پرەزيدەنت قاسىم-جومارت توقاەۆتىڭ ەل گازەتى – «Egemen Qazaqstan» گازەتىنە جاريالانعان سۇحباتىندا ادىلەتتى قازاقستاندى ورناتۋدىڭ ماڭىزى جان-جاقتى ايتىلىپ, ەلدىڭ سىرتقى جانە ىشكى ساياساتى, ىسكە اسىرىلىپ جاتقان ساياسي-ەكونوميكالىق رەفورمالاردىڭ بارىسى بايىپتالادى.
ەلدىڭ رۋحاني-مادەني ۇدەرىستەرى, سونداي-اق زاڭ ۇستەمدىگىن ورناتۋ, كادرلىق ساياساتتى ءتيىمدى جۇرگىزۋ سىندى ماڭىزدى ءىس-قيمىلداردان حاباردار بولدىق. حالىقتىڭ كوكەيىندە جۇرگەن سۇراقتارعا قاڭتار داعدارىسى, ەل تۇرعىندارىنىڭ قارىزعا باتۋى مەن قىمباتشىلىقتىڭ سەبەپ-سالدارىنا دا جاۋاپ تابامىز.
پرەزيدەنتتىڭ سوزىنشە, ەلدە ۇزاق جىل بويى قوردالانعان الەۋمەتتىك-ەكونوميكالىق پروبلەمانى شەشۋ ءۇشىن ساياسي-ەكونوميكالىق باعدارلامالاردى ىسكە اسىرۋدى قولعا العانىمەن, ىقپالدى لوببيستەر اشىق قارسىلىق ءبىلدىرىپ, وزدەرىنىڭ «ەرەكشە مارتەبەسىن» قورعاۋعا كىرىسكەن.
«جاۋ جاعادان العاندا, ءبورى –ەتەكتەن» دەگەننىڭ كەرىن كەلتىرىپ, كىسى ولىمىنە, توناۋ-ارباۋعا اپارعان جاعداي جادىمىزدان, ءسىرا, شىعا قويماس. قازاق نەبىر تار جول, تايعاق كەشۋدى باستان وتكەردى, بىراق باسسىزدىققا بارماعان, تەكتىلىگىن ساقتاعان ەدى.
ۇلت مۇددەسىن, ءتىلىن, ءدىنىن قورعاۋدا ەندى ەشكىم تاقىمىمىزدان تايدىرا المايدى, ويتكەنى ءبىزدىڭ ايقىن باعىتىمىز بار. ەندىگى جەردە حالىق بولىپ مەملەكەتكە قولداۋ كورسەتۋىمىز كەرەك, بۇل – ءاربىر ازاماتقا پارىز وتانعا دەگەن ادالدىق دەپ بىلەمىن.
سۇحباتتا حالىق اراسىندا ءجيى ايتىلاتىن قوس بيلىك, قوسارلانعان جۇيە تۋرالى دا تۇشىمدى جاۋاپ تابۋعا بولادى.
مەملەكەت باسشىسىنىڭ جاۋابىنان اڭعارعانىمىز, ەلدىڭ ىشكى ساياسي داعدارىسىنا ەسكى جۇيەدە تامىرىن تەرەڭ جايعان لوببيستەر اسەر ەتكەنىن, ءتىپتى وزدەرىنىڭ مۇددەسىن قورعاۋ ءۇشىن ەلدىڭ ىرگەسىن شايقاتىپ جىبەرۋگە دايىن بولعانىن, ساتقىندىققا, وپاسىزدىققا بارعان ادامدارعا كەشىرىم جوقتىعىن بىلدىك.
پرەزيدەنت قاسىم-جومارت توقاەۆ وتپەلى كەزەڭدەگى ساياسي-ەكونوميكالىق داعدارىستاردىڭ سەبەبىن تالداپ, سالدارىن سارالاۋمەن قاتار, الدىمىزعا ناقتى مىندەتتەر قويدى. اۋقىمدى باستامالار قوعامداعى ادىلەتتىلىك قاعيداتتارىمەن جۇزەگە اسسا, حالىقتىڭ الەۋمەتتىك جاعدايى دا جاقساراتىنىن ايتتى. ياعني ءبىزدىڭ الدىمىزدا تۇرعان ماڭىزدى مىندەتتىڭ ءبىرى – زاڭنىڭ مۇلتىكسىز ورىندالۋىن, ءتارتىپتىڭ قاتاڭ ساقتالۋىن قامتاماسىز ەتۋ.
