مەملەكەت باسشىسىنا شىمكەنت قالاسىنىڭ 2023 جىلعى الەۋمەتتىك-ەكونوميكالىق دامۋى جونىندە ەسەپ بەرىلدى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
وتكەن جىلدىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيا كولەمى 26 پايىزعا ارتىپ, 724,3 ميلليارد تەڭگەنى قۇراعان. بىلتىر 1 ميلليارد 51 ميلليون تەڭگەنىڭ ونەركاسىپتىك ءونىمى وندىرىلگەن. قۇرىلىس سالاسى ايتارلىقتاي جاندانىپ, 1 ميلليون شارشى مەتردەن استام تۇرعىن ءۇي پايدالانۋعا بەرىلگەن.
قالا اكىمىنىڭ ايتۋىنشا, وڭىردە ونەركاسىپ سالاسىن دامىتۋ ءۇشىن جالپى اۋماعى 867 گەكتار بولاتىن 5 وندىرىستىك ايماققا ينفراقۇرىلىم تارتۋ جۇمىستارى قولعا الىنىپ, ينۆەستيتسيالىق جوبالاردىڭ پۋلى جاساقتالعان.
شاھاردا قازىرگى ۋاقىتتا 128 مىڭنان استام شاعىن جانە ورتا بيزنەس سۋبەكتىسى جۇمىس ىستەيدى. بۇل 2022 جىلمەن سالىستىرعاندا 16,4 پايىزعا كوپ. كاسىپكەرلىكتى دامىتۋ ءۇشىن 3498 جوباعا جالپى سوماسى 19,8 ميلليارد تەڭگە كولەمىندە قولداۋ كورسەتىلگەن.
سونىمەن قاتار پرەزيدەنتكە شىمكەنت شاھارىنىڭ ينفراقۇرىلىمىن جاڭعىرتۋ جۇمىستارىنىڭ بارىسى جونىندە باياندالدى. اتاپ ايتقاندا, قالادا جاڭا اۋەجاي تەرمينالىنىڭ قۇرىلىسى جانە تەمىرجول ۆوكزالىن رەكونسترۋكتسيالاۋ جۇمىستارى جۇرگىزىلىپ جاتىر. بۇدان بولەك, شىمكەنتتە «ىزەتتى زەينەتكەر» ساۋىقتىرۋ ورتالىعى, كونگرەسس حولل, ۇستەل تەننيسى كەشەنى جانە جاڭا يپپودروم سياقتى نىساندار بوي كوتەرگەن. بىلتىر ءۇش مەكتەپكە قوسىمشا عيمارات, وقۋشىلار سارايى جانە بالالارعا ارنالعان شىعارماشىلىق ورتالىق پايدالانۋعا بەرىلگەن. «جايلى مەكتەپ» ۇلتتىق جوباسى اياسىندا 28 مىڭ وقۋشىعا ارنالعان 18 ءبىلىم بەرۋ مەكەمەسىنىڭ قۇرىلىسى باستالعان.
سونىمەن قاتار مەملەكەت باسشىسىنا جول-كولىك ينفراقۇرىلىمىن دامىتۋ بارىسى باياندالدى. قالا اكىمى 233 شاقىرىم جولعا جوندەۋ جۇمىستارى جۇرگىزىلىپ, ۇلكەن جولايىرىق پايدالانۋعا بەرىلگەنىن ايتتى. سونداي-اق قوعامدىق قاۋىپسىزدىكتى قامتاماسىز ەتۋ ماقساتىندا بيىل قالا كوشەلەرىنە 3000 بەينەباقىلاۋ كامەراسىن ورناتۋ, 1000-عا جۋىق كوشەنى جارىقتاندىرۋ جوسپارلانىپ وتىر. سوڭعى جىلدارى وسىنداي جۇيەلى شارالاردىڭ ناتيجەسىندە قىلمىس سانى 33 پايىزعا ازايعان.
بۇدان بولەك, پرەزيدەنتكە مەملەكەت مەنشىگىنە قايتارىلعان نىساندار تۋرالى مالىمەت بەرىلدى. اتاپ ايتقاندا, جىلدار بويى قاراۋسىز قالعان بۇرىنعى فوسفورشىلار سارايى قالا بالانسىنا قايتارىلدى. ورتالىقتاعى «سپۋتنيك» گۇلزارى مەملەكەت مەنشىگىنە ءوتىپ, دەمەۋشىلەر ەسەبىنەن قايتا اباتتاندىرىلدى.
كەزدەسۋ سوڭىندا قاسىم-جومارت توقاەۆ عابيت سىزدىقبەكوۆكە قالا ەكونوميكاسىن ودان ءارى ءارتاراپتاندىرۋ, قوسىمشا ينۆەستيتسيا تارتۋ, سونداي-اق شاعىن جانە ورتا بيزنەستى قولداۋ شارالارىن كۇشەيتۋ جونىندە ناقتى تاپسىرمالار بەردى.