كەيىنگى كەزدەرى «ەستە ساقتاۋ قابىلەتىم ناشارلاپ كەتتى» دەگەن ءسوزدى كوپ ەستيمىز. تەحنولوگيا دامىعان سايىن قاراپايىم ءىستىڭ ءوزىن مۇڭعا اينالدىرىپ الاتىن بولدىق. ونىڭ ءبارى ادام كاپيتالىنىڭ ساپاسىن ءتۇسىرىپ, ءتىپتى جاد جۇمىسىنىڭ تومەندەۋىنە الىپ كەلدى. بىراق تەحنولوگيا بۇعان دا شەشىم تاپتى. ايبولات قۇلاتاي ويىن ارقىلى مي گيمناستيكاسىن جاساتقىزاتىن قازاق تىلىندەگى زياتكەرلىك ويىن جاساپ شىعارعان.
ايبولاتتىڭ كوكەيىندە قوعامعا وزگەرىس اكەلەتىن جوبا جاسايمىن دەگەن ماقسات بار ەدى. سول ماقساتى Aqyl Battle-عا ۇلاسىپ, بۇگىندە قوسىمشاعا 650 مىڭ قولدانۋشى تىركەلگەن. قازىر بۇل قوسىمشا قازاق ءتىلىنىڭ اياسىن كەڭەيتىپ, ۇلتتىق تانىمدى دارىپتەپ ءجۇر. ەكى ويىنشىنىڭ جارىسى فورماتىنداعى ونلاين-كۋيز 5 راۋندتان تۇرادى. ارقايسىسىندا ءارتۇرلى تاقىرىپتا ءۇش سۇراق بار. مىسالى, لوگيكا, تانىمال تۇلعالار, قازاق ادەبيەتى نەمەسە سپورت. قاتىسۋشىلار تاقىرىپ تاڭداپ, كەزەكپەن شەكتەۋلى ۋاقىتتا سۇراقتارعا جاۋاپ بەرەدى.
– ءارتۇرلى تۇجىرىمدامانى ويلاستىردىم, ءوزىم دە زياتكەرلىك ويىندارعا قۇمارمىن. ستۋدەنت كەزىمدە «اقىلدىلار شايقاسى» ونلاين-ۆيكتوريناسىنا قاتىستىم. كۋرستاستارىممەن, ءتىپتى پروفەسسورلارمەن وينادىق. سويتسەم, بۇل Quizduel شۆەد جوباسىنىڭ تمد ەلدەرىنە بەيىمدەلگەن ۇلگىسى ەكەن. مۇنداي قوسىمشالارداعى سۇراقتار ادەتتە فلورا مەن فاۋنا, تاريح, گەوگرافيا سەكىلدى جالپى تاقىرىپتارعا ارنالعان. ءموبيلدى قوسىمشا جاساۋ تاجىريبەمىزگە سۇيەنسەك, زياتكەرلىك ويىندار باعىتى ءبىز ءۇشىن ءتيىمدى. ونى ءبىر ايدا جاسايمىز دەپ ويلادىق, بىراق قاتەلەسىپپىز. قوسىمشانى ازىرلەۋ ۇدەرىسىندە كوپتەگەن نيۋانس پايدا بولدى. ويىن مەحانيكاسىن ۇنەمى جەتىلدىرىپ وتىرۋ قاجەت بولدى. 2022 جىلدىڭ جازىنا قاراي سىناق نۇسقاسىن دايىنداپ ۇلگەردىك, ال قىركۇيەكتە تولىق رەجىمدە جۇمىس ىستەي باستادىق, – دەيدى ايبولات.
ويىندى جاساپ شىعارۋعا كوپ قارجى مەن قاجىرلى ەڭبەك جۇمسالعان. قازىر كوماندادا Android جانە iOS ازىرلەۋشىلەر, بەكەندەرلەر, سىناۋشى, ديزاينەردى قوسقاندا 10 ادام جۇمىس ىستەيدى. كونتەنت-ءبولىم مەن ماركەتينگ ءبولىمى دە بار. قوسىمشانى push-ماركەتينگسىز كۇندەلىكتى 10-15 مىڭ ادام قولدانادى. كەي كەزدەرى سىيلىق ويناتىپ, چەمپيونات وتكىزىلەدى. ونداي كۇندەرى قولدانۋشىلار سانى ورتاشا ەسەپپەن 35-45 مىڭ ادام بولسا, ەندى بىردە 114 مىڭعا جەتەدى. ەڭ قىزىعى, ويىنشىلار اراسىندا ءتورت مىڭ ويىن ويناپ, ميلليوننان استام ۇپاي جيناعاندار بار. ونداي جاندارعا جاڭا سۇراقتار ازىرلەپ, ونى ەنگىزىپ ۇلگەرۋ قيىن ءىس. سول سەبەپتى ادامدار قوسىمشادان شىعىپ كەتپەۋى جانە جيناعان ۇپايلارىن باعالى زاتقا ايىرباستاي الۋى ءۇشىن Aqyl Battle باسشىلىعى بايقاۋلار ۇيىمداستىرعان. ءسويتىپ, تۋريستىك اگەنتتىكپەن بىرنەشە جولداما ويناتىپ, الماتى مەن استانانى كورمەگەن ءبىر قاتىسۋشى العاش رەت دۋبايعا بارىپ قايتتى.
