قازاقستان مەن وزبەكستان وقۋ ورىندارىنىڭ كەلىسىمى اياسىندا بيىل اقپان ايىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ ءبىرىنشى كۋرس ستۋدەنتتەرى تاشكەنتكە وقۋعا بارادى.
بىلتىر قازاق ۇلتتىق اگرارلىق زەرتتەۋ ۋنيۆەرسيتەتى مەن «تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى» اراسىندا «جول كارتاسى» ازىرلەنگەن بولاتىن. بۇل ماڭىزدى قۇجاتتى وزبەكستاننىڭ جوعارى ءبىلىم, عىلىم جانە يننوۆاتسيا مينيسترلىگى مەن ەلىمىزدىڭ اۋىل شارۋاشىلىعى مينيسترلىگى بەكىتىپ, قولداۋ بىلدىرگەن.
«جول كارتاسىن» جۇزەگە اسىرۋعا بايلانىستى جاز ايىندا الماتىعا ارنايى كەلگەن «تياشمي» عزۋ عىلىمي جۇمىس جانە يننوۆاتسيالار جونىندەگى پرورەكتورى توحير سۇلتونوۆپەن سۋ شارۋاشىلىعى ماماندارىن بىرلەسە دايارلاۋدىڭ جوسپارى بەكىتىلىپ, عىلىمي جانە ءبىلىم بەرۋ ينفراقۇرىلىمىن جاساقتاۋدىڭ العىشارتى قابىلداندى.
قازNARU باسقارما توراعاسى-رەكتور, ۇعا ۆيتسە-پرەزيدەنتى, اكادەميك اقىلبەك كۇرىشباەۆ «تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى» عىلىمي-زەرتتەۋ ۋنيۆەرسيتەتى رەكتورىنىڭ كەڭەسشىسى, ترانسفورماتسيالاۋ جانە ستراتەگيالىق دامۋ ءبولىمىنىڭ جەتەكشىسى, پروفەسسور پيتەر ماككاننمەن كەزدەسۋ بارىسىندا ارى قارايعى ەكى جاقتى ىنتىماقتاستىق نەگىزدەرىن تالقىلادى.
پيتەر ماككانن – حالىقارالىق عىلىمي قاۋىمداستىققا تانىمال تۇلعا. ول كانادانىڭ جەتى پروۆينتسياسىندا, اقش-تىڭ ەكى شتاتىندا, سونداي-اق فينليانديا, گەرمانيا, قازاقستان, ازەربايجان, قىرعىزستان جانە وزبەكستان ەلدەرىندە ءدارىس بەرىپ, عىلىمي قىزمەتتە ءجۇر. ونىڭ «جەكە كومپانيالاردىڭ ستراتەگياسى جانە بيزنەستى جوسپارلاۋ», «توڭكەرىستەر: مي, باتىلدىق جانە توزىمدىلىك» تاقىرىبىنداعى ىسكەرلىك كىتاپتارى عىلىمي ورتادا جوعارى سۇرانىسقا يە.
قازاق ۇلتتىق اگرارلىق زەرتتەۋ ۋنيۆەرسيەتەتىندە سۋ شارۋاشىلىعى ماماندارىنىڭ الەۋەتىن كۇشەيتۋ شارالارىمەن تانىسقان پيتەر ماككانن «جوعارى وقۋ ورىندارىنىڭ باسەكەگە قابىلەتتىلىگىن ارتتىرۋ جانە الەمدىك قۋاتتى ۋنيۆەرسيتەتتەر قاتارىنان كورىنۋ باعىتىنداعى يننوۆاتسيالىق تەحنولوگيالاردى ازىرلەۋ باستامالارىڭىزدى تولىق قولدايمىز. ستۋدەنتتەرىڭىزدى كەلىسىمشارت بويىنشا قارسى الىپ, جايلى جاتاقحاناعا ورنالاستىرىپ, بىردەن وقۋلارىن جالعاستىرىپ كەتۋگە بارلىق مۇمكىندىك جاسالعان. بىرلەسكەن جوبامىز كەلەشەكتە اگروسەكتور سالاسىندا بىلىكتى جاس كادرلاردىڭ كاسىبي قۇزىرەتتەرىن ارتتىرۋعا تىڭ سەرپىن بەرەتىنىنە سەنىمدىمىز», دەپ اتاپ ءوتتى.
«وسى ىسكەرلىك اياسىندا بيىلعى جىلدىڭ اقپان ايىندا ءبىزدىڭ ءبىرىنشى كۋرستىڭ 15 ستۋدەنتى «سۋ رەسۋرستارى جانە سۋدى پايدالانۋ» ءبىلىم بەرۋ باعدارلاماسى بويىنشا تاشكەنتكە باكالاۆرياتتا وقۋعا اتتانباق. ارى قاراي «جول كارتاسىندا» بەلگىلەنگەن مىندەتتەر اياسىندا ەكىجاقتى قىزمەتتەردى جالعاستىرا بەرەتىن بولامىز», دەدى قازNARU رەكتورى اقىلبەك كۇرىشباەۆ.
ەكى ەل ۋنيۆەرسيتەتتەرى اراسىنداعى ىنتىماقتاستىقتى نىعايتۋ مەموراندۋمى 2028 جىلعا دەيىنگى كەزەڭدى قامتيدى. كەلىسىمشارتتا ينفراقۇرىلىمدارمەن قامتاماسىز ەتۋ, تەحنيكالىق وقۋ قۇرالدارىمەن جابدىقتاۋ, زاماناۋي وقۋ جانە عىلىمي ادەبيەتتەرمەن, پروفەسسور-وقىتۋشىلار قۇرامى پەن ءبىلىم الۋشىلاردىڭ اكادەميالىق ۇتقىرلىعىن قامتاماسىز ەتۋ شارالارى قامتىلعان.
الماتى