كەڭەس وداعىنىڭ باتىرى №1 حالىق قاھارمانى, تاۋەلسىز قازاقستاننىڭ تۇڭعىش قورعانىس ءمينيسترى, ارميا گەنەرالى ساعادات نۇرماعامبەتوۆتىڭ عاسىرلىق مەرەيتويىنا وراي الماتىدا قارۋلى كۇشتەردىڭ مەملەكەتتىك اسكەري-تاريحي مۇراجايى «حالىق جۇرەگىندەگى قاھارمان» اتتى كوشپەلى كورمە ۇيىمداستىردى. اشىلۋىنا الماتى وڭىرلىك گارنيزونىنىڭ اسكەري قىزمەتشىلەرى, اسكەري جوعارى وقۋ ورىندارىنىڭ كۋرسانتتارى, «جاس سارباز» بالالار-جاسوسپىرىمدەر اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
كورمەنىڭ اشىلۋىندا قارۋلى كۇشتەر ۇلتتىق اسكەري-پاتريوتتىق ورتالىعى الماتى فيليالىنىڭ ەسترادالىق-بي توبى ونەر كورسەتتى. سۇڭقار ءاليمۇسا نۇرلان ءنۇرتازيننىڭ «ساعادات» ءانىن ورىندادى.
«تاقىرىپتىق تۇرعىدان كورمە ماتەريالدارىن سوعىسقا دەيىنگى, ەكىنشى دۇنيەجۇزىلىك سوعىسى جىلدارىنداعى جانە تاۋەلسىز قازاقستاننىڭ قارۋلى كۇشتەرىن قۇرۋداعى تۇڭعىش قورعانىس ءمينيسترىنىڭ ءرولىن كورسەتەتىن ءۇش كەزەڭگە بولدىك», دەدى اتالعان مۋزەي باستىعى ءلاززات ءالجان.
كورمەگە تاريحي فوتوسۋرەتتەر, كەڭەس وداعىنىڭ باتىرى اتاعىن بەرۋ تۋرالى جارلىقتىڭ, التىن جۇلدىزدىڭ كوشىرمەلەرى جانە فۋراجكا, بەلدىك, كوبۋرا, گيمناستەركا, شينەل, بىلعارى قولعاپ, ەتىك, گەنەرال پوگوندارى سەكىلدى ساعادات نۇرماعامبەتوۆتىڭ جەكە زاتتارى قويىلعان. ءبىر قىزىعى, جادىگەرلەر اراسىندا ونىڭ جاقىندارى بىلە بەرمەيتىن سيرەك فوتوسۋرەتتەر دە كەزدەسەدى.
الماتى قالاسىنداعى كورمە 31 قاڭتارعا دەيىن جالعاسادى. سوسىن بۇل قۇندى جادىگەرلەر ەلىمىزدىڭ وزگە دە 10 قالاسىن ارالايدى.