مەملەكەت باسشىسى ريم پاپاسىنىڭ شاقىرۋىمەن قاسيەتتى تاققا العاشقى رەسمي ساپارىن جاسادى. قازاقستان پرەزيدەنتى ءسوزىنىڭ باسىندا الەمدەگى ادامزاتتىڭ يگىلىگى جولىنداعى قاجىماس قايراتى مەن قاجىرلى كۇش-جىگەرى ءۇشىن كاتوليك شىركەۋىنىڭ جوعارعى پونتيفيكىنە ريزاشىلىعىن ءبىلدىردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ء«سىزدىڭ دۇنيەجۇزى حالقىنا بەيبىتشىلىك تىلەگەن دۇعالارىڭىز مىڭداعان كاتوليكتىڭ عانا ەمەس, باسقا دىندەردى ۇستاناتىن كوپتەگەن وتانداستارىمىزدىڭ جۇرەگىنەن ورىن الىپ, سانالارىنا سەنىم مەن ءۇمىت ۇيالاتتى. بۇگىندە وركەنيەتتەر توعىسىندا ورنالاسقان كوپۇلتتى جانە كوپكونفەسسيالى قازاقستان ورتالىق ازياداعى ەڭ ءىرى كاتوليك قاۋىمىنىڭ ءوز ۇيىنە اينالدى», دەدى پرەزيدەنت.
مەملەكەت باسشىسىنىڭ ايتۋىنشا, بارلىق دىندەردىڭ وكىلدەرى ادىلەتتى قازاقستاندى قۇرۋعا ەلەۋلى ۇلەس قوسىپ وتىر.
ء«بىز «بىرلىگىمىز ارالۋاندىقتا» قاعيداتىنا نەگىزدەلگەن بەيبىتشىلىك پەن ۇلتتىق ديالوگتىڭ وزىمىزگە ءتان مودەلىن قالىپتاستىرا الدىق. ەلىمىزدە ءتۇرلى ءدىننىڭ وكىلدەرى وزدەرىنىڭ عيباداتحانالارىندا قۇلشىلىق ەتە الادى. ءدىني سەنىم بوستاندىعى قۇقىعىن قورعاۋ – مەنىڭ ساياسي باعدارىمنىڭ اجىراماس بولىگى», دەدى قاسىم-جومارت توقاەۆ.
قازاقستان پرەزيدەنتى ريم پاپاسى فرانتسيسكتىڭ «قالاعا جانە الەمگە» اتتى ءداستۇرلى جولداۋىن ەسكە سالا وتىرىپ, ونىڭ «بەيبىتشىلىك – ەڭ الدىمەن قۇدايدىڭ سىيى. بىراق بۇل – بارىمىزگە جۇكتەلگەن ۇلكەن جاۋاپكەرشىلىك» دەگەن سوزدەرىن تولىق قولدايتىنىن جەتكىزدى.
ء«سىزدىڭ ۇستانىمىڭىزدى تولىعىمەن قۇپتاي وتىرىپ, ءبىز كوپتەگەن ايىرماشىلىقتارىمىزعا قاراماستان, بەيبىتشىلىك يدەيالارىن, مادەنيەتتەر مەن دىندەر اراسىنداعى تۇراقتى ديالوگتى, ءارتۇرلى ءدىندى ۇستاناتىن ادامداردىڭ يگىلىگى جولىنداعى دامۋدى ىلگەرىلەتۋ ءۇشىن بارشامىزعا بىرلىك كەرەك ەكەنىنە سەنىمدىمىن. ىزگى نيەت بىلدىرۋگە ۋاقىت جەتكىلىكتى, كەلىسسوزدەر جۇرگىزۋگە كەڭىستىك تە بار, دانالىق تانىتۋعا ءالى دە مۇمكىندىك مول», دەدى مەملەكەت باسشىسى.
قاسىم-جومارت توقاەۆ ەكىجاقتى قاتىناستار اياسىندا قازاقستان شىنايى دوستىققا, كەلىسىم مەن ءوزارا قۇرمەتكە نەگىزدەلگەن قاسيەتتى تاقپەن اراداعى بۇرىننان كەلە جاتقان سەرىكتەستىك بايلانىستاردى جوعارى باعالايتىنىن اتاپ ءوتتى.
سونداي-اق بەلسەندى ساياسي ديالوگ جۇرگىزىلىپ وتىرعانىن, قۇقىقتىق بازانى رەتكە كەلتىرۋ, كەڭەيتۋ ءۇشىن دايەكتى جۇمىستار اتقارىلىپ جاتقانىن جەتكىزدى. قازاقستان پرەزيدەنتى الەمدەگى تەكەتىرەستەر مەن الاۋىزدىق وشاقتارىن توقتاتۋعا باعىتتالعان بەلسەندى كۇش-جىگەرى ءۇشىن ريم پاپاسى فرانتسيسككە ريزاشىلىعىن ءبىلدىردى.
«شىن مانىندە, قازىرگى گەوساياسي تۇراقسىزدىق بۇكىل جاھاندىق قاۋىپسىزدىك ارحيتەكتۋراسىنا نۇقسان كەلتىرۋدە, سونداي-اق حالىقتاردى ۇلكەن قايعى-قاسىرەتكە ۇشىراتىپ, ەكونوميكالىق قيىندىقتار تۋدىرىپ وتىر. قازاقستان ىزگىلىكتى جاقتايتىن مەملەكەت رەتىندە جاھاندىق بەيبىتشىلىك پەن قاۋىپسىزدىكتى قولداۋعا ءىس جۇزىندە ەلەۋلى ۇلەس قوسىپ جاتىر. ءبىز الەمنىڭ ءتۇرلى قاقتىعىس وشاقتارىنداعى بۇۇ-نىڭ بىتىمگەرشىلىك ميسسيالارىنا اتسالىسامىز», دەدى قاسىم-جومارت توقاەۆ.
ءوز كەزەگىندە پونتيفيك بەيبىتشىلىك پەن كەلىسىمدى قامتاماسىز ەتۋ ىسىندەگى كۇش-جىگەرى ءۇشىن قازاقستان پرەزيدەنتىنە العىس ايتتى. كەزدەسۋ سوڭىندا مەملەكەت باسشىسى مازمۇندى كەزدەسۋ ءۇشىن ريم پاپاسىنا العىس ايتىپ, قازاقستان الداعى ۋاقىتتا تولەرانتتىلىق, ۇيلەسىمدىلىك, باۋىرلاستىق يدەيالارىن دارىپتەۋ ىسىندە قاسيەتتى تاقپەن ىنتىماقتاستىق جاساۋعا نيەتتى ەكەنىن راستادى.