ەكى قۇتقارۋشىمەن بىرگە جەر استىنا ءتۇسىپ كەتكەن اۆتوبۋس انە-مىنە تابىلىپ قالادى دەگەلى ەكى اپتاداي ۋاقىت ءوتتى. ارنايى تەحنيكالار جول سالىپ, قۇتقارۋشىلار قولدارىنان كەلگەننىڭ ءبارىن ىستەپ جاتىر. گەولوگيالىق سكانەر انىقتاپ بەرگەن جەردى قازىپ جاتقان ەكسكاۆاتور ازىرگە قۇتقارۋشىلارعا تيەسىلى بىرنەشە زاتتى عانا الىپ شىقتى.
وقيعا ورنىندا قۇرىلعان جەدەل شتابتىڭ ۇيلەستىرۋىمەن بۇعان دەيىن ويىقتىڭ تۇبىنە دەيىن اۋىر تەحنيكالاردىڭ كۇشىمەن جول سالىنعان. بالقاش قالاسىنان جەتكىزىلگەن گەولوگيالىق رادار توپىراق قاباتىن سكانەرلەپ, اۆتوبۋستىڭ جاتقان جەرىن شامامەن تاپتى. بۇرناعى كۇنى ويىق تۇبىنە شاعىن ەكسكاۆاتور ءتۇسىرىلىپ, الگى جەردى قازا باستادى. جەدەل شتاب وكىلدەرى حابارلاعانداي, تەحنيكا شۇڭقىردىڭ ءبۇيىر قابىرعالارى قۇلاۋ قاۋپىن ەسكەرە وتىرىپ, جەر قازۋ جۇمىستارىن اسا ساقتىقپەن جۇرگىزگەن.
«جۇمىستاردى جۇرگىزۋ كەزىندە ىشىندە جۇمىس قۇجاتتارى مەن جولساپار جۋرنالى بار قۇتقارۋشىلار سومكەسى, سونداي-اق مەملەكەتتىك تىركەۋ ءنومىرى بار اۆتوبۋستىڭ شاناق بولىگى تابىلدى. ىزدەستىرۋ ءالى دە جالعاسۋدا. اۆتوبۋستىڭ بولجامدى ورنالاسقان جەرىنە دەيىنگى توپىراق قازىپ الىنعان سوڭ, ەكسكاۆاتوردىڭ جۇمىسى اياقتالادى. ماماندار جەر استىندا جاتقان اۆتوبۋستى جوعارى كوتەرۋ جۇمىستارىن باستايدى. ءبىز بۇل جۇمىستاردى بۇگىن-ەرتەڭ اياقتايمىز دەپ ۇمىتتەنەمىز», دەلىنگەن پاۆلودار وبلىسى اكىمىنىڭ ءباسپاسوز قىزمەتى تاراتقان اقپاراتتا.
كەشە توتەنشە جاعدايلار ۆيتسە-ءمينيسترى باۋىرجان سىزدىقوۆ اۆتوبۋستى شىعارۋ جۇمىستارى وتە قيىن جاعدايدا ءجۇرىپ جاتقانىن مالىمدەدى.
«جاعداي وتە كۇردەلى. ماماندار جەردىڭ سكرينىن ءتۇسىرىپ, اۆتوبۋستىڭ شامامەن قاي جەردە ورنالاسقانىن انىقتادى, ياعني قۇرىلعىلار ول جەردە شىنىمەن مەتالل بار ەكەنىن كورسەتىپ تۇر. بىراق بۇل مەتالدىڭ استىندا ءالى دە بوس كەڭىستىك بار. سوندىقتان ءبىزدىڭ قۇتقارۋشىلارىمىز, اكىمدىك پەن باسقا دا مەملەكەتتىك ورگانداردان, ارناۋلى ۇيىمداردان تارتىلعان ماماندار قازىر وتە قيىن جاعدايدا جۇمىس ىستەپ جاتىر. بىرىنشىدەن, ول جەردەگى تەمپەراتۋرا نولدەن تومەن دەڭگەيدە. ەكىنشىدەن, قۇتقارۋشىلار مەن جۇمىسشىلاردىڭ ءومىرى مەن دەنساۋلىعىنا قاۋىپ ءتونۋى مۇمكىن. توپىراق سۋسىسا, وندا قازىپ جاتقان تەحنيكا تومەن قاراي قۇلاۋى مۇمكىن. اۆتوبۋستىڭ استىنداعى بوس كەڭىستىكتىڭ اۋماعى قانشالىقتى ۇلكەن ەكەنىن ناقتى بىلمەيمىز», دەدى ب.سىزدىقوۆ.
«مايقايىڭالتىن» اق باس ديرەكتورى قۋانىش بوتين حابارلاعانداي, وقيعا كۇنى شاقىرتۋعا بارا جاتقان قۇتقارۋشىلار اۆتوبۋسىنىڭ سوڭىنان كەنىش ديرەكتورى اندرەي شۋۆالوۆ جەكە كولىگىمەن ىلەسىپ وتىرعان. ول اۆتوبۋستىڭ ويىققا ءتۇسىپ كەتكەنىن كورىپ, كىلت توقتاعان. وقيعانى ءتيىستى ورگاندارعا حابارلاعان دا سول كورىنەدى. الايدا وپىرىلعان جەردى كۇزەتشىلەر قالاي كورمەي قالعانى تۇسىنىكسىز.
پاۆلودار وبلىسى,
باياناۋىل اۋدانى,
مايقايىڭ كەنتى