حالىق ءانى ەشقاشان ەسكىرمەيدى, قايتا زامان جاڭارعان سايىن التىنداي قۇنى ارتا بەرمەك. ساعىنساڭىز, جەتىسۋعا كەلىڭىز! جۇرەكتى ەلجىرەتەر, جان تولقىتار اۋەندەر قارسى الادى. وعان دالەل – دانەش راقىشەۆ اتىنداعى فيلارمونيانىڭ «انمەن اتقان تاڭدار-اي» اتتى كونتسەرتى. بۇل كەش ءداستۇرلى اندەردىڭ تامىرىنا قان جۇگىرتىپ, قاراشانىڭ قيالىنا قانات ءبىتىردى.
بۇلاي اسقاقتاتا جازىپ وتىرعانىمىزدىڭ ءبىر سەبەبى سوڭعى ۋاقىتتا ەسەرسوق ەسترادالىق اندەردەن جالىعا باستاعان ەدىك. دومبىرانىڭ شاناعىنان شىققان سارىن كوڭىلىمىزدى قايتا بايىتا ءتۇستى. رۋحاني كۇش بەردى. وعان كەشكە كەلگەن ءاربىر قوناق كۋاگەر بولا الادى. ەندى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باستاماسىمەن جۇزەگە اسقان جارقىن ءىس-شارا اي سايىن ۇيىمداستىرىلادى.
حالىق اۋەندەرىمەن ناقىشتالعان ميۋزيكل جانرىنداعى كونتسەرتكە دانەش راقىشەۆ اتىنداعى فيلارمونيانىڭ ەلگە تانىمال مادەنيەت مايتالماندارى ونەر كورسەتتى. سونىمەن قاتار قالا جانە اۋدانداردان كەلگەن ءداستۇرلى انشىلەر دە قۇلاق قۇرىشىمىزدى قاندىردى.
«جەتىسۋ ءداستۇرلى ءان مەكتەبى – قازاقتىڭ كونە اندەرىنىڭ, اسىرەسە حالىقتىق اۋەندەردىڭ مول ساقتالعان انشىلىك ونەر شوعىرى سانالادى, ورىندالۋى مەن دومبىرادا سۇيەمەلدەنۋى ارقا اندەرىنە وتە ۇقساس, سوندىقتان بۇل مەكتەپتىڭ وكىلدەرىنىڭ رەپەرتۋارىندا ارقا سازگەرلەرىنىڭ اندەرى دە كەڭ ورىن الادى. جەتىسۋ انشىلىگىنىڭ كورنەكتى وكىلدەرى رەتىندە جامبىل, كەنەن, قاپەز, ءپىشان, دانەش راقىشەۆتاردى اتاي الامىز», دەيدى فيلارمونيا ديرەكتورى سامات جەكسەنباەۆ.
اتالعان ءان كەشىنە ارنايى شاقىرىلعان زيالى قاۋىم وكىلدەرى مەن قالا تۇرعىندارى ۇلتتىڭ ۇلى ونەرىن اسقاقتاتقان وسىنداي كەشتىڭ ءجيى بولىپ تۇرۋىن تىلەپ, تارقادى.
جەتىسۋ وبلىسى