ەكىنشىدەن, ەل ازاماتتارىنىڭ تۇرمىس ساپاسىن ءىس جۇزىندە جاقسارتۋ ماڭىزدى. ۇشىنشىدەن, ينۆەستيتسيا بولسا, ەكونوميكا قارقىنى ۇدەي تۇسەدى جانە جاڭا مۇمكىندىكتەر پايدا بولادى. تورتىنشىدەن, «قازىنا قاراجاتىنا» دەگەن كوزقاراسىمىزدى وزگەرتىپ, ونى ءتيىمدى, جونىمەن ءارى ۇنەمدەپ جۇمساۋعا ءتيىسپىز. بەسىنشىدەن, ۇلت ءۇشىن اسا ماڭىزدى شەشىمدەر رەفەرەندۋم ارقىلى عانا قابىلدانادى.
كونستيتۋتسيالىق رەفورمالارعا ساي ساياسي رەفورمالار كەزەڭ-كەزەڭىمەن ىسكە اسا باستادى. مۇنىڭ كورىنىسىن كوپپارتيالى پارلامەنت جاساقتالعانىنان كورۋگە بولادى. سونداي-اق ۇكىمەتتىڭ وكىلەتتىلىگى كەڭەيە ءتۇستى. ەندى پرەزيدەنت اكىمشىلىگى ەلدىڭ الەۋمەتتىك-ەكونوميكالىق دامۋىنا قاتىستى ستراتەگيالىق باعىتتارعا جاۋاپ بەرمەيدى, ساياسي شتاب رەتىندە جۇمىس ىستەيدى. ياعني ءتۇرلى سالاعا قاتىستى شەشىمدەردى قابىلداۋ قۇقىعى ۇكىمەتكە ءوتتى. ايماقتاردىڭ بيۋدجەتكە قاتىستى دەربەستىگى ارتا ءتۇستى. مۇنىڭ ءبارى اتقارۋشى بيلىكتىڭ جاۋاپكەرشىلىگىن ارتتىرىپ, سايلاۋشىلار سەنىم بىلدىرگەن وكىلدى ورگان «باقىلاۋشى قىزمەتىن» ىسكە اسىراتىن ساياسي قۇرىلىم رەتىندە ىلگەرىلەپ, قوعامدى دەموكراتيالاندىرۋدا شەشۋشى ءرول اتقارادى.
سۇحباتتان يدەولوگيالىق سۇراقتارعا دا جاۋاپ الدىق. جوشى ۇلىسىنىڭ 800 جىلدىعىن دايەكتەپ, مىڭجىلدىقتارمەن ساباقتاسقان تاريحىمىزدى تەرەڭدەتۋدى نۇسقادى. ەۋرازيا قۇرلىعىندا يمپەريا دەڭگەيىندەگى قاعاناتتى ءتول تاريحىمىزدىڭ ءبىر بولشەگى رەتىندە دارىپتەپ, تاريحي سانانى دايەكتەپ مەملەكەتشىلدىكتى ارتتىرۋ ماڭىزدى دەپ بىلەمىز. ءتىپتى ۇلى دالادا سالتانات قۇرعان ساق, عۇن قاعاناتتارىنىڭ ۇلى ماقساتىندا جاستارعا ۇعىندىرۋ كۇن تارتىبىندە تۇر. وتاندىق 200-دەن استام, شەتەلدىك 60-قا جۋىق عالىم جۇمىلدىرىلىپ, تىڭعىلىقتى جازىلىپ جاتقان قازاقستان تاريحىنىڭ كوپتومدىعى – سونداي جۇيەلى جۇمىستىڭ ءبىرى. پرەزيدەنتتىڭ تۇپكى ويى وسىعان سايادى.
پاراساتى ايقىن, ويى كەمەل, ءسوزى جۇيەلى سۇحباتتى ىجداعاتپەن وقىپ, الداعى باعىت-باعدارىمىزدى مەجەلەدىك. پرەزيدەنتتىڭ سۇحباتتاعى تۇجىرىمدامالارى ۇلتتىق يدەولوگيامىزدىڭ ۇستىنى مەن ۇستانىمىنا اينالۋعا ءتيىس.
رۋسلان رۇستەموۆ,
سەنات دەپۋتاتى