ەنەرگەتيكا ءمينيسترى الماسادام ساتقاليەۆ سەيسەنبى كۇنى ۇكىمەت وتىرىسىندا ەلدىڭ ەنەرگەتيكالىق كەشەنىنە قاتىستى جاعداي تۋرالى باياندادى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ءمينيستردىڭ ايتۋىنشا, تۇتاستاي العاندا قازاقستاننىڭ بىرىڭعاي ەلەكتر ەنەرگەتيكالىق جۇيەسى رەسەي جانە ورتالىق ازيا ەلدەرىنىڭ ەنەرگەتيكالىق جۇيەلەرىمەن قاتار قالىپتى جۇمىس ىستەپ تۇر.
ەلەكتر ستانتسيالارىنداعى جوندەۋ جۇمىستارىنىڭ كەستەسىنە سايكەس 2023 جىلى 9 ەنەرگوبلوكقا, 46 قازاندىققا جانە 46 تۋربيناعا كۇردەلى جوندەۋ جۇمىستارى اياقتالدى.
«بۇگىنگى تاڭدا ەلىمىزدە 220 ەلەكتر ستانتسياسى جۇمىس ىستەيدى, ونىڭ ىشىندە جالپى قۋاتى 2,8 گۆت بولاتىن 144 جاڭارتىلاتىن ەنەرگيا نىسانى بار. ستانتسيالىق جابدىقتاردىڭ توزۋىنىڭ ورتاشا دەڭگەيى 56% قۇرايدى», دەلىنگەن حابارلامادا.
ەنەرگەتيكالىق قاۋىپسىزدىكتى ساقتاۋ, سەنىمدى ەنەرگيامەن قامتاماسىز ەتۋ ءۇشىن, سونداي-اق ەلەكتر ەنەرگياسىن تۇتىنۋدىڭ جىل سايىنعى ءوسۋىن ەسكەرە وتىرىپ, جاڭا ەنەرگەتيكالىق قۋاتتاردى ىسكە قوسۋ جانە جۇمىس ىستەپ تۇرعان ەلەكتر ستانتسيالارىن جاڭعىرتۋ قاجەت.
«بەكىتىلگەن قۋات بالانسىنا سايكەس 2030 جىلعا قاراي ەلەكتر ەنەرگياسىنا قاجەتتىلىك 28,2 گۆت قۇرايدى, ال جاڭا قۋاتتاردى ىسكە قوسىپ ەسەپكە العانداعى قولدا بار قۋات 22 گۆت قۇرايدى. شامامەن 4 گۆت جاڭا قۋاتتى ىسكە قوسقاننىڭ وزىندە ەلەكتر قۋاتىنىڭ تاپشىلىعىنىڭ كولەمى 6 گۆت-تان اسادى. ەلىمىزدەگى وسى تاپشىلىقتى جابۋ جانە ەكسپورتتىق الەۋەتتى ارتتىرۋ ءۇشىن ەنەرگەتيكا مينيسترلىگى 35 گۆت-قا دەيىنگى قوسىمشا جاڭا گەنەراتسيالاۋ قۋاتتارىن ەنگىزۋدى كوزدەيتىن ەلەكتر ەنەرگەتيكاسىن دامىتۋ بويىنشا ءىس-شارالار جوسپارىن ازىرلەدى», دەپ حابارلادى مينيسترلىك.
وسىلايشا, قولدانىستاعى ەلەكتر ستانتسيالارىن قايتا قۇرۋ جانە كەڭەيتۋ ەسەبىنەن قوسىمشا 5,6 گۆت قامتاماسىز ەتىلەدى.
جوسپاردا قۋاتتىلىعى 6,7 گۆت بولاتىن جاڭا گەنەراتسيانىڭ قۇرىلىسى دا قاراستىرىلعان.
«يكەمدى گەنەراتسيانى تاڭداۋ بويىنشا اۋكتسيون اياسىندا اقتاۋ, اتىراۋ, اقتوبە, تاراز, قىزىلوردا, شىمكەنت قالالارىندا جالپى قۋاتى 2,4 گۆت بولاتىن جانار-جاعارماي قۇيۋ ستانتسيالارىن سالۋ جوسپارلانىپ وتىر. جەزقازعان قالاسىندا 2029 جىلدىڭ سوڭىنا دەيىن قۋاتتىلىعى 500 مۆت بولاتىن جاڭا جىلۋ ەلەكتر ورتالىعى سالىنادى», دەپ حابارلادى مينيسترلىك.