15 قاڭتار كۇنى «قازاقستان حالقىنا» قورى قايىرىمدىلىق باعدارلامالارى مەن جوبالارىن ىسكە اسىرۋ تۋرالى» دوڭگەلەك ۇستەل بارىسىندا قور توراعاسى بولات جامىشەۆ «ەلىمىزدە ءمايىت دونورلىعى قايتا جۇمىس ىستەيتىندەي ەتىپ زاڭدى وزگەرتۋ كەرەك. وندا اعزا مۇشەلەرىن الماستىرۋ ءۇشىن مارقۇمنىڭ تۋىستارىنان رۇقسات الۋ مىندەتتى تارماققا ەنبەۋى ءتيىس» دەگەن ۇسىنىس ايتقان ەدى, دەپ جازادى Egemen.kz.
قازاق حالقى مارقۇمعا اق جاۋىپ, بارلىق ءجون-جورالعىلار بويىنشا جەر قوينىنا تاپسىرۋعا اسا ءمان بەرگەن. سوندىقتان دا ءمايىتتىڭ سوڭعى حالىنە ساي ونىڭ اعزالارىنىڭ تۇگەل بولۋىنا دەن قوياتىن تانىم بار.
دەسە دە, ءبىز بولات جامىشەۆتىڭ ۇسىنىسىنا اسىل ءدىنىمىز يسلامدا قانداي قارار بارىن بىلمەككە قازاقستان مۇسىلماندارى ءدىني باسقارماسى ءدىني وڭالتۋ ءبولىمىنىڭ مەڭگەرۋشىسى حاسان امانقۇلعا جۇگىندىك.
ماماننىڭ «يسلام دىنىندە اعزانى اۋىستىرۋعا رۇقسات بەرىلە مە, «قازاقستان حالقىنا» قورى باسشىسىنىڭ ۇسىنىسى قانشالىقتى ورىندى» دەگەن ساۋالىمىزعا قايتارعان جاۋابىن قاز-قالپىندا بەرۋگە بەل بۋدىق.
«اللا ەلشىسى (وعان اللانىڭ سالاۋاتى مەن سالەمى بولسىن): «ۋا, اللانىڭ قۇلدارى, اۋىرعاندا ەمدەلىڭدەر! سەبەبى, اللا تاعالا ءاربىر دەرتتى شيپاسىمەن قوسا جاراتتى. شيپاسى جوق دەرت – ءولىم مەن كارىلىك», دەگەن (احماد ريۋاياتى).
وسىعان وراي مۇسىلمان عالىمدارى ادامنىڭ ءومىرىن ساقتاۋ نەمەسە ۇزارتۋ ماقساتىندا بۇيرەك, باۋىر, جۇرەك, وكپە, ۇيقى بەزى سەكىلدى اعزا مۇشەلەرىن (اعزانىڭ بولىگىن), تىندەردى ء(تىننىڭ بولىگىن) ورگانيزمنىڭ باسقا جەرىنە نەمەسە باسقا ورگانيزمگە اۋىستىرىپ سالۋعا (ترانسپلانتتاۋعا) رۇقسات بەرەدى. مىسىر ءپاتۋا ورتالىعى, يسلام كونفەرەنتسياسى ۇيىمى جانىنداعى فيقھ اكادەمياسى جانە كۋۆەيتتىڭ ءدىن ىستەرى مينيسترلىگى وسى ماسەلەگە قاتىستى ءپاتۋا شىعارعان, وندا: «اعزا مۇشەلەرىن اۋىستىرۋعا ءتىرى ادامنان دا, ولگەن ادامنان دا رۇقسات ەتىلەدى.
قايتىس بولعان ادامنىڭ اعزاسىن ترانسپلانتتاۋعا رۇقسات بەرۋ ءۇشىن كەلەسى شارتتار ورىندالۋى قاجەت:
اعزا مۇشەلەرىن اۋىستىرۋ - ناۋقاستى ەمدەۋدىڭ جالعىز عانا جولى تۋرالى بىلىكتى ماماننىڭ شەشىمى بولۋى; ترانسپلانتتاۋ ءادىسى ناۋقاستىڭ ساۋىعۋىنا كەپىل بەرەتىنى تۋرالى دارىگەرلەردىڭ سەنىم ءبىلدىرۋى; دونور بولاتىن ادامنىڭ قايتىس بولعانعا دەيىن رۇقسات بەرۋى; ورگاندارىن ترانسپلانتتاۋعا رۇقسات بەرگەن دونوردىڭ مەديتسينالىق ءارى ءدىني تۇرعىدان دا قايتىس بولدى دەپ جاريالانۋى; دونورلىق ورگانداردىڭ تاۋار سەكىلدى ساتىلۋىنا تىيىم سالىنۋى; ناۋقاس ادامنىڭ ءوز ورگانىن اۋىستىرۋعا كەلىسىم بەرۋى.ال ءتىرى ادامنىڭ اعزا مۇشەلەرىن ترانسپلانتتاۋ ءۇشىن قوسىمشا كەلەسى شارتتار ورىندالۋى كەرەك:
دونوردىڭ ورگاندارىن العاندا ونىڭ دەنساۋلىعىنا زيان كەلمەيتىنى تۋرالى بىلىكتى دارىگەرلەر شەشىم شىعارۋ قاجەت. دونور بولعان ادامنىڭ قانداي دا ءبىر ورگانىن الۋ ونىڭ ومىرىنە ەشقانداي قاۋىپ توندىرمەۋى ءتيىس. ادامنىڭ اعزاسىن ساۋدا تاۋارىنا اينالدىرماۋ, ودان بىرەر پايداكۇنەمدىكتى كوزدەمەۋ شارت», دەلىنگەن.قازاقستان مۇسىلماندارى ءدىني باسقارماسى عۇلامالار كەڭەسى دە 2015 جىلى بۇل ماسەلە تۋرالى وسىنداي ءپاتۋا قابىلداعان», دەپ جاۋاپ بەردى حاسان امانقۇل.