجۇسىپ.
UNFPA-نىڭ حالىقتى دامىتۋ جانە گەندەرلىك ماسەلەلەر جونىندەگى ۇلتتىق باعدارلاماسىنىڭ قازاقستانداعى ەلدىك كەڭسەسىنىڭ وكىلى عازيزا مولداقۇلوۆا بەلسەندى جانە سالاۋاتتى ۇزاق ءومىر ءسۇرۋ ءبىزدىڭ قوعام دامۋىنىڭ ماڭىزدى نەگىزى بولۋى ءتيىس ەكەنىن اتاپ ءوتتى. كەزدەسۋ بارىسىندا قازاقستاننىڭ دەموگرافيالىق, الەۋمەتتىك, ەكونوميكالىق, مادەني-تاريحي ەرەكشەلىكتەرىن ەسكەرە وتىرىپ, باسقا مەملەكەتتەردىڭ تاجىريبەسىن پايدالانۋدىڭ ماڭىزدىلىعى تالقىلاندى.
سەنات كوميتەتى اتالعان كەزدەسۋدى «دەموگرافيالىق ءوسۋ – ۇلتتىڭ باسەكەلەستىك ارتىقشىلىقتارىنىڭ نەگىزى» تاقىرىبىنا ارنالعان ۇكىمەت ساعاتىنا دايىندىق اياسىندا ۇيىمداستىرىپ وتىر.