ساۋدا جانە ينتەگراتسيا مينيسترلىگى ەل ازاماتتارىنا 29 اقپان كۇنى ۇيالى تەلەفونداعى ۋاقىت اۆتوماتتى تۇردە وزگەرەتىنىن مالىمدەدى. تۇرعىندارعا ۋاقىتتى ءبىر ساعات ارتقا شەگەرۋدىڭ قاجەتى جوق, دەپ جازادى Egemen.kz.
«ۋاقىت پەن جيىلىك بىرلىكتەرىنىڭ مەملەكەتتىك باستاپقى ستاندارتى» دەگەن ۇعىم بار. جابدىقتار استانا قالاسىندا ورنالاسقان. ول قازاقستان بويىنشا ەڭ ءدال ۋاقىتتى كورسەتەدى جانە الەمدىك ساعاتتارمەن ساعات سايىن سينحروندالادى. 29 اقپاندا ءتۇن ورتاسىندا اتالعان جابدىق قايتا كونفيگۋراتسيالانادى, اقپارات ۇيالى بايلانىس وپەراتورلارىنا جىبەرىلەدى جانە ولار قازىردىڭ وزىندە بارلىق ەل ازاماتتارىنىڭ ۇيالى تەلەفونىنداعى ۋاقىتتى جاڭارتا الادى», دەلىنگەن مينيسترلىك مالىمدەمەسىندە.
باتىس تۇرعىندارىنان باسقا بارلىق قالا تۇرعىندارىندا - 00:00 23:00-گە اۋىسادى. بەيسەنبىگە ساي كەلەتىن بۇل كۇنى تاۋلىكتە 25 ساعات بولماق.
ايتا كەتەيىك, وسى جىلدىڭ 1 ناۋرىزىنان باستاپ قازاقستان بىرىڭعاي ۋاقىت بەلدەۋىنە كوشەدى. رەسپۋبليكانىڭ بۇكىل اۋماعى 5-ءشى ۋاقىت بەلدەۋىن (UTC+5) قولدانادى. بۇگىنگى تاڭدا قازاقستاندا UTC+5 جانە UTC+6 ەكى ۋاقىت بەلدەۋى بار. ەل اۋماعىنىڭ كوپ بولىگى (باتىس وبلىستاردى قوسپاعاندا) UTC+6 ايماعىندا ورنالاسقان.