مەملەكەت باسشىسى ارال تەڭىزىنىڭ قۇرعاعان تابانىنداعى جالپى اۋماعى 1,1 ميلليون گەكتارعا 2025 جىلعا دەيىن ورمان مەليوراتسيالىق ەكپەلەر ەگۋدى مىندەتتەگەن. سەكسەۋىل شىعىمىن بارىنشا ارتتىرۋ ءۇشىن ورمان مەليوراتسيالىق جۇمىستار عىلىمي ۇسىنىمدار مەن جۇمىس جوبالارى (نەگىزگى ادىستەرى مەحانيكالاندىرىلعان سەبۋ جانە وتىرعىزۋ) نەگىزىندە جۇرگىزىلەدى. ويتكەنى, ارال تەڭىزى ءتۇبىنىڭ قازاقستان تۇسىنداعى بولىگى وزبەك تاراپى اۋماعىمەن سالىستىرعاندا تۇزدى, دەپ حابارلايدى Egemen.kz ەكولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتىنە سىلتەمە جاساپ.
عىلىم 3 ءتيپتى توپىراقتا سەكسەۋىل, 4 ءتيپتى توپىراقتا گالوفيتتى وسىمدىكتەر (قاراباق, ساراسازان) ەگۋدى (وتىرعىزۋدى) ۇسىنادى.
ارال تەڭىزىنىڭ تۇبىندە سەكسەۋىل وتىرعىزۋ ءۇشىن 753 مىڭ گەكتار جەردىڭ توپىراعى زەرتتەلدى.
ارالدىڭ قۇرعاعان تۇبىندە ەكپە جۇمىستارىن جۇرگىزۋ ءۇشىن تۇقىمداردى ەگۋگە جانە وسىرۋگە دايىنداۋ ينفراقۇرىلىمى جاسالىپ, قاجەتتى ارنايى تەحنيكا ساتىپ الىندى.
ۆەدومستۆو مەن قىزىلوردا وبلىسى اكىمدىگىنىڭ كۇشىمەن سوڭعى ءۇش جىلدا 544,5 مىڭ گا ورمان ەگىلگەن. بيىل تاعى 275 مىڭ گەكتارعا ەكپە جۇمىستارىن جۇرگىزۋ جوسپارعا الىنعان.
ارال تەڭىزىنىڭ تارتىلۋى جاھاندىق پروبلەما ەكەنىن ەسكەرە وتىرىپ, مينيسترلىك حالىقارالىق ۇيىمدارمەن ىنتىماقتاسا جۇمىس ىستەپ كەلەدى.
2021 جىلدىڭ جاز-كۇز مەزگىلدەرىندە وزبەكستان مەن قازاقستان ماماندارى ارال تەڭىزىنىڭ تۇبىنە سەكسەۋىل مەن باسقا دا اعاشتاردى وتىرعىزۋ بويىنشا تاجىريبە الماسىپ, تىعىز ىنتىماقتاستىق ءۇشىن مەموراندۋمعا قول قويىلدى.
سەكسەۋىلدى تۇزدى جانە قۇمدى توپىراقتارعا وتىرعىزۋ ءۇشىن عىلىم ءتۇرلى تەحنولوگيالاردى قولدانۋدى ۇسىنادى. ول ءۇشىن 150 گا اۋماقتا تاجىريبەلىك ۋچاسكە قۇرىلىپ, جابىق تامىر جۇيەسىمەن وتىرعىزۋ جانە ءوسۋ ستيمۋلياتورلارىن (گيدروگەل) پايدالانىپ تۇقىم سەبۋ سياقتى ادىستەر قولدانىلىپ كەلەدى.
وتىرعىزۋ ماتەريالىنىڭ تەز بەيىمدەلۋى جانە شىعىمىنىڭ جوعارى بولۋى ءۇشىن جۋىردا ارال تەڭىزىنىڭ تۇبىندە اۋدانى 33 گا ورمان پيتومنيگىنىڭ قۇرىلىسىن اياقتاۋ جوسپارلانىپ جاتىر. اتالعان پيتومنيك ەلوردالىق «رەسپۋبليكالىق ورمان سەلەكتسيالىق تۇقىم ءوسىرۋ ورتالىعى» رمقك ءۇشىن تاجىريبەلىك الاڭ رەتىندە جۇمىس ىستەپ, وندا ورمان تۇقىمدارىنىڭ گەنەتيكالىق بانكى, ونىڭ ىشىندە ارال تەڭىزىنىڭ تۇبىندەگى قولدان جاسالعان ورمانداردىڭ نەگىزگى ءتۇرى بولاتىن سەكسەۋىل تۇقىمدارى ساقتالادى.