عىلىم جانە جوعارى ءبىلىم ءمينيسترى ساياسات نۇربەك ۇلتتىق بىرىڭعاي تەستىلەۋگە (ۇبت) قاتىستى ءوزىنىڭ Telegram ارناسىندا مالىمدەمە جاسادى, دەپ حابارلايدى Egemen.kz.
«سىزدەر ءۇشىن ۇبت-2024 وزگەرىسسىز قالاتىندىعىن قۋانا حابارلايمىن. تەستىلەۋدە سىزدەر تەك ەكى ءپان تاپسىراسىزدار: قازاقستان تاريحى (20 تاپسىرما, شەكتى بالل – 5) جانە وقۋ ساۋاتتىلىعى (10 تاپسىرما, شەكتى بالل – 3). تاپسىرمالاردى ورىنداۋ ۋاقىتى – 70 مينۋت. ال شىعارماشىلىق ەمتيحاندار جوعارى وقۋ ورىندارىندا وتەدى», دەپ جازدى مينيستر.
بۇل شەشىم تالاپكەرلەردىڭ قالاۋى مەن بەيىندى ۆەدومستۆولاردىڭ ساراپتامالىق پىكىرى نەگىزىندە قابىلداندى.
«وتكەن جىلى عىلىم جانە جوعارى ءبىلىم مينيسترلىگى نەگىزگى ۇبت-نى ەكى رەت تاپسىرىپ, ۇزدىك ناتيجەمەن گرانت تاعايىنداۋ كونكۋرسىنا قاتىسۋ مۇمكىندىگىن رەسمي تۇردە بەكىتكەنىن ەسكە سالامىن. ەگەر اقىلى نەگىزدە ءتۇسۋ ءۇشىن ۇبت تاپسىرۋدىڭ تاعى ءۇش مۇمكىندىگى (قاڭتار, ناۋرىز, تامىز) بار ەكەنىن ەسكەرەتىن بولساق, وندا 2024 جىلعى تالاپكەرلەر تەستىلەۋدەن بەس رەت وتە الادى», دەپ ءتۇسىندىردى س.نۇربەك.