بۇعان دەيىن ەلىمىزدە باسسەيندىك ينسپەكتسيا قىزمەتكەرلەرىنىڭ سانى 98 ادام بولعان بولسا, قازىر جالپى شتات سانى 242 ادامعا جەتىپ وتىر, دەپ حابارلايدى Egemen.kz سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنە سىلتەمە جاساپ.
بۇل رەسپۋبليكانىڭ ءاربىر وبلىس ورتالىعىندا باسسەيندىك ينسپەكتسيا بولىمدەرىن اشۋعا مۇمكىندىك بەردى. بيىل ۇلىتاۋ جانە جەتىسۋ وبلىستارى بويىنشا باسسەيندىك ينسپەكتسيا بولىمدەرى, سونداي-اق اقتوبە, باتىس قازاقستان, ماڭعىستاۋ جانە تۇركىستان وبلىستارىنداعى بولىمدەر قوسىلادى.
بۇدان بولەك, جاڭا سۋ كودەكسىندە باسسەيندىك ينسپەكتسيالارعا قاداعالاۋ فۋنكتسيالارىن بەرۋ قاراستىرىلعان. ال كاسىپكەرلىك كودەكس سۋ رەسۋرستارىن باسقارۋ ورگاندارى جەدەل دەن قويۋ شارالارىن قابىلداي الاتىن نورمالارمەن تولىقتىرىلىپ جاتىر.
«قازاقستاننىڭ سۋ رەسۋرستارىن قورعاۋ ماسەلەسى كۇن تارتىبىندە تۇر. سۋدىڭ «قارا نارىعىن» جويۋ جانە ونىڭ پايدالانۋىن باقىلاۋدى قامتاماسىز ەتۋ ءۇشىن ءبىز باسسەيندىك ينسپەكتسيالار شتاتىن ارتتىردىق, سونىمەن قاتار ولاردىڭ ماتەريالدىق-تەحنيكالىق بازاسىن جاقسارتۋدى جوسپارلاپ وتىرمىز. بۇل شارالار بىزگە مۇمكىندىگىنشە كوپ سۋ ايدىندارىن قامتۋعا مۇمكىندىك بەرەدى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.