ەلوردادا وڭتۇستىك كورەيادا وتەتىن IV قىسقى جاسوسپىرىمدەر وليمپياداسىنا وتاندىق سپورتشىلاردى سالتاناتتى تۇردە شىعارىپ سالۋ ءراسىمى بولدى. تورتجىلدىقتىڭ باستى جارىسى 19 قاڭتار مەن 1 اقپان ارالىعىندا كانۆون پروۆينتسياسىنىڭ كاننىن قالاسىندا وتەدى.
سالتاناتتى ءىس-شاراعا تۋريزم جانە سپورت ءمينيسترى ەرمەك مارجىقپاەۆ, ۇلتتىق وليمپيادا كوميتەتىنىڭ وكىلدەرى, سپورت ارداگەرلەرى, فەدەراتسيا باسشىلارى مەن مەملەكەتتىك جاتتىقتىرۋشىلار قاتىسىپ, IV قىسقى جاسوسپىرىمدەر وليمپياداسىنىڭ اشىلۋ راسىمىندە تۋ ۇستايتىن سپورتشىلارعا ەل بايراعى سالتاناتتى تۇردە تاپسىرىلدى. جاسوسپىرىمدەر وليمپياداسىنىڭ اشىلۋ سالتاناتىندا ەلىمىزدىڭ بايراعىن شورت-ترەكتەن ەل چەمپيونى, سپورت شەبەرىنە ۇمىتكەر ەراسىل شىڭعىسحان جانە كونكيمەن جۇگىرۋ سپورتىنان سپورت شەبەرى, سونداي-اق ەل بىرىنشىلىگىنىڭ جەڭىمپازى كريستينا شۋماكوۆا الىپ شىعادى. ءوز كەزەگىندە ەراسىل شىڭعىسحان تۋ ۇستاۋشى رەتىندە كوپشىلىكتىڭ الدىنا شىعىپ, سالتاناتتى تۇردە انت بەردى.
جاسوسپىرىمدەر وليمپياداسىندا قازاقستاننىڭ جاسوسپىرىمدەر قۇراماسى سپورتتىڭ 5 تۇرىنەن باق سىناپ, 55 مەدال جيىنتىعىن ساراپقا سالادى. قىسقى ويىنداردا ەل نامىسىن 42 سپورتشى بياتلون, كەرلينگ, كونكيمەن جۇگىرۋ, شورت-ترەك, شاڭعى جارىسى, ترامپليننەن سەكىرۋ, تاۋ شاڭعىسى, شاڭعى قوسسايىسى, فريستايل موگۋل جانە شايبالى حوككەي سپورت تۇرلەرىنەن قورعايدى. سالتاناتتى جيىندا مينيستر ءسوز سويلەپ, سپورتشىلارعا ساتتىلىك تىلەدى.
«قۇرمەتتى سپورتشىلار, بارلىق كەزەڭنەن سۇرىنبەي ءوتىپ وڭتۇستىك كورەيانىڭ كانۆون قالاسىندا وتەتىن IV قىسقى جاسوسپىرىمدەر وليمپياداسىنا ەلىمىزدىڭ نامىسىن قورعاۋعا اتتانعالى تۇرسىزدار. الەمدەگى جەتەكشى سپورتشىلاردىڭ قاتارىنا كىرە الدىڭىزدار», دەدى ە.مارجىقپاەۆ.
ءمينيستردىڭ مالىمەتىنشە, ەلىمىز تاۋەلسىزدىك العالى جاسوسپىرىمدەر وليمپياداسىندا 29 مەدال جەڭىپ الدى, ونىڭ بەسەۋى – قىسقى وليمپيادادان.
«ەلىمىزدە قىسقى سپورت تۇرلەرىندە جەڭىسپەن ورىلگەن جاقسى ءداستۇر بار. بۇگىندە تەك ەلىمىزگە عانا ەمەس, بۇكىل الەمگە تانىمال داڭقتى سپورتشىلارىمىز حالىقارالىق قىسقى جارىستاردا ونەر كورسەتىپ, ۇنەمى جۇلدەگەرلەر قاتارىنان كورىنىپ ءجۇردى. ولاردىڭ قاتارىندا شاڭعىشى ۆلاديمير سميرنوۆ, كونكيمەن جۇگىرۋشى ليۋدميلا پروكاشەۆا, بياتلونشى ەلەنا حرۋستالەۆا, مانەرلەپ سىرعاناۋشىلار دەنيس تەن, ەليزاۆەتا تۇرسىنباەۆا بار. سىزدەر بۇل ويىندارعا قاتىسا وتىرىپ, زور تاجىريبە جينايسىزدار. وسى قۇندى تاجىريبە بولاشاقتا پايدالى بولاتىنى ءسوزسىز, ويتكەنى سىزدەر قازاقستان ۇلتتىق قۇراماسىنىڭ رەزەرۆى سانالاسىزدار. بۇگىن ءبىز ءداستۇرلى شىعارىپ سالۋ راسىمىنە قاتىسىپ وتىرمىز. سىزدەرگە الداعى جارىستا تەك ساتتىلىك تىلەيمىن. وسىعان دەيىن جيعان بار شەبەرلىكتەرىڭىزدى, قابىلەتتەرىڭىزدى پاش ەتىپ, جوعارى ناتيجە كورسەتۋلەرىڭىزگە جانە جەكە رەكوردتارىڭىزدى جاڭارتۋعا تىلەكتەسپىن! ءبىز سىزدەرگە جانكۇيەر بولىپ, جەڭىس تۇعىرىنان كورىنۋلەرىڭىزگە شىن نيەتپەن تىلەۋلەس بولامىز», دەدى مينيستر.
جارىستىڭ اشىلۋ سالتاناتى 19 قاڭتاردا كاننىن قالاسىنداعى «Gangneuung Oval» سپورت كەشەنىندە وتەدى. بۇل نىساندا كونكيمەن جۇگىرۋ سپورتىنان جارىستار ۇيىمداستىرىلادى. ال وليمپيادانىڭ جابىلۋ سالتاناتى 1 اقپان كۇنى سول «Gangneung Olympic Park» سپورت كەشەنىندە وتەدى دەپ جوسپارلانعان.
مينيسترلىكتىڭ مالىمەتىنشە, كانۆون-2024 قىسقى جاسوسپىرىمدەر وليمپياداسىنا 14 پەن 17 جاس ارالىعىنداعى الەمنىڭ 70 ەلىنەن 1 800 سپورتشى قاتىسادى. مۇندا 7 سپورت ءتۇرىنىڭ 15 باعدارلاماسى بويىنشا 81 مەدال جيىنتىعى ساراپقا سالىنادى.