– قوسىمشانى پايدالانۋشىلار بونۋس ءۇشىن WhatsApp ارقىلى دوستارى مەن تۋىستارىن شاقىردى. بىزدە قازاقتىلدى اۋديتوريا باسىم. جاقىندا ورىسشا نۇسقاسىن قوستىق. Aqyl Battle – ۋاقىتتى وتكىزۋدىڭ ءبىر ءتۇرى. ول جولدا, جۇمىس اراسىندا, ءتىپتى تويلاردا وينالادى. مەن ءبىر قىزدىڭ جىگىتپەن قالاي تانىسقانىن بىلەمىن, ونىڭ تەلەفون ءنومىرىن ءبىلۋ ءۇشىن جىگىت ونى Aqyl Battle ويىنىنا شاقىرعان. ءار جەڭىسى ءۇشىن قىز ءنومىرىنىڭ ءبىر سانىن ايتىپ وتىرعان. قازىر بىزدە قازاقتىڭ سالت-داستۇرلەرى مەن ماقال-ماتەلدەرىن قوسقاندا سۇراقتاردىڭ 40 ساناتى بار. ويىن كەزىندە ادام جاڭادان كوپ نارسەنى بىلەدى. «اقىلدىلار شايقاسىندا» تەك 6 سانات بار, ال تاقىرىپتار جەرگىلىكتى حالىققا بەيىمدەلمەگەن, – دەدى جوبا اۆتورى.
العاشقى 8 ايدا جوبا جاقسى كىرىس اكەلىپتى. اۋديتوريا جىلدام ءوسىپ, قوسىمشا جارناما كورسەتۋ ءۇشىن Google-دىڭ AdMob قۇرالىن قوسقان. Google جارناماعا ءۇش اي بويى 30 مىڭ دوللار تولەگەن. بىراق ۋاقىت وتە كەلە ترافيك بىرتە-بىرتە ءتۇسىپ, جارنامادان تۇسەتىن تابىس تا ازايعان. ەۋروپا مەن اقش-تا جارنامانى كورسەتۋ باعاسى ورتالىق ازيا ەلدەرىنە قاراعاندا جوعارى ەكەنى راس. سوندىقتان ولار جاڭا اۋديتورياعا شىعۋ ءۇشىن باسقا تىلدەردە مازمۇن جاساۋ تۋرالى ويلاي باستاعان.
Astana Hub-تىڭ Invest Day ءىس-شاراسىندا جوبانىڭ تانىستىرىلىمى وتكەن. سودان كەيىن الەۋەتتى ينۆەستورلارمەن كەلىسسوزدەر جۇرگىزىلە باستاعان. كەلەشەكتە ءموبيلدى جانە كەزدەيسوق ويىندارعا سۇرانىس جوعارى تۇركيا مەن MENA ەلدەرىنىڭ نارىعىنا شىعۋدى قاراستىرىپ وتىر. مۇنىڭ جولى دا اشىق, ويتكەنى Aqyl ءسوزى ءارتۇرلى حالىقتىڭ تىلىندە بار. مامانداردىڭ پىكىرىنشە, ىستانبۇل جالپى ويىن يندۋسترياسىنىڭ الەمدىك استاناسىنا جاتادى. كەيىنگى التى ايدا جەرگىلىكتى گەيمدەۆ-كومپانيالار وسى سالادا ۇلىبريتانيا مەن سكانديناۆيادان دا كوپ ينۆەستيتسيا تارتقان. وندا قازىر ءموبيلدى ويىنداردى ازىرلەۋشى 300-گە جۋىق كومپانيا بار, ولار تۇركيانىڭ ەرەسەك تۇرعىندارىنىڭ 70 پايىزىن قامتيدى, بۇل دەگەنىڭىز – 44 ميلليون ويىنشى.
