امان تولەەۆتىڭ سەنىمدى وكىلى قازاقستان حالقىنا العىسىن ايتتى

امان تولەەۆ رەسەي پريەزيدەنتتىگىنە 3 مارتە كانديداتۋراسىن ۇسىندى. كومىرلى ايماق كەمەر وبلىسىن 1997 جىلدان باستاپ باسقارعان قايراتكەر 2018 جىلى وبلىس ورتالىعىنداعى ساۋدا-ساتتىق كەشەنىندە بىرنەشە ادامنىڭ ءومىرىن جالماعان ورتتەن كەيىن مەرزىمىنەن بۇرىن قىزمەتىنەن كەتۋگە ارىزىن جازدى. بىلتىر قاراشا ايىندا 79 جاسىندا اۋىر ناۋقاستان قايتىس بولدى.    

الەۋمەتتىك جەلىدە تاراعان بەينە ۇندەۋىندە امان تولەەۆتىڭ ۇزاق جىل سەنىمدى وكىلى بولعان زينايدا ابدۋلوۆا «حالىقتىق گۋبەرناتور» اتاعىن العان قايراتكەردى اقتىق ساپارعا اتتاندىرۋ ءراسىمى قالاي بولعانىن باياندادى.

«قۇرمەتى قازاقستان حالقى, قادىرلى وتانداستار! اللانىڭ رازىلىعى ءۇشىن  مۇسىلمان باۋىرلارىمىز كەلىپ امان تولەەۆتىڭ جەرلەۋ ءراسىمىن وتكىزىپ, ارۋلاپ كومدى. مۇسىلماندىق جورالعىمەن جانازا نامازى وقىلىپ جەرلەگەن سوڭ اماننىڭ ءوزى سالعان كۋزباستاعى مەشىتتە قۇران باعىشتالدى. كۋزباستاعى مۇسىلمان قاۋىمنىڭ ىقىلاسىمەن اماننىڭ اناسىنىڭ اتىنا بەرىلگەن بولاتىن بۇل قۇلشىلىق ءۇيى. 

امان  باسشىلىق قىزمەت اتقارعاندا كۋزباستا 20 مەشىت سالىندى. 21-ءىنشى مەشىت سالىنىپ جاتىر. امان ونىڭ قۇرىلىسىن اياقتاۋعا ۇلگەرمەدى. ءبىز بۇل مەشىتتىڭ دە ەل يگىلىگىنە بەرىلەتىنىنە سەنەمىز.

تامىرىندا قازاق دەيتىن قانى ويناپ تۇرعان ازامات ءبىر ساتكە دە قاراقان باسىنىڭ قامى ءۇشىن ءومىر سۇرگەن جوق, ەلگە بولسا, حالىققا پايدام تيسە دەپ ءوتتى ومىردەن. مەن 40 جىلعا جۋىق قاناتتاسىپ قاسىندا بولدىم, مۇنداعى حالىقتىڭ امان تولەەۆكە دەگەن قۇرمەتى ەرەكشە, «بىزدە ءدال مۇنداي گۋبەرناتور بولعان دا, باسقارعان دا جوق»  دەپ باعالاۋى مەرەيىمىزدى وسىرەدى. امان تاتارستان استاناسى قازانداعى قۇل ءشارىپ مەشىتىنىڭ سالىنۋىنا, الماتى  قالاسىنداعى  بەكەت اتا مەشىتىنىڭ بوي كوتەرۋىنە دە سەبەپكەر بولدى. قانشاما كومەك سۇراۋشىلارعا قولداۋ كورسەتتى. كىمنەن قانداي شاعىم تۇسسە دە جاۋاپسىز قالدىرعان جوق, بارلىعىنا بولىستى.

قازاقستاننان كەلىپ مۇسىلماندىق سالتپەن جونەلتۋگە قولداۋ كورسەتكەن ازاماتتارعا وتباسى اتىنان زور العىسىمىزدى ايتامىز. امان تولەەۆ قالاي جەرلەندى دەگەن دە اڭگىمە قوعامدا ابىڭ-كۇبىڭ اڭىس تۋدىردى. قازاقستاننان مۇسىلمان باۋىرلارىمىز ارنايى كەلىپ, جانازا نامازىنا قاتىسىپ, مەشىتتە قۇران باعىشتاپ, مۇسىلماندىق سالتپەن  جەرلەنگەنىنە كۋا بولدى», دەدى كەمەر وبلىسىندا مەشىت قۇرىلىسىن ۇيلەستىرۋ جونىندە سەنىمدى وكىل قىزمەتىن اتقارعان زينايدا ابدۋلوۆا. ول وسىنداي ءبىرتۋار ازاماتتى ومىرگە اكەلگەن قازاق ەلىنە العىسىن جەتكىزىپ, امان تولەەۆتى جوقتاپ كەلۋشىلەرگە قاشاندا قاراشاڭىراقتىڭ ەسىگى اشىق ەكەنىن ايتتى.