قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ الماتى جانە قوناەۆ گارنيزوندارىندا اسكەري ينفراقۇرىلىم نىساندارى مەن مەديتسينالىق-الەۋمەتتىك مەكەمەلەردە بولدى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
قورعانىس ءمينيسترى دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەەۆتىڭ اسكەري نىسانداردىڭ جاي-كۇيى مەن ولاردى جايلاستىرۋ جوسپارلارى تۋرالى بايانداماسىن تىڭدادى. ول ءدشا قولباسشىسى باسقارماسىنىڭ شتابىن كوشىرۋگە جوسپارلانعان عيماراتتى ارالاپ كورىپ, اۋىر اۆتوكولىكتەر مەن ساۋىتتى ماشينالار قوزعالىسى ءۇشىن كوپىر سالىناتىن الاڭعا باردى.
قۇرلىق اسكەرلەرىنىڭ اسكەري ينستيتۋتىنا بارعان كەزىندە گەنەرال-پولكوۆنيك رۋسلان جاقسىلىقوۆ ء«الي» وقۋ ورتالىعى پوليگونىنىڭ, عيماراتتارى مەن قۇرىلىستارىنىڭ «ايبىن» حالىقارالىق اسكەري-پاتريوتتىق جاستار جيىنىن وتكىزۋگە دايىندىعىن تەكسەردى.
گەنەرال-پولكوۆنيك رۋسلان جاقسىلىقوۆ مەملەكەتتىك اسكەري-تاريحي مۋزەيدىڭ الماتى فيليالىنىڭ باسشىسى الۋا بايقاداموۆامەن كەزدەستى. ول قازاقتىڭ قاھارمان ۇلدارى ساعادات نۇرماعامبەتوۆ پەن راحىمجان قوشقارباەۆتىڭ 100 جىلدىعىنا ارنالعان ءىس-شارالاردى ساپالى وتكىزۋ قاجەتتىگىنە نازار اۋداردى. سونداي-اق مينيستر ۇلى وتان سوعىسى باتىرلارى وسيەت ەتكەن داستۇرلەردى ساقتاۋدىڭ جانە قارۋلى كۇشتەر ارداگەرلەرىنىڭ باعا جەتپەس تاجىريبەسىن جاس ۇرپاققا جەتكىزۋدىڭ ماڭىزدىلىعىن اتاپ ءوتتى.
قوناەۆ گارنيزونىندا قورعانىس ۆەدومستۆوسىنىڭ باسشىسى 20030 اسكەري ءبولىمىنىڭ وقۋ كورپۋسىن, كازارماسىن جانە سپورت قالاشىعىن تەكسەردى. 32363 اسكەري بولىمىندە ول مەديتسينالىق روتا قۇرىلىسىنىڭ بارىسىمەن جانە كلۋبتىڭ تەحنيكالىق جابدىقتالۋىمەن تانىستى.
سونداي-اق گەنەرال-پولكوۆنيك رۋسلان جاقسىلىقوۆ «بالداۋرەن» بالالاردى وڭالتۋ ورتالىعىندا بولىپ, اسكەري قىزمەتشىلەر مەن ولاردىڭ وتباسى مۇشەلەرىن ەمدەۋ, قالپىنا كەلتىرۋ جانە دەمالۋ ءۇشىن جاسالعان جاعدايلارمەن تانىستى.
ساپار قورىتىندىسى بويىنشا قورعانىس ءمينيسترى اسكەري ينفراقۇرىلىمدى جەتىلدىرۋ, جاۋىنگەرلىك دايىندىقتى ارتتىرۋ جانە اسكەري قىزمەتشىلەر ءۇشىن الەۋمەتتىك-تۇرمىستىق جاعدايلاردى جاقسارتۋ جونىندە بىرقاتار تاپسىرما بەردى.