– قازاقستاندا قۇمار ويىندار مەن ءباس تىگۋگە تاۋەلدىلىك ماسەلەسى بار. ءبىز ءوز مىسالىمىزبەن لايىقتى سىيدى ءبىلىم ارقىلى الۋعا بولاتىنىن كورسەتكىمىز كەلەدى. تاعى ءبىر تۋرنيردە «بولاشاق» باعدارلاماسىنا جانە باسقا دا وقۋ باعدارلامالارىنا تەگىن دايىنداۋ ۇتىسىن ويناتتىق. مۇنداي كۋرس جىلىنا 10 مىڭ دوللار تۇرادى. كەلەسىدە جەكە تۋرنير اياسىندا نارىكباەۆ ۋنيۆەرسيتەتى مەن حالىقارالىق اقپاراتتىق تەحنولوگيالار ۋنيۆەرسيتەتى گرانتتارىنىڭ ۇتىسىن وتكىزەمىز. قازىر مينۋسقا جۇمىس ىستەپ جاتىرمىز, بىراق ونلاين-تۋرنيرلەر جاعدايدى تۇزەتۋى كەرەك. العاشقى بيلەت ساتۋدان تۇسكەن تابىس 2 ملن تەڭگەنى قۇرادى. مادەنيەت مينيسترلىگىمەن بىرلەسكەن وفلاين تۋرنير وتكىزۋ تاجىريبەسى دە بولدى. ىرىكتەۋ كەزەڭدەرىن ونلاين وتكىزىپ, ءار ءوڭىردىڭ جەڭىمپازىن استاناعا ۇلكەن فينالعا شاقىردىق, – دەگەن تىڭ وي ايتتى ول.
جوبا قۇراستىرۋشىلارى بۇرىن سۇراقتاردى وزدەرى قۇراستىراتىن ەدى. ال قازىر ساتىپ الادى. ولاردىڭ ايتۋىنشا, سۇراقتار ساناتى كوپ, جۇيەلى تۇردە جاڭارتىپ جانە اۋدارىپ وتىرۋعا ۋاقىت جەتپەيدى. ونىڭ ۇستىنە بارلىق سالانىڭ ساراپشىسى بولۋ مۇمكىن ەمەس, ال ادامدارعا ۇنەمى جاڭا كونتەنت كەرەك. بولاشاقتا جاساندى ينتەللەكت تەحنولوگيالارىن تارتقىسى كەلەدى, بىراق ازىرگە ونداي ساراپتاما جوق. Chat GPT دە قازاقشا ساپالى كونتەنت بەرە المايدى.
– دۇرىسى جاساندى ينتەللەكت بىزگە سۇراقتاردى ويىنشىلاردىڭ ۇلتىنا قاراي ىرىكتەۋگە كومەكتەسەدى. جۇيە بۇل ماسەلەنى شەشىپ جاتىر, بىراق جەتىلدىرەتىن دۇنيە ءالى دە بار. ازىرشە دەرەكتەردى جيناپ, ونى قالاي پايدالاناتىنىن زەرتتەپ جاتىر. سۇراقتاردىڭ قاي ساناتى كوبىرەك سۇرانىستا نەمەسە كەرىسىنشە ەكەنى كورىنىپ تۇرادى. ويىننىڭ ءارى قاراي دامۋى ءۇشىن جاڭا مازمۇن مەن جاڭا ويىن مەحانيكاسىن قۇرۋ كەرەك. ءبىز قازىر باسقا ويىندارداعىداي ويىن ىشىندەگى ساۋدانى باستاۋعا كومەكتەسەتىن ماماندى ىزدەپ جاتىرمىز. حالىق سول ءۇشىن اقشا تولەۋگە دايىن. مۇمكىن ول شەتەلدىك مامان بولار. ويتكەنى قازاقستاندا مۇنداي ساراپشىنى ءالى تاپپادىق. سونداي-اق ءبىز جۇيەنى ۇنەمى جەتىلدىرىپ وتىرامىز, سەبەبى سۇراقتىڭ جاۋابىن Google-دان ىزدەيتىن نەمەسە ۇپاي الۋ ءۇشىن باسقا دا ايلا قولداناتىندار بار, – دەيدى ايبولات قۇلاتاي.
جوبا اۆتورلارى قازىر ويىندى تمد ەلدەرىنە تاراتۋدى كوزدەپ وتىر. تۇركىتىلدەس ەلدەرگە شىعارۋ ماقساتى دا – ايقىن. قازىر كونتەنت اعىلشىن, تۇرىك, اراب, ورىس تىلدەرىنە اۋدارىلىپ جاتىر. كەلەسى جىلى گيپوتەزالاردى سىناپ, تۇپكىلىكتى شەشىم قابىلدايدى. سوندا ويىن مازمۇنى كوپتىلدى دەڭگەيگە ءوتىپ, ءارتۇرلى ەلدەگى پايدالانۋشىلار ءبىر پلاتفورماعا بىرىكتىرىلەدى.