Atamnyn Amanaty قوعامدىق بىرلەستىگى مەن قاراعاندى وبلىستىق قورعانىس ىستەرى جونىندەگى دەپارتامەنتى تاراپىنان ەكىنشى دۇنيەجۇزىلىك سوعىسىنىڭ جاۋىنگەرى قالحاي سارمانتاەۆتىڭ «ەرلىگى ءۇشىن» مەدالى, قاسىعى, ۇشتاعىشى جانە جەرلەنگەن زيراتىنان ءبىر ۋىس توپىراق ونىڭ نەمەرەلەرى بىرلىك پەن سەرىك قالقاەۆقا بەرىلدى. اتالعان وبلىس تۋماسى 1943 جىلى مايدانعا اتتانىپ, 2-ءشى بالتىق مايدانى 288-ءشى دنوۆ اتقىشتار ديۆيزياسىنىڭ 1014-ءشى اتقىشتار پولكىندە اتقىش بولعان, دەپ جازادى Egemen.kz قورعانىس مينيسترلىگىنە سىلتەمە جاساپ.
«اتامىز قالحاي سارمانتاەۆ 1943-1944 جىلدارى ءۇش رەت جارالانىپ, 1945 جىلى 28 قاڭتاردا قازا تاپقان. لاتۆيا ءۇشىن شايقاستا قازا تاپقانىنان حابار كەلگەنمەن, جەرلەنگەن جەرى كورسەتىلمەگەن ەدى. وتكەن جىلى عانا ءبىز ونىڭ قايدا جەرلەنگەنىن بىلدىك. Atamnyn Amanaty بىرلەستىگىنە ريزامىز. اتامىزدىڭ قابىرىنەن اكەلىنگەن توپىراقتى اقتوعايداعى زيراتقا اپارامىز. اتام جايلى ءبىرشاما بىلەمىز, دەگەنمەن ۇلكەندەردەن ەستۋىمىزشە, ول 13 جىل سوۆحوزدا جۇمىس ىستەپ, 43 جاسىندا سوعىسقا ەرىكتى تۇردە اتتانعان. ارتىندا ەكى قىزى جانە ءبىر ۇلى قالعان», دەدى ساربازدىڭ نەمەرەسى سەرىك قالقاەۆ.
قالحاي سارمانتاەۆ جەڭىسكە نەبارى ءۇش-اق اي قالعاندا قازا تاپقان. 2023 جىلى لاتۆيادا ىزدەۋ جاساعى دالالىق جورىعى كەزىندە باۋىرلاستار زيراتىنان ونىڭ سۇيەكتەرىن تابادى. جاۋىنگەردىڭ جەكە باسى «ەرلىگى ءۇشىن» مەدالىنىڭ ءنومىرى ارقىلى انىقتالعان, ودان بولەك ونىڭ قاسىعى جانە ۇشتاعىشى تابىلعان.