ءماجىلىس دەپۋتاتى داۋلەت تۇرلىحانوۆ پرەمەر-ءمينيستردىڭ ورىنباسارى تامارا دۇيسەنوۆاعا دەپۋتاتتىق ساۋال جولداپ, ۇرپاق ساۋلىعىن ويلاۋدا وپىنىپ قالماۋ كەرەگىن ەسكەرتتى, دەپ جازادى Egemen.kz.
«جاستاردىڭ دەنساۋلىعىنا بالتا شاباتىن ۆەيپ دەپ اتالاتىن ەلەكتروندى سيگارەتتى توقتاتۋعا تيىم سالاتىن نورما دەنساۋلىق ساقتاۋ ماسەلەلەرى تۋرالى زاڭ جوباسىنا ەنگىزىلدى. بۇل - ورتاق جەڭىسىمىز. وسى زاڭ بويىنشا جۇمىس ىستەگەن دەپۋتات ارىپتەستەرىمىزگە العىسىمدى بىلدىرەمىن. ەلەكتروندى تەمەكى, ەنەرگەتيكالىق سۋسىن سەكىلدى كوپتەگەن زياندى زاتتار كەڭىنەن تارالىپ, قوعامدى ۋلاپ جاتىر. سولاردىڭ ءبىرى – كاليان. بۇگىندە كوپشىلىك تاماقتاناتىن ورىنداردى قويىپ, جاستار كالياندى كولىكتە دە پايدالانۋدا. قوعامدىق ورىنداردا تارتۋعا زاڭ جۇزىندە تىيىم بولسا دا نورما ورىندالماي وتىر. ويتكەنى ءۇش جىل بويى كاسىپكەرلىك سۋبەكتىلەرىن تەكسەرۋگە موراتوري ەنگىزىلدى. تەكسەرۋدى توقتاتۋ دەگەن زاڭدى بۇزۋعا نەگىز ەمەس. كالياننىڭ قۇرامىنا نە قوساتىنى مۇلدەم جۇمباق. وعان گاشيشتى دە, الكوگولدىك ىشىمدىكتى, باسقا دا زاتتاردى قوسۋى مۇمكىن, قاداعالايتىن ەشكىم جوق», دەدى د.تۇرلىحانوۆ.
حالىقتىڭ دەنساۋلىعىن جاقسارتۋ, سالاۋاتتى ءومىر سالتىن قالىپتاستىرۋعا جاعداي جاساۋ مەملەكەتتىك ساياساتتىڭ باسىم باعىتى دەگەن دەپۋتات جاستار اراسىندا كاليان شەگۋ كەڭ تاراعانىن ايتتى. تۇتىنۋشىلاردىڭ باسىم كوپشىلىگى كالياننىڭ زيانى جوق دەپ ويلايتىنىنا قىنجىلدى. كەرىسىنشە, كاليان شەگۋ قاتەرلى ىسىككە, برونحيت, دەمىكپە, وكپەنىڭ سوزىلمالى سىرقاتىنا, جۇرەك قان تامىرلارى اۋرۋىنا دا شالدىقتىراتىنىن ەسكەرتتى.
ىشكى ىستەر مينيسترلىگى قوعامدىق ورىنداردا كالياندى شەگۋشىلەرگە باقىلاۋدى كۇشەيتىپ, تۇتىنۋ زاڭدىلىعىنا تەكسەرۋ جۇرگىزۋى ءتيىس ەكەنىن ايتتى. دەنساۋلىق ساقتاۋ مينيسترلىگى كالياننىڭ قۇرامى مەن تۇتىنىنە ساراپتاما جاساپ, زيانى تۋراسىندا قورىتىندى ازىرلەۋ كەرەك دەدى. كاليان شەگۋگە تىيىم سالىپ, ال تالاپتى بۇزعانداردى جاۋاپكەرشىلىككە تارتۋدى كوزدەيتىن زاڭ جوباسىن ازىرلەۋ قاجەتتىگىن اتاپ ءوتتى.