ءال-فارابي اتىنداعى قازاق ۇلتتىق ۋنيۆەرسيتەتىندە ءبىلىم الدىم, اسپيرانتۋراسىندا, دوكتورانتۋراسىندا عىلىم ىزدەدىم, اسسيستەنت, وقىتۋشى, اعا وقىتۋشى, دوتسەنت, پروفەسسور, كافەدرا مەڭگەرۋشىسى, فاكۋلتەت دەكانى, وقۋ ءىسى جونىندەگى پرورەكتور قىزمەتتەرىن اتقاردىم. بۇگىندە ۋنيۆەرسيتەت جانىنداعى اباي عىلىمي-زەرتتەۋ ينستيتۋتىندا ديرەكتورمىن. سانالى عۇمىرىمنىڭ جارتى عاسىرى ۋنيۆەرسيتەت اۋديتورياسىندا ءوتتى. مەن ءۇشىن ۋنيۆەرسيتەتتىڭ ءوزى دە, اۋديتورياسى دا, وقىتۋشى-پروفەسسورلارى مەن قىزمەتكەرلەرى دە ارداقتى, اۋراسى ىزگى, ءبىلىمى مەن عىلىمى اياۋلى. مەنىڭ ۋنيۆەرسيتەتىم – ءومىرىمنىڭ وسىنداي قاسيەتتى قازىناسى.
قازاقستان تاۋەلسىز جاڭا مەملەكەت رەتىندە قالىپتاسىپ, ءتۇرلى بەل-بەلەستەردەن ءوتتى, مەملەكەتتىك باسقارۋدىڭ بارلىق سالاسى بويىنشا جەتىستىكتەرگە جەتتى. وسى جەتىستىكتەردىڭ باياندى, يگىلىكتى بولۋىنا ءال-فارابي اتىنداعى قازاق ۇلتتىق ۋنيۆەرسيتەتى زور ەڭبەك ءسىڭىردى. قازۇۋ ۇلتتىق جوعارى ءبىلىم مەن ۋنيۆەرسيتەتتىك عىلىمنىڭ جاڭا جۇيەسىن قالىپتاستىرىپ, دامىتۋدا, زامان تالابىنا ساي يننوۆاتسيالىق ءونىم وندىرۋدە, حالىق شارۋاشىلىعى ءۇشىن جوعارى ءبىلىمدى, جوعارى بىلىكتى ماماندار دايارلاۋدا, قازاقستاننىڭ ينتەللەكتاۋالدىق الەۋەتىنىڭ قارىشتاپ ءوسۋى, ەلدىڭ ىنتىماعى مەن بىرلىگىنىڭ نىعايۋى جولىندا ەرەن ەڭبەگىمەن دارالاندى.
1993 جىلدان 2000 جىلعا دەيىن فيلولوگيا فاكۋلتەتىنىڭ دەكانى بولىپ ەڭبەك ەتتىم. تاۋەلسىز قازاقستاننىڭ جوعارى ءبىلىم بەرۋ جۇيەسىندەگى وزگەرىستەرگە ساي ۋنيۆەرسيتەتتە فيلولوگيالىق ءبىلىم بەرۋ ءىسىنىڭ نورماتيۆتىك قۇجاتتارىن جاساۋعا تۋرا كەلدى. بۇل ايتۋعا وڭاي, ال ءىس جۇزىندە ۇجىمنىڭ بىرلەسكەن شىعارماشىلىق ەڭبەگىن, كۇش-جىگەرى مەن اقىل-وي قۋاتىن تالاپ ەتكەن ۇلكەن مىندەت ەدى. فاكۋلتەت ۇجىمى بۇل مىندەتتى تالاپقا ساي ورىندادى.
2001-2008 جىلدارى ۋنيۆەرسيتەتتىڭ وقۋ جانە ادىستەمەلىك جۇمىس جونىندەگى پرورەكتورى بولىپ جۇمىس ىستەدىم. وقۋ ءىسىنىڭ ساپاسىن ارتتىرۋعا, ۋنيۆەرسيتەتتىڭ ءبىلىم بەرۋ قىزمەتى سالاسىندا ساپا مەنەدجمەنتى جۇيەسىن جاساۋ مەن وندىرىسكە ەنگىزۋگە زور كوڭىل بولدىك. جوعارى جانە جوعارى بىلىمنەن كەيىنگى ءبىلىم بەرۋ دەڭگەيلەرى بويىنشا مەملەكەتتىك ۇلگىدەگى ديپلوم جوباسى جاسالدى. ول ءتيىستى مەملەكەتتىك اتقارۋ جۇيەسىندە بەلگىلى تارتىپتە بەكىتىلدى.
2009 جىلدان بەرى قاراي ءال-فارابي اتىنداعى قازاق ۇلتتىق ۋنيۆەرسيتەتى جانىنداعى اباي عىلىمي-زەرتتەۋ ينستيتۋتىنىڭ ديرەكتورى, پروفەسسور قىزمەتىن اتقارىپ كەلەمىن. وسى ۋاقىت ىشىندە اباي عىلىمي-زەرتتەۋ ينستيتۋتى تولىق قالىپتاسىپ, ءوز دامۋىنىڭ جاڭا كەزەڭدەرىنە قادام باستى. ينستيتۋتتىڭ عىلىمي-اقپاراتتىق رەسۋرستارى قالىپتاستى. اباي ينستيتۋتىنىڭ ۆەبسايتى اشىلىپ, وندا ابايدىڭ شىعارمالارى, ءومىرى مەن شىعارماشىلىعى تۋرالى جازىلعان ەڭبەكتەر جيناقتالدى. ينستيتۋت قىزمەتىندەگى ەلەۋلى جەتىستىكتەردى ناسيحاتتاۋ ءىسى كەڭ ءورىس الدى. ءۇش تىلدە (قازاق, ورىس, اعىلشىن) جۇمىس ىستەيتىن سايتتا تاۋلىگىنە ەكى مىڭعا جۋىق اقپاراتتىق رەسۋرس وقىلاتىن بولدى.
جارتى عاسىرىمدى ەسىگىن اشىپ, اۋديتورياسىنا كىرىپ, ءوزىم ءبىلىم الىپ, ءبىلىم وندىرۋگە, جاستارعا ءبىلىم بەرۋگە ارناعان ۋنيۆەرسيتەتىمە, ءبىلىم بەرگەن ۇستازدارىما, قاتار قىزمەت ەتكەن زامانداستارىما, كەيىنگى ىزدەنىمپاز جاستارعا شەكسىز قۇرمەتىمدى بىلدىرەمىن.
جانعارا دادەباەۆ,
فيلولوگيا عىلىمدارىنىڭ دوكتورى, پروفەسسور