قازاقستان fDi Intelligence ساراپشىلارىنىڭ ازيا, افريكا, تاياۋ شىعىس, ەۋروپا ەلدەرى ينۆەستيتسيالىق تارتىمدىلىعىنا قاتىستى جۇرگىزگەن زەرتتەۋىنىڭ قورىتىندىسى بويىنشا رەيتينگتە التىنشى ورىن الدى.
وندا حالىقارالىق ۆاليۋتا قورى fDi Markets تىكەلەي شەتەلدىك ينۆەستيتسيالار (تشي) مونيتورينگى دەرەكتەرى نەگىزىندە 50 ءىرى الەمدىك باعىتتاعى شەتەلدىك ينۆەستيتسيالاردىڭ تراەكتورياسى مەن ماكروەكونوميكالىق كورسەتكىشتەرى ەسكەرىلىپ, باعالاندى. بۇگىنگى الەم پاندەميادان كەيىنگى قالپىنا كەلۋ ۇدەرىسىن باستان وتكەرىپ جاتىر.
ساراپشىلاردىڭ پىكىرىنشە, 2023 جىلى ازيا ەلدەرى وڭ ناتيجە كورسەتتى. العاشقى وندىقتاعى التى پوزيتسيادا ازيا ەلدەرى تۇر. رەيتينگتە ءبىرىنشى ورىندى كامبودجا الادى. ودان كەيىن فيليپپين, ءتورتىنشى ورىندا – يراك, التىنشى ورىندا – قازاقستان, جەتىنشى ورىندا – ازەربايجان, ونىنشى ورىندا ءۇندىستان ورنالاسقان. توپ-10 قاتارىنا ءۇش افريكالىق مەملەكەت ەنگەن. ولار كەنيا ء(ۇشىنشى ورىن), ناميبيا (بەسىنشى ورىن), ماروككو (سەگىزىنشى ورىن).
حۆق بولجامى بويىنشا بيىل ىشكى جالپى ءونىم ءوسىمى 6,1 پايىزدى قۇرايدى (2023 جىلعى 5,6 پايىزبەن سالىستىرعاندا) جانە كەلەر جىلى كامبودجا وڭتۇستىك-شىعىس ازياداعى ەكونوميكاسى ەڭ جەدەل دامىعان ەلگە اينالادى. ال ينفلياتسيا تۋرا 2023 جىلعىداي 2024 جىلى دا 3 پايىز دەڭگەيىندە ساقتالادى. قۇرىلىمدىق جانە تسيكلدىك فاكتورلار ەلدەردىڭ ەكونوميكالىق كورسەتكىشتەرىنە اسەر ەتكەن.
FDI Standouts Watchlist-ءتىڭ جىل سايىنعى زەرتتەۋ دەرەگىنشە, شەتەلدىك ينۆەستيتسيا سالاسىنداعى اۋتسايدەر كامبودجا ەڭ كۇشتى ينۆەستيتسيالىق دەڭگەيىن ساقتايدى. بۇل مەملەكەت قىتايمەن, وڭتۇستىك كورەيامەن ەركىن ساۋدا بايلانىسى كەلىسىمىن جاساسقاننان كەيىن ساۋدا قاتىناستارىن نىعايتتى. ەكى ەلمەن كەلىسىم دە 2022 جىلى كۇشىنە ەنگەن بولاتىن.
قازاقستان بۇرىنعى كەڭەستىك كەڭىستىك ەلدەر اراسىندا تىكەلەي شەتەلدىك ينۆەستيتسيا تارتۋدان كوشباسشىلىق پوزيتسيادا تۇر. ورتالىق ازيا ەلدەرى اراسىنداعى ۇلەسى – 61 پايىز. سىرتقى ىستەر مينيسترلىگى ينۆەستيتسيا كوميتەتىنىڭ اقپاراتى بويىنشا 2023 جىلدىڭ قاڭتارىنان بەرى جالپى ينۆەستيتسيالىق قۇنى 602 ملرد تەڭگە بولاتىن 59 ينۆەستيتسيالىق كەلىسىمشارت جاسالعان.