جىل باسىنان بەرى ىزدەۋدە جۇرگەن 58 قىلمىسكەر ۇستالدى, دەپ حابارلايدى Egemen.kz Polisia.kz-كە سىلتەمە جاساپ.
ىشكى ىستەر مينيسترلىگىنىڭ جەدەل قىزمەتتەرى مەن بولىنىستەرى جىل باسىنان بەرى 58 قىلمىسكەردى ۇستاعان. ء ىىم كريمينالدىق پوليتسيا دەپارتامەنتى باستىعىنىڭ ورىنباسارى رۋسلان نازاروۆ قىلمىسكەرلەردىڭ اراسىندا ادام ولتىرگەن, جابىرلەنۋشىنىڭ دەنساۋلىعىنا قاساقانا جاراقات سالعان, الاياقتىق فاكتىسىمەن ىزدەۋدە جۇرگەندەر دە بار ەكەنىن ايتتى.
اقتاۋ قالاسىنىڭ پوليتسيا قىزمەتكەرلەرى كافەدەگى توبەلەستە جابىرلەنۋشىگە اۋىر دەنە جاراقاتىن سالعان كۇدىكتىنى ۇستادى. جانجال وتكەن جىلدىڭ قاراشا ايىندا بولعان. وزبەكستاننىڭ قۇقىق قورعاۋ ورگاندارى الماتى وبلىسىنىڭ كريمينالدىق پوليتسيا قىزمەتكەرلەرىمەن بىرلەسىپ ەكى ادامنىڭ ولىمىنە قاتىسى بار وزبەكستان ازاماتىن ۇستادى. ول 13 جىل بۇرىن ەڭبەكشىقازاق اۋدانىندا زەينەتكەرلەردىڭ ۇيىنە باسىپ كىرىپ, ولاردى ءولتىرىپ اقشا ۇرلاپ كەتكەن.
«ەلوردا پوليتسەيلەرى قوستانايلىق ارىپتەستەرىمەن بىرلەسىپ, 2020 جىلى استاناداعى جوبالىق تۇرعىن ءۇي كەشەنىندە پاتەرلەردى ينۆەستيتسيالاۋ جانە برونداۋ سىلتاۋىمەن 144 ۇلەسكەردىڭ اقشاسىن يەمدەنگەن جشس ديرەكتورى مەن قۇرىلتايشىسىن ۇستادى. قاسكوي تاعى ەكى باسقا جشس باسشىلارىمەن بىرگە 4 ملرد تەڭگەنى جىمقىرعان. سوڭعى اتالعاندار دا ۇستالىپ, تەرگەۋ جۇرگىزىلىپ جاتىر», دەپ جازىلعان اقپاراتتا.
جىل باسىنان بەرى ەلىمىزدىڭ كريمينالدىق پوليتسيا قىزمەتكەرلەرى حابار-وشارسىز كەتكەن 30 ادامدى انىقتادى.