دەنساۋلىق ساقتاۋ ءمينيسترى اجار عينيات قانشا ازامات قايتىس بولعاننان كەيىن دونورلىققا كەلىسكەنىن ايتتى, دەپ حابارلايدى Egemen.kz.
ءمينيستردىڭ سوزىنشە, دونورلىق اياسىندا ارنايى قۇرىلعان ەلەكتروندى ءتىزىلىم بار, وندا كەز كەلگەن ازامات eGov ارقىلى ءوز پىكىرىن بىلدىرە الادى.
«بۇگىنگى كۇنگە دەيىن قازاقستاننىڭ 40 مىڭ ازاماتى بۇل ماسەلەگە قاتىستى ءوز پايىمىن ءبىلدىردى, ولاردىڭ 15 پايىزى قايتىس بولعاننان كەيىنگى دونورلىققا كەلىسىم بەردى. قازىر مينيسترلىك حالىق اراسىندا ۇلكەن اقپاراتتىق جۇمىس جۇرگىزىپ جاتىر. 2023 جىلدىڭ جەلتوقسان ايىندا اۋقىمدى ترانسپلانتاتسيالار جۇرگىزىلدى, ەكى دونور توعىز ادامنىڭ ءومىرىن ساقتاپ قالدى», دەدى اجار عينيات ءماجىلىس الاڭىندا.