مەملەكەت باسشىسى قاسىم-جومارت توقاەۆتىڭ «Egemen Qazaqstan» گازەتىنە بەرگەن سۇحباتىندا ەلىمىزدىڭ دامۋى مەن بولاشاعىنا بەتبۇرىسىن ايقىنداپ بەردى. الدىمىزدا بيىك ماقساتتار تۇر. بۇل – ەل مۇددەسىن قامتاماسىز ەتۋ جانە وتانداستارىمىزدىڭ ەكونوميكالىق ءال-اۋقاتىن ارتتىرۋ.
وسى ورايدا ايتىلعان نەگىزگى ءۇش باعىتقا توقتالعىم كەلىپ وتىر. بىرىنشىدەن, ەلىمىزدىڭ وركەندەۋىنە جول اشاتىن بىرقاتار ناقتى مىندەتتى شەشۋ قاجەت. سونداي مىندەتتىڭ ءبىرى – اۋقىمدى ونەركاسىپ جوبالارىن جۇزەگە اسىرۋ. بۇل جوبالار ءىرى بيزنەس وكىلدەرىمەن, ينستيتۋتسيونالدى ينۆەستورلارمەن جانە ساراپشىلارمەن بىرگە پىسىقتالىپ, ناقتى جۇمىستار جاسالىناتىن بولادى.
تاعى ءبىر ماڭىزدى مىندەت – ينۆەستيتسيالاردى تارتۋ. بۇل مىندەتتى ورىنداۋعا جەكەشەلەندىرۋ جانە اكتيۆتەردى قايتارۋ ناۋقاندارى دا سەپتىگىن تيگىزەدى. قوماقتى ينۆەستيتسيا بولسا, ەكونوميكا قارقىنى ۇدەي تۇسەدى جانە جاڭا مۇمكىندىكتەر پايدا بولادى.
ەكىنشى, «قازىنا قاراجاتىنا» دەگەن كوزقاراسىمىزدى وزگەرتىپ, ونى ءتيىمدى, جونىمەن ءارى ۇنەمدەپ جۇمساۋعا ءتيىسپىز. بۇل رەتتە مەملەكەتتىك ساتىپ الۋ ءىسىن جانە مەملەكەت پەن جەكە سەكتوردىڭ سەرىكتەستىگىن رەتتەيتىن جاڭا زاڭدار ەلەۋلى ءرول اتقارادى. وسى قۇجاتتار مەملەكەتتىك ساتىپ الۋ ءىسىنىڭ اشىق بولۋىن دا قامتاماسىز ەتەدى. سونداي-اق ەكونوميكانى دامىتۋعا قاجەتتى قاراجات قورىن قالىپتاستىرۋعا سەپتىگىن تيگىزەدى.
ۇشىنشىدەن, وڭىرلەردىڭ وزەكتى ينفراقۇرىلىمدىق پروبلەمالارىن شەشۋ جانە تۇتاستاي العاندا ەلدىڭ ەنەرگەتيكالىق قاۋىپسىزدىگىن قامتاماسىز ەتۋ تۋرالى ءسوز بولدى. وسى سالاداعى تۇيتكىلدەر ءبىر كۇندە اياقاستىنان پايدا بولا قالعان جوق. ونىڭ ءبارى جىلدار بويى قوردالانعان ماسەلەلەر ەكەندىگى بارشاعا ءمالىم. وڭىرلەردەگى جىلۋ ورتالىقتارى مەن باسقا دا قۇرال-جابدىقتاردىڭ 80 پايىزى ابدەن توزعان. وتكەن جىلداردا كوممۋنالدىق شارۋاشىلىققا سالىنعان ينۆەستيتسيا بۇل سالانىڭ قاجەتىن وتەۋگە جەتكىلىكسىز بولدى. بۇكىل قازاقستانداعى ينجەنەرلىك ينفراقۇرىلىمدى تولىق جاڭعىرتۋ – وتە اۋقىمدى ءارى كۇردەلى مىندەت. بۇل ماسەلەلەر بىرتىندەپ شەشىلىپ جاتىر.
الەمدەگى ەكونوميكالىق احۋال ءبىزدىڭ ەلگە دە سالقىنىن تيگىزەتىنى ءسوزسىز. الايدا كەز كەلگەن قيىندىق جاڭا مۇمكىندىككە جول اشادى. ەكونوميكانىڭ ءوسىمىن ىنتالاندىرۋ شارالارى مەن قۇرىلىمدىق رەفورمالار قاتار ءجۇرۋى كەرەك. ناقتىراق ايتساق, كاسىپكەرلىك پەن باسەكەنى دامىتۋ, جەكەمەنشىكتى قورعاۋ, ءادىل سوت تورەلىگى بولۋى وتە ماڭىزدى. سوندا عانا كوزدەگەن ماقساتتارىمىزدىڭ بارىنە قول جەتكىزىپ, بەلگىلەنگەن مەرزىمدە ۇلتتىق ەكونوميكا كولەمىن ەكى ەسە ۇلعايتا الامىز.
سۇيىندىك الداشەۆ,
سەنات دەپۋتاتى