تۋريزم جانە سپورت ءمينيسترى ەرمەك مارجىقپاەۆ ۆولەيبول فەدەراتسياسىنىڭ باسشىلارىمەن جانە جاتتىقتىرۋشىلار شتابىمەن كەزدەستى. جيىن بارىسىندا فەدەراتسيا وكىلدەرى ۆولەيبولدان ۇلتتىق قۇرامالاردىڭ 2023 جىلعى ناتيجەلەرىن قورىتىندىلاپ, الداعى جارىستارعا دايىندىق جوسپارىن تانىستىردى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
قازاقستاندا ۆولەيبول بۇقارالىق سپورت ءتۇرى رەتىندە كەڭ قانات جايىپ كەلەدى. بۇگىندە رەسپۋبليكا بويىنشا 14 مىڭ ۆولەيبول سەكتسياسى جۇمىس ىستەيدى. وندا 600 مىڭنان استام بالا اتالعان سپورت تۇرىمەن تۇراقتى شۇعىلدانادى. ۆولەيبولدان قازاقستان ۇلتتىق قۇراماسى ەڭ كەيىنگى ءىرى جارىستا سۇرەڭسىز ونەر كورسەتىپ, جۇلدەگەرلەر قاتارىنان كورىنە المادى. ەسەسىنە, جاعاجاي ۆولەيبولىنان ەل قۇراماسى ءۇشىنشى ورىنعا تابان تىرەدى. ۆولەيبول بويىنشا بيىلعى پاريج وليمپياداسىنا جولداما بەرەتىن بارلىق ىرىكتەۋ ءتۋرنيرى اياقتالدى, بىراق جولداما بۇيىرعان جوق.
«ۆولەيبولشىلارىمىزدىڭ حالىقارالىق ارەنادا كورسەتىپ جۇرگەن ناتيجەلەرى كوڭىل كونشىتپەيدى. كلۋبتار اراسىنداعى بىرىنشىلىكتەردى ەسەپكە الماعاندا, جەرلەستەرىمىز بىرنەشە جىلدان بەرى ازيا چەمپيوناتتارىندا جۇلدەگەرلەر قاتارىنان كورىنە الار ەمەس. ەرلەر اراسىنداعى ۇلتتىق قۇرامامىز سوڭعى رەت 2017 جىلى, ايەلدەر 2005 جىلى كۇمىس مەدال جەڭىپ العان بولاتىن. پاريجدەگى وليمپيا ويىندارىنا قاتىسۋ ءۇشىن ءبىز الەمدىك رەيتينگتە توپ-5 قۇرامانىڭ قاتارىنا ەنۋىمىز كەرەك ەكەنى بەلگىلى. الايدا, قازىرگى تاڭدا ايەلدەر قۇراماسى الەمدىك رەيتينگتە 32-ءشى, ال ەرلەر قۇراماسى 59-ورىندا تۇر. ياعني, ۆولەيبول سپورتى بويىنشا بىزدە پاريج وليمپياداسىنا قاتىسۋعا مۇمكىندىك جوق دەپ ايتۋعا بولادى», دەدى ەرمەك مارجىقپاەۆ.
قازاقستان ۆولەيبول فەدەراتسياسىنىڭ وكىلدەرى نەگىزگى ماسەلەنى دە بۇككەن جوق. بار كىلتيپان –ۇلتتىق قۇراما ويىنشىلارىنىڭ شاۋ تارتا باستاعانىندا ەكەن. نەگىزگى قۇرامداعى ويىنشىلاردىڭ دەنى 30-دان اسىپ كەتكەن. ۇلتتىق ليگانىڭ دا دەڭگەيى تومەن, الەمدىك ولشەمگە ساي كەلمەيتىن كورىنەدى. مينيستر فەدەراتسيا وكىلدەرىنە ۆولەيبول سپورتىن دامىتىپ, وڭىرلەردى ىنتالاندىرۋدى, ەل بىرىنشىلىگىنىڭ دەڭگەيىن كوتەرۋدى جۇكتەدى. جاس سپورتشىلاردى دايارلاۋدىڭ جاڭاشىل ءادىسىن قولدانۋ قاجەتتىگىن ايتتى.