ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدە اقپان ايىندا ءبىر رەتتىك جاردەماقىنى كىمدەر الاتىنىن ءتۇسىندىرىپ بەردى, دەپ جازادى Egemen.kz inbusiness.kz-كە سىلتەمە جاساپ.
مينيسترلىك مالىمەتىنشە, جىل سايىنعى داستۇرگە ساي اقپان ايىندا 185 مىڭ تەڭگە كولەمىندەگى ءبىر رەتتىك ماتەريالدىق كومەك اۋعان سوعىسىنىڭ ارداگەرلەرىنە بەرىلەدى.
10 جىلعا سوزىلعان (1979-1989 جج.) اۋعان سوعىسىنا قازاقستاننان 22 مىڭ ازامات قاتىستى. بيىل «اۋعانستان دەموكراتيالىق رەسپۋبليكاسىنان كەڭەس اسكەرلەرىنىڭ شىعارىلعانىنا 35 جىل تولادى.
اۋعان ارداگەرلەرىنە بەرىلەتىن ماتەريالدىق كومەك مولشەرىن ءار ءوڭىردىڭ مۇمكىندىگىنە قاراي جەرگىلىكتى ءماسليحات بەكىتەدى.
«تولەمدەردىڭ ءارتۇرلى بولۋى سوعىستا بىردەي زارداپ شەككەن ازاماتتار اراسىندا تۇسىنبەۋشىلىك تۋدىرۋى مۇمكىن. ءبىزدىڭ ۇسىنىسىمىزدى قاراپ, وڭىرلەردەگى قۇزىرلى ورگاندار 50 اەك (184,6 مىڭ تەڭگە) كولەمىندە بىرىڭعاي «بىرجولعى الەۋمەتتىك كومەك» تولەۋ تۋرالى شەشىم قابىلدادى. ەندى جەرگىلىكتى ءماسليحاتتار ءوز شەشىمدەرىنىڭ جوبالارىنا وزگەرىس ەنگىزۋى كەرەك. سونىمەن قاتار بارلىق اۋعان ارداگەرلەرى ەرەكشە داتاعا وراي ارنايى مەدالمەن ماراپاتتالادى», دەدى اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعى توراعاسى باقىتبەك سماعۇل.
ايتا كەتەيىك, ءبىر رەتتىك تولەم تەك «اۋعان سوعىسى ارداگەرى» مارتەبەسىن العان ازاماتتارعا بەرىلەدى.